離開英國後，係倫敦搭 EuroStar 去到夢寐以求既巴黎。 巴黎真係想去好耐，呢個咁浪漫既地方，終於留得到我既腳印啦～ 法國只留了6日，行程不多，但已足夠讓我回味，一定會再去呢個咁美既地方～ 法國6天行程：巴黎＞史特拉斯堡＞科瑪 Day 1-3：巴黎 巴黎鐵塔 ＞ 凱旋門 一到埗既第一站就係巴黎鐵塔，搭地鐵去都好方便㗎！初初未去巴黎既時候，好多朋友同我講巴黎治安唔好，要小心。去到巴黎，我真係好小心，仲特登加"啷啷"係袋，又有防狼器等等(上網睇既旅遊防範教學haha) 但去到我又唔覺得巴黎好危險喎，好能係我好彩冇遇到危險既事(感恩)，但呢個城市我真係好喜歡，而且一定會再去！ 巴黎好多甜品店，而我地就係其中一間買左個cake黎到鐵塔下黎個浪漫下午茶～ 我地特登揀左係5點幾天仲光但又未天黑既時間上鐵塔，咁就又睇到日景又睇到夜景啦！上面仲有望遠鏡俾你睇清楚巴黎既景色架～ 都未離開已經唔捨得，大概可以形容到我當時既心情。最期待既地方遺都冇失望哦～ 巴黎夜景都有種浪漫氣色，加上去旅行，人總有種好放鬆既心情，呢一刻真係好享受。 呢張係我係塔既一半向上影鐵塔，每到時鐘搭正12，鐵塔就會閃5分鐘，相機跟唔切但都影到少少，佢閃既畫面已經係我腦海入面啦 hehe~ 到左夜晚，呢度既景色真係靚到無得彈，沿住河流行過去巴黎鐵塔，實在太迷人～ 到左夜晚再落番去睇鐵塔，咁岩係旋轉木馬見到有一對新人影婚紗相，好幸福。希望將來我都可以同相愛既人係呢度影一輯婚紗相啦！其實係咩地方唔重要，最重要果個係「你」，係對的人啊嘛～ (因為連續兩天都有去鐵塔，相片就一起放啦) 之後就可以去睇凱旋門啦！講真一開始唔係話好期待，但去到都係「一個字」－好震撼！唔知大家知唔知呢，凱旋門係巴黎12條大道既核心， 成放射性咁延伸到12條大道，所以係地圖睇係好似一個太陽放射光芒咁。所以去到首先見到既係圍住凱旋門既繁忙交通，真係好多車。亦因為太多車既關係，想行 去凱旋門腳下就要落隧道再行番上去～ 呢個位係馬路與馬路之間，岩岩好可以影晒成個凱旋門！ 係巴黎街頭散步真係一件好幸福既事，每一處都散發浪漫氣色啊～ 聖母院 ＞ 塞納河 ＞ 羅浮宮 講番都好攪笑，因為其實影呢張相果刻我並唔知道呢座係聖母院，果時只係純粹覺得佢好靚。巴黎聖母院其實係天主教教堂，亦係天主教巴黎總教區的主教座堂，屬於哥德式建築形式，係法蘭西島地區的哥德式教堂群裡面，非常具有關鍵代表意義的一座。 其實去到巴黎，好容易就會見到塞納河架啦。塞納河係流經巴黎市中心既法國第二大河，全長780公里。果日係河邊坐左一陣，享受呢個悠閒既下午。溫馨提示：坐河流邊要小心安全啊，仲要注意個人隨身物品，一個唔小心就會跌野落河...嘰嘰 友人都中招左，我話唔緊要啦，咪當將我地既回憶保存係巴黎囉～ 喺羅浮宮買左一張postcard，並唔係相中呢張，而係佢既右面－王子。保留一d想像空間，唔擺張卡出黎啦，小小的回憶～ 到了晚上的羅浮宮，中間會有一條假閃電線，實在十分浪漫～ 之後會打埋史特拉斯堡同科瑪，記得留意啦！ YOUTUBE 片：https://www.youtube.com/watch?v=dQhWa1jEGFA 呢個ac叫做Hong Kong Sisters，其實我地係兩姊妹黎架！不過呢次歐遊就係我(細妹)去既～我地兩姊妹係 Facebook 同 YouTube 都有一直分享美食同拍一D攪笑Vlog，希望大家多多支持啦！BYE BYE！ Facebook：https://www.facebook.com/hongkongsisters/ YouTube：https://www.youtube.com/channel/UCCz98hrznVqR5VZVNmx2ymw 合作/邀稿: hongkongsisters@gmail.com
