入黎睇下我哋個Blog嘅介紹啦~! >HamBlogger< 適逢Mid-term同Assignment嘅季節，小編每日做功課都做到身心俱疲，難得可以忙裡偷閒，梗係要食返啲好西安撫下自己勞累嘅心靈啦！但攰到核爆又唔想出旺角食同人逼，小編見大角咀近近地，就決定行過去覓食。 眾裏尋「包」千百度，驀然回首，那「包」卻在燈火闌珊處。小編行行下一個回頭，發現左間完全係同條街有好大對比嘅舖頭，仲要係有Burger食！之後小編就即刻諗都唔諗就揀左食呢間！ 一入舖頭就發現原來餐廳係小店嚟，大概只有18-20個位左右。牆上嘅掛飾幾特別，啲放裝飾嘅架係模仿行李篋而製成，上面放著一啲盆栽。餐廳個music playlist仲幾正，有周杰倫呀、張敬軒呀、張惠妹呀、Eason呀等等，令小編最出奇嘅係連M2M都有！呢個真係小編嘅兒時回憶嚟，估唔到係呢度會聽到！柔和嘅燈光加上呢個playlist，個環境都幾唔錯。 拎起個menu，發現呢度嘅Burger都係選用全麥嘅包，聽落幾健康！有個特色嘅包就係比得包，小編其實都幾想試！但奈何想食炸魚，最後都冇試到比得包… 除左啲小食呀Burger呀特飲呀拼盤呀沙律呀之外，原來呢度仲有到會嘅Menu同埋小朋友Menu，小編覺得幾貼心，因為唔多地方有呢啲餐提供。 炸魚全麥漢堡配脆薯條及田園沙律 $108 咁小編最後係叫左個炸魚全麥漢堡配脆薯條及田園沙律餐，加多杯蘋果汁。首先登場嘅係蘋果汁，呢個蘋果汁係一般超市買到嗰隻，冇乜特別。 跟著出場嘅係田園沙律，啲菜幾新鮮，冇乜特別，配埋個黑醋幾好食。 再跟住出場嘅係薯條，呢個薯條就真係值得深入咁講下，因為真係冇諗過咁好食。薯條嘅口感係有啲似老麥個脆薯王，真係炸到金黃色好脆好好味，個皮係完全唔似平時外面食開嘅薯條，加上薯條係粗切，份量又唔少，食落好滿意！薯條配兩種醬，分別係茄汁同他他醬，呢兩個醬就冇乜特別。題外話小編幾鐘意佢呢個放薯條嘅架，得意之餘睇落去好似營火咁，唔知係唔係特登嘅呢？ 最後出場嘅係個魚柳bell，材料有青瓜、蕃茄、生菜、炸魚柳、芝士、他他醬同埋麥包。個包真係好大個，一拎開中間支鐵針就好易成個包散哂，食落其實都幾狼狽。除左個包大，塊魚都大得好緊要，如果只論個飽肚感而言的話，個人認為個餐都算係值嘅。可惜塊魚炸得過左龍少少，有少少乾身，食落個口感扣哂分。個他他醬其實幾好食亦都幾開胃，但可惜太稀，小編食唔夠一半，啲醬就已經流哂出嚟，加上個包好大，食落真係極狼狽，用刀叉切都有難度，因為個麥包唔易切得開。小編越食越無奈，最後唯有由上而下分層食，咁先食得比較整潔啲。 總括嚟講，一個人食一個餐真係好飽，其實可以兩個人Share嚟食都得。另外食物質素方面，雖然個薯條真係好好食，但個包就可圈可點。環境佈置，員工態度都非常非常之好，尤其係老闆娘（應該係）嘅態度好友善，最後仲有傾有講，寒暄咗幾句，好有人情味！小編應該會再返去食，不過下次應該會試下其他嘢，呢度啲拼盤同花茶都好似幾正咁！ 店名：Corner32 角落三二 地址：大角咀大全街13號大同新邨大有樓地下A號舖（奧運站C4出口） 推介：★ ★ ★ ☆ ☆ 價錢：★ ★ ★ ☆ ☆ 視覺享受：★ ★ ★ ★ ☆ 口感：★ ☆ ☆ ☆ ☆ 環境：★ ★ ★ ★ ☆ 等候時間：★ ★ ★ ★ ☆ 五號小編馬丁撰寫
