入黎睇下我哋個Blog嘅介紹啦~! >HamBlogger< 今日返足全日，仲要得一個鐘食lunch，所以近近哋喺學校附近揾嘢食。 入到去，成間嘅裝修都好簡潔，感覺都幾舒服，好適合偽文青打卡。 感覺好寫意～ 比咗個menu我哋之後，個侍應企定定喺隔離，好似逼住我哋快啲落單，感覺好唔舒服，好趕客。所以小編就好快咁揀好兩個漢堡，諗住叫咗嘢食打發佢走，嘢飲等陣再叫。 小編：唔該，我哋要呢兩個漢堡，嘢飲等陣先叫。 侍應：唔緊要呀，你諗埋先呀（企定定喺到等）。 小編：因為有太多款，我未揀到。 侍應：冇所謂呀，我可以等你諗埋先。 侍應：因為要一次過入機，所以要叫埋嘢飲先可以一次過入單。 小編呆了，但都體諒佢所以冇即場爆發。小編自己本身係喺放題做part time waitress嘅，明白做待應有幾辛苦所以平時好少會comment，但今次都忍唔住。本身有諗過影低個侍應嘅樣㗎，但廢事搞到人哋連份工都冇埋。 左：Flat white （＄32)；右：蜜糖薰衣草茶（＄35) 叫完嘢食，我哋等咗大約十五分鐘先有嘢飲，杯蜜糖薰衣草茶幾香，有蜜糖甜甜哋，啱啱好可以蓋過咗薰衣草嘅苦澀味。但隔離呢杯flat white真係好普通，咖啡味好淡。同埋唔知係咪一時錯手，杯咖啡望落去好似畀人飲咗一啖咁。小編冇乜藝術感，唔知個拉花係咩圖案 可能咁啱撞正有枱十幾人嘅客，所以比平時要等耐少少。如果佢可以喺落單嘅時候，講聲話食物要等大約幾耐先到，會比較好。 btw啲餐具污糟到嚇死人 小編等咗差唔多半個鐘，終於有得食喇。問落去都幾香，望落都唔錯，係個包面燶咗少少。 炸軟殼蟹竹炭漢堡（＄78）＋ 茶類飲品及薯條（＄32） 食食吓，突然諗起點解個包唔係黑色明明話係竹炭漢堡，但點睇同普通嘅漢堡包都冇分別，好似被騙咁 不過算啦，時間有限，快啲食完返去上堂好過。講返個包先，個包面有少少燶，但食落去都唔錯，可能因為有芝麻。個炸軟殼蟹okay啦，同平時食到嘅一樣味，冇乜驚喜。如果調味可以冇咁重手，會好好多。不過嚿青瓜好似擺咗好耐咁，食落唔爽脆。整體呢個包都算係可以接受嘅，但大家可以唔洗試 千島醬啡仔手打牛肉漢堡（＄68）＋ 咖啡及薯條（＄30） 成個po既重點嚟喇！平時我都好少打開個包，唔知點解今日手㾗打開咗佢，然後我無言了 唔知係咪因為個軟殻蟹burger冇用到竹炭麵包，所以佢整返個竹炭牛肉畀我補返數。佢竟然可以黑過黑色月亮你可能會問點解燶食咁都唔叫佢換過，因為我已經得返15分鐘食，再叫佢整過嘅話，我應該要留返tea time食。切走啲燶咗嘅位嗰陣，發現嚿漢堡扒都幾juicy，入面仲出晒煙。成個包食落都okay嘅，但嚿牛肉燶到咁，真係扣晒印象分。公道啲講句，如果個唔係燶到成嚿竹炭牛肉咁，整體個包都唔錯。 講吓成個set，佢啲薯條炸得唔夠，出面仲係白雪雪，入面又未炸透。如果炸多陣，應該會好好多。另外，Menu寫住話會跟沙律，但點知嚟到嘅時候，所謂嘅沙律只係一塊加咗沙律醋嘅生菜。唔係講笑，佢真係得一塊生菜，係一塊咁大把。 小編真係好後悔唔聽人講，堅持要嚟試。group mate都講過呢度啲意粉麻麻哋，但小編對小本經營嘅舖有情意結，所以嚟試下。 總括嚟講，真係伏到喊。嘢食同衛生都麻麻哋，食物等候時間都頗長，最慘係啲侍應又唔夠醒目，唔識安撫下啲客人。除非大家想試吓中伏，如果唔係大家唔洗嚟食。不過，根據小編嘅觀察，可能啱啱開舖又未做過飲食業所以運作上有啲問題。如果佢睇到呢個blog，希望佢哋會改善下啦。 店名：Browny No.45 地址：大角咀海庭道8號富榮花園地下45號舖 電話號碼：68971179 推介：★ ☆ ☆ ☆ ☆ 價錢：★ ☆ ☆ ☆ ☆ 視覺享受：★ ★ ★ ☆ ☆ 口感：★ ★ ★ ☆ ☆ 環境：★ ★ ★ ★ ☆ 等候時間：★ ☆ ☆ ☆ ☆ by六號小編thy
