入黎睇下我哋個Blog嘅介紹啦~! >HamBlogger< 星期日出街唔想同人逼？但又唔想放假都留喺屋企？小編帶你去呢間有得玩、有得食、仲有得飲嘅beeger啦！真係一次過滿足晒你三個願望㗎～ 喺門口就已經見到有幾個外國人喺度玩緊枱波同埋掟緊標，唔講真係以為自己去咗外國。另外，舖頭門口有張枱，有兩個就攞住杯酒，坐喺到望住個大海，摸住酒杯底談心。個感覺真係超寫意～ 小編同朋友啱啱因為太肚餓，連menu都係睇咗兩眼，就叫咗職員嚟落單。嗰staff超好人，同我哋講其實佢哋有個二人餐㗎，叫二人餐會抵過我哋散叫。二人餐包兩個＄98蚊留下嘅漢堡包（p.s.如果個包低過＄98可以加extra toppings，補返差額），另外跟餐有薯條、一款小食，同埋兩杯飲品。呢度啲包最平＄78，最貴＄158，價錢適中。呢度有樣嘢值得一讚，佢有素包選擇，所以約素食者嚟happy hour都冇問題。 p.s. 另收加一服務費。 嘢食叫咗大約10分鐘，就陸續上枱。 椒鹽炸魷魚（＄68） 炸得好香口，個味道都幾正，但略嫌太油膩。建議大家食嗰陣，配埋啲伴碟嘅沙律菜食，咁樣食落去fresh啲，冇咁油膩。 主角—burger到喇～呢度嘅環境同擺設都好有心思，連托盤都印咗間舖嗰名。 流心芝士手打美國安格斯牛肉漢堡（＄108） 呢個漢堡個名就夠晒邪惡，但食落去就，完美解釋咗名不副實呢個詞語。如果你係牛魔王嘅，應該會好失望。因為嚿安格斯牛肉嘅調味好失敗，又或者嚿牛可能係唔咁新鮮，所以廚師落咗大量黑椒去處理佢，搶晒原本牛應該有嘅味，搞到牛冇牛味。同埋個餡偏細，要咬兩啖先食到嚿肉。 切開個包嗰陣，都叫做有少少流心嘅芝士，真係勉強叫做係有少少。 唔知係咪因為隻芝士味唔濃，又唔係拉芝，所以食個包嗰陣，佢嘅存在感好低。以一個收$108嘅包嚟講，個包真係好劣絕對唔建議大家一試。 珍寶蘑菇奄列漢堡配黑松露忌廉醬（＄88） 呢個配搭係小編嘅至愛，食呢個包就好似食緊黑松露雜箘risotto咁。為咗補返個差價，呢個包另外加咗煙肉落去，所以你見到嗰個包唔係原先menu入面嗰個素包。一望就知用料好足，啲材料全部都係厚切。平時食漢堡包，好少見人用奄列做個餡，但效果又出奇地夾！佢個奄列係加咗黑松露落去，感覺特別矜貴。可惜嘅係，唔知係咪因為黑松露來貨貴，所以黑松露落得唔算多，味道偏淡。個珍寶蘑菇真係好好好正～好厚身而且菇味好重！ 如果個包可以配返個忌廉醬就perfect喇。 p.s.小編覺得配蕃茄同煙肉個味唔係好夾，所以將佢分開咗嚟食。 btw呢度嘅包唔知點解好易散晒，所以食嘅時候要小心啲。小編嘅朋友就將佢分屍，一層層咁食。咁啱得咁橋，發現咗個面頭嘅包係甜㗎，真係甜。不過，佢唔係好古怪嘅甜，唔係嗰隻落糖嘅甜，但小編嘅筆墨暫時未有合適嘅字去形容，所以留返畀大家自己去試 每個包佢都有跟沙律，我覺得幾貼心～而且個沙律絕對唔馬虎。佢唔係求其將啲菜加沙律醬就算，而係用黑椒同鹽去調味，成件事加晒分。 朋友約嚟beeger食嗰陣，小編心諗：beeger 唔通係bee＋burger 去到就發現原來係beer＋burger 呢度有生啤、手工啤、白酒、紅酒、cocktail（含酒精嘅雞尾酒）、 mocktail（不含酒精嘅雞尾酒）。呢度仲有secret menu，即係要你問職員先有。總之，總有一款你心水啦！唔飲酒嘅都唔洗驚冇嘢飲，呢度都有提供咖啡、茶同汽水嘅選擇。但嚟到呢度冇理由唔入鄉隨俗㗎嘛，係咪先 前：Brown (Vodka + Baileys + Milk + Cookie Ice-cream) （＄88）； 後：Purple(Vodka + Strawberry + Liqueur + Blue Curacao + White Grape Juice) （＄78） 大家唔知有冇留意到啱啱側邊有兩杯嘢飲呢？小編推介所有夠18歲嘅女仔飲呢杯望落粉粉地色嘅brown。因為佢用Baileys（朱古力咖啡奶酒）做base個味同朱古力味奶昔冇乜分別，真係一啲酒味都冇。但係後面嗰杯，唔試都罷，個味冇乜特別。 p.s. 小編嘅真正身份，其實係酒鬼 總括嚟講，呢度係食裝修同氣氛嘅，食物質素一般般。位置嚟講都算係幾方便，地鐵站行大概5分鐘就到。喺西環海旁嚟講，價錢都尚算合理。如果唔係專程嚟食嘢嘅，都不妨約埋三五知己嚟呢度happy hour！ 店名：Beeger 地址：西環堅尼地城新海傍街25號嘉富大廈地下5號舖 （堅尼地城C出口，向海方向行4-5分鐘） 電話號碼：28122328 推介：★ ★ ☆ ☆ ☆ 價錢：★ ★ ★ ☆ ☆ 視覺享受：★ ★ ★ ☆ ☆ 口感：★ ★ ★ ☆ ☆ 環境：★ ★ ★ ★ ★ 等候時間：★ ★ ★ ★ ☆ by六號小編thy
