入黎睇下我哋個Blog嘅介紹啦~! >HamBlogger< 想靜靜哋同朋友食餐飯，又唔想去旺角嗰啲多人到喊嘅café，但又唔知去邊度好？就等小編帶你去間僻靜啲嘅上環隱世café【Oldish】，試下佢個好出名嘅靚靚邪惡爆芝burger啦～ 條街得佢一間舖開咗，夠晒隱世喇啩～(p.s.一條殺死人嘅奪命暗斜) 呢間係一間英式嘅餐廳，舖頭入面嘅裝修、擺設都襯到一絕，盲嘅都知係英倫風～除咗環境好襯，就連歌都係播英國國手嘅歌，超有心思去塑造舖頭嘅形象！ 連menu都睇得出英倫嘅設計，簡直係冇得輸～ Caesar Salad with Smoked Salmon ($118) 碟沙律超大碟，唔係講笑，真係成座山咁高。$118一個沙律聽落好似有啲貴，但一食就覺得佢真係物超所值。有啲舖頭會求奇放啲沙律醬喺面就算，但呢度製作超認真，啖啖食落去都有好濃嘅芝士味。呢度自家製嘅醬食落好醒胃，一啲都唔漏，絕對唔係平時食開嘅沙律醬味～平時可能得兩至三塊煙三文魚，但呢度有六塊，仲要塊塊都好大塊 Four Cheese Wagyu Beef Burger ($178) 主角出場喇～個賣相好正。黃色嗰塊係打邊爐食嘅響鈴？錯！錯！錯！佢係芝士，係炸到脆扑扑嘅芝士，好似薯片咁。食落去，有勁濃嘅芝士味，好似一嚿芝士放落口咁嘅款～雖然佢唔係嗰隻邪惡拉芝，但食完個包之後，講返句：「身體流住嘅唔係血，係芝士」，小編都覺得一啲都唔誇張。呢度用嘅包同出面食到嘅漢堡包唔同，呢度係用提子餐包，夠晒㜺（音：盞）鬼。雖然食落冇乜提子味，但入面真係有一粒粒嘅提子乾。 切開個包就睇到嚿漢堡有幾厚，仲厚過個嚿包～嚿牛都幾重牛味，但如果落返多少少蒜鹽落去調味，就更perfect啦～嚿漢堡扒出面包住咗一層超香濃嘅芝士，勁「芝」味～佢嘅配料都好足料，三塊蕃茄疊住兩塊生菜，超fresh，真係食咗大量芝士都唔會覺得滯～另外，值得一讚嘅係，呢度啲包超「穩陣」，切開再搬去另一隻碟都冇散開 p.s.呢度好似一蘭拉麵咁，只有一款漢堡包供應，但就算得一款都夠晒殺食～ Sliced Chicken Spaghetti in Laksa Sauce ($148) 小編嘅朋友係一個雞肉愛好者，所以就叫咗呢個喇沙雞肉意粉試下喇。本身有擔心過用西式嘅方法煮喇沙可能會怪怪哋，但呢個喇沙煮意粉出奇地咁好食。個汁辣辣哋，有少少椰奶味，再加埋香茅落去煮，超級惹味。中西合璧嘅完美示範 雖然呢度係open kitchen，但煮嘢嗰陣完全冇油煙味，值得一讚。另外，個廚師見我哋差唔多食晒碟沙律，先開始煮個main course，成件事好貼心之餘，仲保證到啲食物新鮮滾熱辣送上。 總括嚟講，食物好高質，雖然定價偏高，但算係物有所值。舖頭入面嘅擺設，設計，都已經值回票價。舖頭位置太「隱世」，地鐵站行過嚟大約8－10分鐘左右。呢度除咗收費貴咗少少同位置遠咗少少之外，其他都真係冇咩嘢可以挑剔。btw小編好少回頭食同一間餐廳，呢間會係其中一間 鍾意食爆芝漢堡嘅你又點可以唔嚟試吓啊 店名：Oldish 地址：上環東街53號地舖 （上環A2出口，向荷里活道行8－10分鐘） 電話號碼：26973313 分店地址：觀塘⇒巧明街99號巧明工廠大廈5樓AB座 推介：★ ★ ★ ★ ☆ 價錢：★ ★ ☆ ☆ ☆ 視覺享受：★ ★ ★ ★ ☆ 口感：★ ★ ★ ★ ☆ 環境：★ ★ ★ ★ ★ 等候時間：★ ★ ★ ★ ☆ by六號小編thy
