入黎睇下我哋個Blog嘅介紹啦~! >HamBlogger< 如果講起漢堡，有一間喺紅磡嘅漢堡快餐店係唔可以唔提㗎！而且小編相信你係喺個頭返工返學嘅話，都一定會聽過佢個大名，甚至試過佢嘅漢堡！無錯喇，今次要介紹嘅就係紅磡【時新快餐店】！等小編再去試下呢間咁出名嘅快餐店，睇下水準有冇跌到，仲要畀其他未試過【時新】嘅你哋睇下有咩咁吸引啦！ 【時新快餐店】對於理工或者專上學院嘅學生，一定唔陌生。想當年小編asso就係紅磡灣嘅分校上堂，學校同【時新】嘅距離就只係一條天橋咁近，我啲朋友都成日話放飯要去食㗎。而小編對上一次食【時新快餐店】，已經係三年前同啲同學放lunchbreak個陣行去食，不過之後 chur project chur到癲咗，真係無時間，連行一條天橋去食都嫌遠。所以今次返去紅磡，小編真係一路行一路諗返起Asso兩年嚟同groupmate拼博嘅時光，好熱血呀！ 【時新】喺香港六七十年代已經係到喇！當時佢嘅漢堡包係充滿港式風味㗎，你睇下佢嘅枱枱櫈櫈，係好有懷舊feel，用橙色做主色，重點係好似保留返舊時嘅快餐店座位設計，啲櫈係固定係地下，同埋經營模式都同以前一樣，先去收銀機度落單畀錢，叫到你號碼再去攞餐，不過宜家都多數用顯示器話你知幾時取餐，【時新】都唔例外，不過佢會同時響起鈴聲，驚你miss咗。 小編個日買完行返埋位坐都冇一分鐘就有得攞嘢食啦！不過應該係因為個日12點幾，未有好多人嚟，所以先會咁快哈哈！（上面張相係小編到左之後五分鐘內，已經坐滿左。） 小編同朋友個日叫左一個【漢堡芝士蛋包】同【雙層漢堡芝士包】，因為我哋都唔洗飲野，所以冇跟餐叫。（跟餐叫漢堡款式會少啲選擇…） ↓【雙層漢堡芝士包】$22 ↓ ↓【漢堡芝士蛋包】$22 ↓ 【雙層漢堡芝士包】同【漢堡芝士蛋包】其實分別在於一個多一塊肉同一個有蛋。小編麻麻地煎蛋，所以我呢啲食肉獸，都係食返雙層啦！ 雙層漢堡嘅包面係【時新】係無可能放平到嫁（看上圖），知唔知點解？ 因為佢每一塊肉都係好厚，厚過小編之前同大家介紹嘅【樂心快餐店】按此 好多好多好多！試問兩塊厚肉疊埋一齊又點會合得埋個包呢？所以，係度食雙層漢堡要注意，可能會跌曬啲沙律醬同肉（呀小編之前食，試過跌左舊肉落枱面呀嗚嗚…）。 講起沙律醬，包入面會有【時新】特制嘅沙律醬，如果唔要，大家可以轉茄汁／咖喱汁／黑椒汁，但小編強烈建議如非必要唔洗轉！因為個沙律醬係精髓！帶點酸甜味，和肉排好夾！ 肉入面已經有埋洋蔥，唔多，唔食洋蔥嘅朋友可以選擇隻眼開隻眼閉（例如我哋hamblogger四號小編 ）。原來入面仲有紅蘿蔔碎，小編都係今次先發現咋！肉塊入面冇咩肥肉，同堆煎到啱啱好，又唔會太黑，入口都好稔，配合返特製沙律醬，個包一啲都唔乾，幾啖咁好快就食曬喇！ 哎呀，不過芝士味唔太出，可能因為放咗係底，未夠溶，小編認為可以試下喺芝士上面落啲特製沙律醬，可能口感會仲正啲添！ 如果去紅磡嘅又未試過【時新】嘅朋友仔就快啲食啦！比起小編第一次去佢都加左少少價，但都唔過$25！真係好抵食！快啲去試下呢個港式漢堡啦！ 店名：時新快餐店 地址：紅磡黃埔街1A地下 推介：★ ★ ★ ★ ☆ 價錢：★ ★ ★ ★ ★ 視覺享受：★ ★ ★ ☆ ☆ 口感：★ ★ ★ ★ ☆ 環境：★ ★ ★ ☆ ☆ 等候時間：★ ★ ★ ★ ☆ like埋我哋fb page lah :)—- fb.me/hambloggerinhk By一號小編迷你Min
