應徵者一 應徵職位：初級廚師 我：「你之前多數煮開咩菜式？有無咩拿手菜？」 應徵者：「其實我好少煮野食，因為怕接觸生肉。」 我：「……」 我地無搞齋菜，佢又唔係見甜品師傅哩個位…… ************************************************** 應徵者二 應徵職位：廚師（水產） …… 我：「有無關於職位上或者公司上既問題？」 應徵者：「我係唔會殺生架，哩樣野我要依家講清楚。」 我：「……」 . 老實講，依家 d 人鬼咁鍾意食游水海鮮，貪佢夠新鮮嘛。上一個又話怕接觸生肉，哩個又話唔殺生，家陣係咪要佢地出返 d 人工請一個專人負責劏？ *************************************************** 應徵者三 應徵職位：技工 . 我：「麻煩先簡單介紹自己」 . 應徵者：「其實你地都有我 CV，咩都寫哂係上面……」 . 其實要你用把口講 CV 無既野係咪咁難？ . 我：「咁上一份工作既主要工作範圍呢？你覺得點樣可以用上一份工作既經驗來幫到我地公司？」 . 應徵者：「都係果 D 啦，我又未做過你公司，我點知！」 . （唔該門口直行前面轉左……） ************************************************* 應徵者四 應徵職位：技工 . 哩次又係見技工。我一入會議室準備面試，櫈都未坐暖，連第一句開場白都未講，坐在我對面的應徵者已經講…… . 應徵者：「唔駛介紹啦，你係 HR 丫嘛。不如我自己介紹自己先，同講下之前 D 工作經驗啦。而哩份工作要做 D 咩我都已經好清楚，以前哩到做的人我都識唔少……」 . （咁我係咪可以慳返個 Interview……） . 面試途中突然傳來電話鈴聲…… . 應徵者隨即從袋中拎個電話出黎聽：「喂，我依家見緊工呀！」 . 電話對面個人，講野大聲到我坐佢對面都聽到：「你邊到見呀？」 . 應徵者：「 XXX 公司呀。」 . 電話對面人：「係邊架？都無聽你講話見工既？」 . 應徵者：「我之後再同你講啦……」 . 跟住就收左線。不過咁，成段對話我都聽得好清楚…… . 其實當下我真係有諗過佢會唔會繼續講落去…… ****************************************************** 應徵者五 應徵職位（原本）：設施管理助理 我：「申請職位一欄你未填，請問你想申請咩職位？」 應徵者：「你哩到有咩職位岩我？咩工都得，只要過兩萬我就做！」 ****************************************************** 應徵者六 入職要求：需要有英語會話能力 我：「Can you please let me know why you are interested in this position?」 應徵者：「……」（沉默了 15 秒） （Dead Air） . 佢好似毫無意欲打開個口，我猶疑緊應唔應該等佢，佢其實係諗緊定係唔打算答？ . 最後諗住問多幾句英文，點知全部都同我 Dead Air，最後要用返廣東話先肯答我 . Sorry, my thought and my fault…… 好地地係唔得既…… 結果全程都係廣東話…… ******************************************************** 應徵者七 約左應徵者上晝 10:00 面試。 10:10 — 未出現，諗住應該 No Show，食白果。 10:15 — 應徵者打電話俾我話：「我塞緊車，好快到！」 10:30 — 應徵者又打黎：「我趕緊黎架啦！」 . 本來以為過多 10 分鐘會見到人…… . 10:50 — 仍然未見人。 . 心入面諗住放棄架啦。 . 欸？點知佢又在 11:00 出現，仲要若無其事咁，一句道歉同解釋都無。我堅想問佢，你係咪大陸趕落黎？定仰或記錯左 11 點咋？ . . 感激各位千奇百趣既應徵者，令我地 HR 沉悶既工作增添一份「生氣」，亦令我地留下深刻既印象，不過係唔想聘用果種深刻印象……
