曼谷特色咖啡小店Begin Coffee & Bistro，招牌咖啡MonteCarlo，竟然係香港嘅...... 早排為咗個飲食節目，香港仔四出約泰小店做訪問，本來有間幫襯開嘅心水店，點知嗰日去到摸門釘，不過泰國巷仔入面啲小店好多都無用FB,iG，Google map都未必有搞，所以想問佢邊日開都難，住得耐都慣咗佢哋嗰種泰式管理法(即係睇心情)。既然都到咗，咁唯有帶泰妹周圍亂行啦，途中影下猫咪、小毛孩，發掘下啲新奇野，行咗陣阿老佛爺又話攰，剛好行過呢間Cafe，二話不說就推門直入。☕ 間Cafe怪怪哋，個店面縮咗入去一啲都唔起眼，我哋抬頭一望，左面藍色牌反白色寫住บริการซ่อม(維修服務)，係專接車冷氣、零件維修；右面就係間Cafe正門，後尾先知原來兩間野係同一個老闆，哈哈，一舖多用，勁！ 推門入去就見到一大座深木色入牆陳列櫃+咖啡檯+收銀櫃，佢連門框窗框Bar檯全部都係同一個Tone，明顯係想同乳白色嘅牆身做強烈對比，帶領客人視線去佢嘅Menu上，贊！ 我有個習慣，去到新店一定要點佢嘅Signature招牌咖啡試下，見到有隻叫"Monte Carlo"，個名感覺好南美風情(個人對拉丁語系有啲情意結)，於是就揀咗佢。 野飲叫完，同泰妹一齊揀咗個靚位坐低，聽到磨豆機運作嘅聲音，被研碎嘅咖啡豆隨即起作用，香氣撲鼻！同時，我不忘欣賞下泰妹背後嗰塊手繪壁畫，原來店名BEGIN係玩食字，既係蜜蜂"BEE"，又係"BEGIN your fresh new day"嘅意思！👧🏻未幾，我手上已經揸住杯招牌MondeCarlo，自覺成個人好南美，實在忍唔住一大啖飲落去，當咖啡經過舌尖，再游走到每一個味蕾，我不自覺地皺起眉頭：「哦?! 呢陣味咁熟悉嘅！」我完全唔敢相信自己嘅味覺，我即刻再試多啖證實。果然！根本就係我由細飲到大嘅「鴛鴦！」👦🏻 Iced Monte Carlo 50฿(約HK$12.5)我立即走去櫃台𥄫多次個Menu，原來喺MonteCarlo下面寫住一行細字เอสเพรสโซ+นมสด+ชาแดง(濃縮咖啡+鮮奶+紅茶)，我即刻傻笑，原來係知己諗多咗囉，睇完個名就以為係南美風情⋯⋯Well～咁有時掛住香港，有多個地方飲杯鴛鴦都唔錯吖！😆 Cafe都收得算早，平日收6點半，六日收5點半，我哋坐到5點就走人，一行出去就明白點解間店會縮咗入去，原來店前面租咗出去畀推車仔賣泰式豬腳飯，咖啡店一收佢就開，剛好天開始黑，timing夾到啱啱好，共生主義喺泰國都幾常見嘅現象，所有野都係講關係，講人性味～🤝💁🏻♂間cafe點去？去到曼谷地鐵Mrt Sutthisan站，跟Google map行要20分鐘，我都幾鐘意邊行邊睇景；又或者從Mrt Sutthisan站直行到Ratchadaphisek 17巷街口，轉坐電單車，上車前講inthamara 53，20-25฿搞掂，1-2分鐘就到！🚇🚶🏻🛵☝🏻小攻略：臨離開嗰條街，食埋門口檔豬腳飯都幾正，對面即刻有電單車坐返去地鐵Mrt Sutthisan站，上車前講Mrt佢就明。☕️店名：Begin Coffee & Bistro🕤營業：Mon-Fri 08:30-18:30/ Sat-Sun 08:30-17:30🚕地址：246/1 Soi Pracha Suk, Khwaeng Din Daeng, Khet Din Daeng, Krung Thep Maha Nakhon 10400📱google map: https://goo.gl/maps/MJQ8VX7NPNREyrrg6———————————更多人在泰生活趣文：即入facebook搜尋「人在泰香港仔日記」或「hkguy.inthai」
