前文提及左今次住既酒店既資料，有興趣可以上深圳尋歡記1-1 睇返，係時間要介紹下呢趟旅程食左啲咩啦～ 行程： 第一日 下晝搭火車去羅湖->6點到過完關搭地鐵去會展中心站->大約7點到食同順居北京菜館（等左15-20分鐘到入座）->買左杯奈雪之茶就返酒店CheckIN 第二日 2點酒店CheckOut ->搭地鐵去購物公園站食西貝筱面村 ->行左陣COCOPARK ->搭地鐵去皇崗返香港 一起羅湖過完關，我同朋友就即刻落左去地鐵站，搭左3個字到去到會展中心站試食呢個係深圳都出哂名既同順居北京菜館果木烤鴨♥，因為係香港食片皮鴨既價錢唔平而且味道食落都唔太正宗。 另外啊，點解我地要急急腳搭地鐵去呢，因為其實一般係深圳好食既餐廳係晚飯時間都會大排長龍，小則半個鐘，大則亦都有可能要等2-3個鐘，我相信唔少朋友仔有上過去食海底撈就知啦～ 縱然係有美味不用等呢個app，可以係網上取號，但呢間餐廳就要到場攞籌，所以我地都要快啲去到，驚住會有好多人係到。 係會展中心地鐵站B出口一出就會見到中心城商場外貌，一睇呢個商場外觀就見到好多野食，好多出名好食既菜館同人氣飲品店都係到，例如喜茶、探魚、麻辣派對、西貝等。而且商場都算大，分左東南西北門，同埋有戲院，但就望落唔覺新淨，但個人意見就唔覺得特別好行，所以食完飯就買杯野飲就去酒店checkin啦。 地址： 福華一路3號怡景中心城一樓西大門l1004(大中華大漁鐵板燒旁邊) 營業時間： 週一至週日 11:00-22:00 人均消費約：¥114/人 到達同順居既時候，見到門口已經有人等位，我地拎左籌等左大約15-20分鐘到就可以入座啦，可能係我地得2個人，所以排得比較快啲，而且就眼望佢地鋪頭比較大，除左地下仲有樓上同外面。 一入門口就見到呢道舊式住宅既木門同個井，而牆身佈置亦擺左唔啲京劇既戲服做擺設，但話好似置係老北京我就唔係太覺得，就係一間食京菜既菜館囉。而枱櫈都係以木為主，我地被安排住個位隔離就有個台，我諗佢地應該到某個時候就會表演京劇戲曲，詳情無問職員幾點或者幾時會有表演，但好可惜當日我地就睇唔到啦。 入座後就有職員走過黎問我地飲咩茶，但要計茶芥錢，分別係10蚊同20蚊既款揀，嗰日我地就揀左20蚊既菊花，要提返大家，係每人20蚊，茶既味道我就不作評論啦，自問自己品茶就唔係好叻。 嗰日我地就叫左4個菜，分別係果木烤鴨，老北京炸醬面，京東肉餅同老北京醬肉卷餅。 果木烤鴨半隻（¥118） 半隻鴨會配1份餅同3個配料（哈蜜瓜、青瓜同京蔥），另外仲有蒜蓉砂糖同京醬，如果另外再想加配料就每款要比5蚊，而餅就要10蚊份。就我地2個人而然就覺得好足夠所以就無另外再加。 有一個地方需要讚既係，無論叫半隻定一隻佢都會有個人係你面前現場片鴨，手法都老練專業，但鴨皮唔叫好脆口，如果唔點醬都可以食得出佢有淡淡果木味同鴨原本既鮮味，而鴨肉食落唔會乾，肉質都算香嫩。不過淨食鴨係無咩味既，用餅包住鴨肉連皮加埋醬同配料，感覺十分滿足，亦都有啲膩。 老北京醬肉卷餅（¥48） 呢個前菜對我地黎講一啲都唔似前菜啊，感覺非常之多，個薄餅味道似手抓餅，個豬蹄片本身都係無咩味既，但用薄餅夾住個脆脆蔥同肉片外加京醬，食落好似上海個煎餅果子，層次好豐富，味道都好好，但都係有啲膩，同幾飽肚，食唔到好多件。 老北京炸醬面（¥22） 份量似大約2個人到，醬好少，但夠撈哂成個面，味道唔識形容，可能唔似我地平時去面鋪食開既炸醬，亦都唔似韓國既炸醬面，咸得黎帶啲酸，其實可能係我地食唔慣姐，因為我見佢呢個菜係大眾點評都係Top5必點。 京東肉餅（¥38） 呢個餅食落第一啖個味似M記豬柳蛋漢堡，餅比肉卷餅個餅皮薄亦都加左蛋去煎，肉碎好平均咁搽係餅上，夾起一舊食既時候唔會跌到周圍都係，覺得幾好食，係香港無食過啊。 整體黎講，京菜都係比較油膩，而且我地2個人叫4個菜真係好多，一啲都唔似大眾點評啲人咁講份量少，呢到應該真係可以4個人食，所以我地買左2個盒（¥2/1個盒）打包返酒店。4個菜夾埋先係¥250，真係非常之抵，味道一啲都唔差，下次會再返黎食。 食完飯，想消下滯就落左去下低買野飲。喜茶我地平時就飲得多啦，今次就一試下奈雪之茶！ 飲完先發現唔記得影相/.\ 我地分別叫左1杯芝士阿里山同芝士金觀音。飲完奈雪既芝士比較起喜茶芝士，我地都一致覺得喜茶既芝士仍然係最好味既，奈雪既芝士感覺唔夠細滑同濃，而呢個拎左獎既阿里山都唔得係比到我叮一聲既感覺覺得好好飲，但金觀音反面整體感覺唔錯，都幾解膩， 不過等呢2杯野等左我地差唔多半個鐘，下次再試下其他啦，可以會更好飲。 順帶一提，呢間奈雪之茶有賣面包，而且都幾多人買下，一個包既size有啲似我地平時買大提子包咁大個，價錢大約¥18-¥25到，不過我地今次就無買啦，因為食得太飽啦，所以唔知味道如何。另外鋪外出面亦都有好多位，環境都幾清優，我同朋友都覺得如果行到悶悶地坐低食個包飲杯野吹下水都唔錯啊。
