入黎睇下我哋個Blog嘅介紹啦~! >HamBlogger< 收左工想同朋友食下嘢飲下嘢傾下計，除左去尖沙咀呀，銅鑼灣之外，有冇去過灣仔酒吧街度搵食呢？喂喂喂…唔好誤會小編嘅意思，其實今次係想介紹下，係酒吧街有一間好有異國風情嘅漢堡包店！等小編話你知呢度有咩好食啦！ 今次要介紹嘅係一間主打漢堡嘅酒吧叫【Burger Joys】，個日小編同朋友 6:30 去到未有枱住，等左一陣間，就有人埋單走，所以好快就有得入去坐，等待時間只需5分鐘。店內裝修好特別！地下係階磚pattern。圓型bar枱開放式廚房，好有美國feel! 座位係高枱同高櫈，坐得耐可能會少少唔舒服，不過無阻大家happyhour嘅心情！ 除左有漢堡食之外都有其他小食揀，而飲品多到都佔左menu一半（包括酒精類）。漢堡款式就得6款，其中一個Mushroom cheese Burger 係素漢堡都好吸引呀，小編後悔冇叫到呢個漢堡，睇埋落去你哋就知點解… 小編今次又係同朋友一齊去試呢間漢堡，上次我哋係【Beef & Liberty】按此 受到Rocky 嘅熱情款待，嚟到【Burger Joys】就冇Rocky啦，不過坐左無耐，都好快有個店員好nice咁嚟問我哋食啲咩。我哋最後叫左一個 Cheese Burger $108, Signature Double Cheese Burger $138, Classic Buffalo Wings $88, Black Truffle Fries $58 同 一杯 Oreo Cream Milk Shake $58。 店員都有同反我哋講幫我哋轉做Combo跟餐叫，會平好多，因為我哋咁岩有漢堡又有薯條又叫左野飲，Combo可以其中一個漢堡＋$30有薯條再＋$30有Milk shake為一個餐，各平＄28 ，總共平左$56 ！係$56呀！多彩有店員提醒！（小編發現同呢個朋友食親飯都遇到好nice嘅店員科科） 唔洗十分鐘，我哋杯OreoCream高速送到喇！不過留埋我哋主角漢堡到左先一次過試先！不過影左幾張相之後，我哋個包都到喇！仲同埋黑松露薯條一齊上！ ↓【Signature Double Cheese Burger $138】↓ 小編做過research，知道【Burger Joys】嘅漢堡包面係用法式Brioche包，小編認為個包面好出色，完全符合到小編要夾扁個漢堡嚟食嘅原則，好軟熟。而牛肉係揀左美國牛肩胛肉，仲會用自已特製嘅紅酒牛油去煎牛肉，熱辣辣咁咬落去都仲係好冧，見入面有少少紅但唔會出血，應該都8 9成熟，再連埋溶曬落牛肉嘅芝士，兩層入面都有芝士痴住，好芝味得嚟唔會太乾！值得一試！（雖然芝士遮著左但小編見到牛肉有煎到有少少黑但唔係燶嘅但會影響觀感嘛。）【Signature Double Cheese】入面仲有好大塊生菜同番茄同洋蔥，仲有酸瓜，中意魚柳bell走醬人請注意！！！！！！！！小編朋友一食到就挑左出嚟 (facepalm)。 ↓【Cheese Burger $108 】↓ 呢個【Cheese Burger 】就是小編點解後悔冇叫到【Mushroom cheese Burger 】嘅原因…因為佢同岩岩上而講嘅【Signature Double Cheese】沒有分別！只係少了一塊肉，仲要【Cheese Burger】嘅 Cheese仲少過double，小編同朋友都有點失望，早知叫個試個素漢堡試嘛嗚…睇左芝士又係溶曬落牛肉上原諒自己同【Burger Joys】。 對比圖比大家睇下： 味道上沒有分別，不過唔中意食太厚肉的朋友可以叫呢個【Cheese Burger 】，都已經好夠食！小編下次去一定要試【Mushroom cheese Burger 】！ ↓【Oreo Cream Milk Shake $58】（combo計 $30）↓ 食下個包又飲下我哋叫個杯【Oreo Cream Milk Shake】潤下，香滑得嚟十分之creamy，仲飲到粒粒曲奇碎！好好味好好飲！ ↓【Black Truffle Fries $58 】（combo計 $30）↓ 【Black Truffle Fries】超多黑松露！！！條條薯條都有黑松露，好多其他店就咁灑喺上面咁，黑松露份量好多，薯條份量又多仲要好脆好脆好脆！嗚呀好感動，真係好抵呀呢個，必點！ ↓【Classic Buffalo Wings $88】↓ 【Classic Buffalo Wings】遲上，一試嘅時候小編同朋友都自覺叫錯左雞翼款式，水牛城雞翼個種酸味唔係岩我哋口味。值得一讚嘅係即使啲醬汁咁厚，咬落去仲係脆口！辣得嚟又帶酸，不過都幾辣，中意酸辣口味嘅朋友可以試！同埋$88 得6隻雞翼… 後記： 小編同朋友叫啲嘢食多到，明明隔離兩個同我哋同時入座，但人地食完個包就走左，但我哋碟雞翼先岩岩到，好大對比哈哈！我哋兩個成枱都係嘢食，點解可以咁大食（facepalm）。香港人有時真係要放慢下生活節奏，可以坐係度慢慢嘆，慢慢食，享受下放工之後嘅happyhour。 店名：Burger Joys 地址：灣仔駱克道42-50號君悅居地下E舖 推介：★ ★ ★ ☆ ☆ 價錢：★ ★ ★ ☆ ☆ 視覺享受：★ ★ ★ ☆ ☆ 口感：★ ★ ★ ☆ ☆ 環境：★ ★ ★ ☆ ☆ 等候時間：★ ★ ★ ★ ☆ 一號小編迷你Min撰寫
