30 , 對於呢個數字，唔知有幾多女仔同我一樣覺得好困擾。因為會有好多人同你講要結婚喇，要生bb喇，要定性喇，要乜乜乜乜... 好似30代表你要同青春，任性，美麗一刀兩斷咁。所以我在2字尾這個時候，決定一個人出走歐洲四個月，好好諗吓自己究竟想點。 其實我已經唔係第一次去歐洲，不過一個人去都係第一次。話完全唔驚係呃你嘅，不過其實樣樣嘢自己小心啲，都唔係想像中咁危險。(自己平估風險啦吓) 一個人去旅行嘅好處係: (1)你唔需要同人商量去邊去邊，幾點起身，食啲乜，做啲乜，你可以去到邊玩到邊，鍾意做乜就做乜。 (2)你會易啲識倒嚟自世界各地嘅朋友，因為見你一個人，啲人會主動啲同你傾計。容易啲搭訕吖嘛，哈哈~ (3)容易啲book倒平嘅hostel，train，bus等等，因為好多時都有last seat ，last room 等等... (4)你嘅所有感官會突然開哂，因為你自己一個唔會成日有人同你講嘢，好多時你都係自己一個人行街，坐車，食飯，你會留意你身邊嘅事物，環境同人多咗。 (5)會變得更加獨立，成熟，大膽。因為旅途中，每日都會遇倒好多突如其來嘅事，係你意想不到架，要你自己去解決同面對。我試過因為當地搞大罷工，而上唔倒火車，搞到我陣腳大亂; 又試過零晨四點黑媽媽一個人行個幾鐘去搭火車，真係驚到一路行一路喊... (6)你嘅思想同睇法會睇開咗好多，因為旅途中你會遇倒好多人，聽吓其他人嘅故事，睇吓關於當地嘅新聞同了解吓佢哋嘅歷史，你會發覺呢個世界真係大到你唔信，咩人咩事都有，你會變得冇咁執著。 (7)體能變好，為咗旅行睇吓你可以去到幾盡喇。一個女仔，周圍走，閒閒哋都要揹住20 ,30kg嘅大背嚢，有時放低背嚢嗰陣，膊頭真係痛到眼淚在心裡流....嗚嗚嗚... 有時仲要揹住佢追巴士趕火車，真係少啲體能同意志都唔得。(冬天更慘，因為啲衫好厚) (8)廚藝大躍進，因為唔可以餐餐出街食，所以唯有自己煮，煮得多自然會慢慢煮得好。有時喺hostel仲可以同其他人交流煮餸心得，學吓人哋嘅地道美食。 總之，一個人去旅行，包你會有意想不到嘅驚喜。
