這是一份讓人又愛又恨的工作。

在九月經 Charlie 介紹，我懷著緊張心情到Rosenheimer Platz 的BH1 試工。BH1 的廚房是開放式，客人可以望到廚師做緊咩野，甚至可以坐在你面前的 bar 台睇住你失手跌野落地。不過當天完全沒有留意有無客望住，因為要超級專注先可以搞清楚你手上有什麼order，同埋如何表達俾阿廚師大佬知。試工實際大概兩個鐘，但忙碌同緊張程度令人完全唔察覺時間流逝！到人地叫我可以停啦，換返衫的時候才如夢初醒，個心重係跳得好快！

試工無錢收，不過會請你食返個漢堡包。對食無乜要求的我以往多數只係食快餐店式的漢堡包，覺得呢個Classic包非常好食，塊漢堡真係有肉汁，唔似M記乾爭爭得D油，個醬都好惹味。（寫寫下變食評？！）

在Bar台食完個包，大佬黎問我，點呀覺得份工點呀？我話好challenging好有興趣，其實個心係覺得好tense好驚做多幾次會心臟病發。不過失業中梗係要好口D表示有興趣啦。。點知佢話十月尾再聯絡佢，因為新鋪未開張=.=

不過原來唔係無料到，十月尾搵佢又真係叫我去準備文件返工！所謂文件，最主要就係俾14歐去"衛生署"睇個德文Video，教你飲食業要注意的衛生事宜。無論你聽唔聽得明，只要交左錢同出左席就會得到文件。然後11月3號就正式去BH4 分店返工！

其實整包兩個字係無法概括所有job duty。如果返早更，主要工作就係早上make sure材料全ready，要切下芝士切下肉，叫open the kitchen。如無意外都幾悠閒。然後餐廳開門就做生意，整包炸薯條整salad等等等等，考驗手腳協調同記憶力。如果返下午更，打完仗就要包返好今日用剩的食材入雪櫃，叫close the kitchen。廚房經常發生大大小小意外，炸野會俾油彈到就唔好提啦，還有切野切到手，心急遞野撞到櫃，放工沖涼先見到隻腳瘀左。。。好就好在乜都用洗碗機，唔使我洗碗，如果唔係就變主婦手！

11月是恐怖，又豐收的一個月。因為編更的大佬諗住我幾時返工都得，而我就諗住只係parttime一份，諗住一星期應該返幾日姐。點知佢真係排到我成Q日都要返，後黎加埋每日下午上德文堂，再加埋放工俾人造人鵝我沖涼嘈住佢訓，真係好大壓力！（夜晚晚洗完頭重要無風筒）

成日都要返工，但制服就得一件，洗得黎又乾唔切，所以經常都著成4,5日先洗一次，諗返都噁心。在廚房做野一方面吸曬D肉同油的"香味"，另一方面D醬呀 buttermilk呀炸粉又經常情不自禁彈上我身上，日積月累，未夠半個月件制服已經進入左"洗完望上去無蹟但仍然好臭"的狀態。

11月底，就黎癲的我某日又同大佬講我邊日其實唔得閒可唔可以同人調，突然俾佢爆seed話我好Q煩，恨不得炒左我之類！嚇到我唔敢出聲，費事同佢嘈分心做錯野。（寫到呢度remind我，透過做呢份工令我更了解自己，原來我係唔可以一邊同人講野一邊專心做野！一講野就自然會停手，唔停手就做錯野。。。）

到得閒D我忍唔住同佢攤牌，話我無expect過份工要返咁多日咁cher，我頂唔順啦就黎。佢都冷靜左同我傾，後黎終於deal到12月每星期返3~4 shift就得。所以12月就舒服曬！不過11月返得多，收入自然唔錯，計埋tips 就真和味！

講開tips，有時真係睇運氣，唔單止係客人俾tips闊唔闊佬，更要睇埋小偷有無皇恩浩蕩唔搞搞震。好ridiculous，我返左兩個月已經見證兩次失竊事件，第一次係收鋪後俾人爆入黎爆左保險箱同收銀機，第二次係俾個客攞走左成個tips銀包。咁都得！

每更都包lunch或dinner，頭幾日都會興致bubu 咁order 漢堡包加薯角再吱好多醬同芝士，不過好快就發覺唔掂，日日咁食既肥又悶，所以往後通常都係食沙律加塊煎雞扒，雖然都會悶，不過起碼健康小小！

忙碌中其實學左好多野，以前我對芝士一竅不通，宜家就知道了除左黃色正方形的車打芝士外，還有本來覺得好似樣 ga Gouda 同 Gruyère，前者軟身可以用刀切，平D但我中意食，後者好Q硬，要用刀片出力刨，不過當佢放在漢堡上唔連包食真係一流！還有香濃的blue cheese，不過食細細塊就已經好滯。（後來在布拉格一間餐廳發現原來blue cheese粒粒加埋啤梨撈沙律菜係比放在burger入面更好食！）還有無乜味成隻剝殼雞蛋要用水浸住的mozzarella，和帶炸粉包住要返炸的carmembert（唔中意佢要炸）。

初初做好多野都會忽略了，但其實簡單到吱醬入盤都有學問，求其吱真係會睇得出。每個dish的presentation都好重要，所謂 "對眼食先" 丫嘛！（當然，忙起上黎係兼顧唔到咁多）

在這兩個月的觀察中，發覺有系統的培訓好重要。由於廚房眾人的標準和認知度參差，質素都唔係咁穩定。基本要做的事大家當然唔會有好大出入，但細節好多都係一知半解。因為好多時都係醒起先同你講，有時見到人地點解會做左一d 我曾經都做錯過ga step，都會好掙扎究竟指唔指正佢呢，畢竟在廚房人眼中我只係個死o靚妹！講開又講，香港人無論男女（至少我們幾個在慕尼黑一齊玩的人）真係呃到人，平均都會俾人估細5歲。而我地睇歐洲人中東人就估大佢地10歲左右啦。。最經典就係廚房有個阿富汗男人，我地一直覺得佢應該有成40歲，點知原來得23歲。而之前在窗簾工認識的德國男仔，我同佢都覺得佢大過我，點知原來我大佢8年。。。言歸正傳，如果想質素保持高水平，訊息傳遞好重要。不過在無乜管理和流動性比較高的這個廚房，執行起上黎就可能難d。

在廚房發生好多有趣事，試過老闆親自落場頂更，點知一路煎扒一路隊酒，距離last order還有一小時已經開始神志不清！又有一盞專用來以熱力照住食物等佢唔好凍得咁快的燈，經常俾我地話佢廢，點知有一日佢照溶左個膠樽。。。同事好多都唔係德國人，有西班牙人希臘人阿富汗人斯洛文尼亞人香港人。。。聽得最多的外語就係 μαλάκα （讀音 malaka，希臘文的asshole。。）和 maricona（唔肯定係咪咁串，好似係西班牙文的基佬。。）同事們不單止多國藉，每人都帶著不一樣的故事來到德國，我們working holiday 就賺錢用黎交租去旅行，但佢地就真係 make a living。我們還是很幸福的。

總括以言，呢兩個月都幾開心幾難忘，重有另外兩個hong kong babies 成日開心share 苦與樂！個人先平衡返D！

成功發佈