如果你得一個星期時間去英國，或者想以英國作為歐遊第一站，行程應該點樣安排呢？ 如果你都同我一樣，覺得難得去到英國，緊係盡量去多d地方，咁你就一定要睇呢篇啦！ 而我自己就鍾意plan定一兩個地方，到果日再係呢兩個地點附近隨便行下， 雖然話第一次去英國想去晒出名既景點，但隨意行先會感受到當地文化氣色，會更正哦！ 上次歐遊既第一站係英國，之後去左法國同德國，之後希望可以update晒成個行程既blog！ 行程表：倫敦 ＞ 牛津(即日來回) ＞ 劍橋 ＞ 約克 ＞ 愛丁堡 Day 1: 倫敦 Trafalgar Square > National Gallery > Green Park 一到步倫敦，搭完長途機可能會有d攰，所以建議可以係酒店休息一陣再出發。 倫敦既中午，去 Trafalgar Square 就一定冇錯啦！ 呢度有個 National Gallery，免費入場參觀架，出面就係一個大既廣場， 坐下享受下氣氛都好唔錯！ 好好彩我去到係大晴天，藍天白雲真係好靚，當時仲有音樂表演！ 相信我，第一次去到倫敦，係地鐵站行上去果一刻，你真係會超級興奮！ 其實第一次係倫敦街頭行，真係亂咁行冇點睇map，Green Park 就係其中一個亂咁行 行左去既地方，一個好大好大既公園，有個靚湖～ 買份三文治、拎本書，可以 chill 一個下午既好地方！ 呢個咁靚既小屋就係個公園入面啦，果日仲咁啱係路口睇到士兵步操路過～ Day 2: 倫敦 Big Ben ＞ London Eye 相信好多人去倫敦都一定會去睇Big Ben！呢個唔睇唔得嘅建築究竟有咩特別呢？ 雖然第一次去到英國，咩都覺得好新鮮好靚，但係Big Ben俾我既感覺真係好amazing！ 由地鐵上黎果下，周圍都係古典建築物，好華麗好宏偉！ 用contrast大d去影，Big Ben真係好靚～ 果日喺呢個小區逗留左好耐，附近既建築、教堂等等都好靚啊～ 再行遠少少就係 London Eye 啦！雖然搭車d景點都會分左幾個站，但係其實有d都好近， 有時間既話慢慢散步咁行晒仲正！ 我去既時候係7月，但因為天氣唔穩定，有兩日係涷到出街見到好多英國人著大褸， 所以唔好以為 7 , 8 月英國係夏天就剩係帶短袖衫啊 :cry: 小插曲：話說果日發生左一段小插曲，上面呢幅圖呢3個女人一開始行過黎話想同我地影相，點知影完就圍住我地話要收我地10鎊，嘩，真係明搶錢！我地之後講左好耐最後俾左1鎊俾佢，話如果你地唔走我地就報警，佢地就走左。倫敦街頭都會有呢d人真係嚇一嚇，大家見到呢d人要盡量避開啊！好彩今次都係冇左1鎊，唔係有d咩其他損失 (驚) Day 3: 牛津 Christ Church ＞ 牛津大學 去牛津係即日來回倫敦既，因為廢事又要book多間bnb， Christ Church 係今次行程必去既，因為我係哈利波特粉絲，唔係講笑去到真係好開心！ 哈利波特食飯既地方，佢有好多畫像掛左係牆上，入去行一圈就要出番黎啦， 因為好多人排隊。呢個廳每日剩係開放兩個時間架咋，要去既朋友記得check定時間！ 有冇人認得呢個係哈利波特入面佢地練習魁地奇既草地？ 神聖既教堂，細心望呢幢建築好多細節位都做得好靚好仔細～ 牛津大學著名既呢個影相位，點可以唔留影一下呢～ Day 4: 劍橋 Cambridge University ＞ 沿水路散步 劍橋係一個出名河流好靚，景色優美既地方，落車行左無耐就見到劍橋大學啦～ 不過我地就冇入到去，正係出面影相都好靚！ 再沿路一直行入去其實就會見到好多河流穿插，除左影靚相，呢個亦係放鬆身心既好時機， 風景真係好靚啊～ 有興趣仲可以搭下划艇tim! Day 5: 約克 行城牆 > 約克座堂 > Clifford's Tower 點解要特登specific要行城牆呢？因為原來約克到而家都仲保留緊個城牆， 佢係圍住約克中心，有幾個城門，仲有幾條樓梯可以上去圍住行下架。 行到去中心，就要去睇下約克座堂啦。 影陣相之後就可以去隔離草地chill下～ 英國人真係好鍾意攤係草地， 瞓個晏看又好，睇下書又好，真係好chill 好正。 Clifford's Tower 其實一開始冇plan到要去，係咁啱行到去果度(因為好少睇map)， 如果上埋去，就可以睇到York既全景啦～ 係僅餘城堡之一，隔離仲有個旋轉木馬。 Day 6: 愛丁堡 卡爾頓山 ＞ 行市中心 搭完長途火車黎到愛丁堡，溫度即急降到14度，涷死人啦～ 愛丁堡真係好有英格蘭舊風味，彌漫住一浸古典風味～ 建築同氣氛都好唔錯哦～ 特別想分享呢日bnb主人為我地準備既早餐，真係好warm～佢仲介紹我地要去卡爾頓山！ (如果大家想睇，我可以打一篇關於歐遊 bnb 介紹～) 卡爾頓山係要行一段斜路先上到去既，上到去望到愛丁堡既風景，幾攰都值得～ 山上面有呢個地標，可以影下相留念～ 之後就可以落市中心行下街，或者搵塊草地chill 下啦～ 愛丁堡其實唔算大，悠閒行下感受下呢個城市已經好唔錯啦！ 你好彩既話仲會睇到有男人著住蘇格蘭格仔裙tim！ Day 7: 愛丁堡 司各特紀念塔 ＞ 愛丁堡城堡 呢個司各特紀念塔好顯眼架，火車站一出已經見到佢，好宏偉架。 佢其實係一個維多利亞哥德式紀念塔，紀念蘇格蘭作家沃爾特·司各特既。 行一陣街食完野我地就去左愛丁堡城堡啦，果條路真係好多人著格仔裙，好有feel架！ 城堡外觀仲保存得好好，值得一遊。 係城堡外既商店試戴佢地既帽，哈哈，係咪好似愛斯基摩人呢～ Day 8: 倫敦 Arsenal球場 ＞ 大英博物館 ＞ 倫敦橋 又番倫敦啦，因為我地即將要出發巴黎，準備係倫敦搭EuroStar。 今日就去同伴好鍾意既Arsenal球場！嘩連我呢個唔睇波既都覺得好興奮>< 之後仲去左大英博物館，呢個遊客必去既景點，除左係出面影相， 博物館入面有好多好值得仔細觀賞既文物，而我竟然逗留左係埃及館好耐，哈哈 最後去埋倫敦橋，真係好宏偉啊！由細到大成日都唱，London Bridge is falling down， 而佢就係我眼前，真係好靚！ 如果你睇到黎呢度，真係好多謝你！更多謝「你」，陪我去呢趟旅程：） 希望呢篇文除左俾大家有個參考去plan行程，更加令你睇完更喜歡英國啦！ 之後會繼續keep住打blog，希望大家多多支持，留個言俾我啦！ YOUTUBE 片：https://www.youtube.com/watch?v=ekYTdLIjkm0 呢個ac叫做Hong Kong Sisters，其實我地係兩姊妹黎架！不過呢次歐遊就係我(細妹)去既～我地兩姊妹係 Facebook 同 YouTube 都有一直分享美食同拍一D攪笑Vlog，希望大家多多支持啦！BYE BYE！ Facebook：https://www.facebook.com/hongkongsisters/ YouTube：https://www.youtube.com/channel/UCCz98hrznVqR5VZVNmx2ymw 合作/邀稿: hongkongsisters@gmail.com
