入黎睇下我哋個Blog嘅介紹啦~! >HamBlogger< 小編今日上完早堂，就同同學去咗奧海城食飯。自從奧海城嘅大食代搬咗上去三樓之後，小編一直都未搵啱機會去食吓，反而去咗幾次取代大食代原來位置嘅MUJI。 小編對大食代本來都冇乜期待，反正都係頹食個快飯就返去上堂，點知見到間之前喺大食代從未見過，又唔似連鎖嘅食店！乍看之下，原來係食間主打Burger嘅食店，小編就膽粗粗咁試咗！ 相比起其他檔口，漢堡主意喺午飯時段嘅隊比隔離嘅短好多！ 間餐廳除咗有Burger之外，仲有意粉、All Day Breakfast、仲有林林總總嘅特色小食！ 提提大家，出示全日制學生證仲會有9折！ 小編最後叫咗個牙買加雞肉漢堡餐，再單點咗個洋蔥圈！ 牙買加雞肉漢堡餐（配薯條） $49 個Burger嘅材料好簡單：有蕃茄、生菜同埋塊大雞扒！ 未食個Burger之前，就已經聞到極濃烈嘅迷迭香味道。 距離遠少少本身都覺得冇乜嘢，但一近距離聞就覺得太勁，濃到喊！ 一打開見到啲迷迭香，個人認為真係落得多咗少少…… 食落最好食嘅……竟然係塊包！塊包軟熟得嚟又有牛油，幾好食！啲生菜同塊蕃茄就正常味道，冇乜特別。講返個主角先，嗰塊大到喊嘅雞扒，除咗大，都真係得個鹹字，加上極濃烈嘅迷迭香味道，個味道都真係幾重吓。雖然塊雞扒好嫩，但真心食起上嚟麻麻哋，啲生菜同蕃茄真係Fresh爆都救佢唔到……RIP雞扒。 另外補充返，塊雞扒都有少少油，但個人認為個油嘅程度接受到。 啲薯條係厚切嗰隻，食落同Burger King差唔多，幾脆但味道又偏淡，如果鹹少少會更好。 洋蔥圈 $22/8pcs 至於個洋蔥圈，炸粉比較厚，冇乜特別，坊間一般質素。 22蚊有8個，個人認為性價比唔算高。 總括而言，小編認為呢間Burger嘅水準好一般，有待改善。不過講句公道說話，落單嗰位收銀姐姐態度非常好，超有禮貌，亦都不厭其煩咁再三介紹咗幾個Burger畀小編，服務態度的確唔錯！但可惜啲嘢食就真係麻麻，雖然幾樣嘢加起嚟都只不過係$60，又只不過係大食代Food Court嘅食品，但個人認為性價比真係唔高，加上食物質素參差，呢間食店都真係呃……麻麻哋。 大家如果想試的話，試之前真係要諗清楚喇…… 推介： ★ ☆ ☆ ☆ ☆ 價錢： ★ ★ ☆ ☆ ☆ 視覺享受： ★ ★ ☆ ☆☆ 口感： ★ ★ ☆ ☆ ☆ 環境： ★ ★ ★ ☆ ☆（公道啲，大食代冇乜環境可言，近窗邊個景都OK嘅） 等候時間： ★ ★ ★ ★ ★ 店名: 漢堡主意 地址: 大角咀海庭道18號奧海城二期1樓大食代 營業時間:星期一至日 0800 – 2230 此食評係由5號小編馬丁撰寫
