入黎睇下我哋個Blog嘅介紹啦~! >HamBlogger< 話說，小編同同學落左堂之後就去左學校附近嘅Burgerman為大家試新嘅Burger！ Burgerman位於大角咀呢個舊社區，由奧運地鐵站行過去都只係7分鐘左右，非常方便！ 大角咀以前係一個舊社區，好多舊式樓宇同埋商業大廈，個感覺就好似去左元朗咁，路邊好多店舖，加上金舖同藥房嘅數量暫時唔多，所以好有「舊香港」嘅感覺。 今次小編同同學係大概1點左右去，由於去大角咀食晏嘅人唔多（好多人會去奧海城），所以唔洗等位就搵到位坐。加上，成條埃華街都好多食店，例如韓式食店﹑泰式食店同埋甜品舖等等，分散左啲客人！（食完Burger仲可以同朋友食下一場添！） 不過喺講Burger之前就先講講間舖嘅環境啦！ 轉入埃華街一路直行差唔多到尾就會見到Burgerman。入面全部都係高凳，所以坐坐下會覺得有啲攰，加上冇位擺袋，要hold住個袋都要有啲特別既技巧。 我地揀左最入面個個位坐。牆上面有好多關於Burgerman嘅報導，仲有店主推介嘅Burger，牆上面仲有好多個親筆簽名！證明Burgerman口卑非常好！ 店內一直播住billboard級嘅歌，鐘意聽英文歌嘅人肯定每一首都聽過，例如One Direction嘅Story of My Life﹑Sia嘅Chandelier﹑Avicii嘅Wake Me Up 等等，真係會一路食一路跟住唱！ 但係舖位有啲細，坐到咁入隔一陣就會覺得有啲熱同焗，所以大家可以揀靠門口既位坐。 Burger嘅相同實物都好相符，個Burger「出爐」嘅時候冇令人失望～ 另外，店員都好好禮貌，會有耐心解答我嘅疑問（小編不停問佢有冇洋蔥……）。 黎到漢堡環節啦啦啦啦啦！！！！！！ 今次小編就同同學試咗「特式燒大菇漢堡」&「鵝肝和牛漢堡」，另外仲加錢升級左做combo餐，啲薯格超級好食！ 價錢合理，性價比高，而且款式算多，客人有好多款可以揀，而且仲時不時有新款，例如Fries with Bolognese（香腸配薯條）。 特式燒大菇漢堡 $58 以菇做餡嘅包已經愈黎愈流行，所以今次小編同同學就黎試下呢個超好味嘅「特式燒大菇漢堡」！ （大菇：即本菇，Portebello） 首先講下個麵包：麵包面有黑芝麻同埋白芝麻，食落口有啲炒過嘅味道。 正中間就係同個包一樣大細嘅本菇，本菇中間兜住左啲洋蔥同埋磨菇絲，上面就用一塊車打芝士蓋住咗。本菇係以香蒜燒，所以本菇索曬蒜蓉浸味！一咬個本菇…… 「嘩！！！！」…… 啲汁標曬出黎，蒜蓉味好正！呢舊本菇真係必食！！！ 另外，小編同學唧左茄汁（Ketchup mayonnaise sauce）同埋乳脂辣醬（Creamy hot chili sauce）去個Burger到，酸酸地，辣辣地，好好食！ 鵝肝和牛漢堡 $130 黎到呢個最貴嘅鵝肝和牛漢堡啦～ 因為鵝肝嘅關係，所以呢個漢堡好油，未用力夾落去，啲油就已經「靶靶」聲咁流出黎。但係鵝肝煎到外脆內軟，口感好豐富。 之後係塊和牛！塊和牛比芝士完完全全咁包住左，和牛都好juicy。 另外，個Burger淋左無花果黑醋汁，加上鵝肝油，所以個Burger味道好豐富，全部味道加起曬上黎都好夾，小編認為唔洗加落佢提供既醬都已經好好味，好夠味。 最後係啲菜。雖然個Burger已經充滿左無花果黑醋汁同埋鵝肝油，但係就蓋唔到啲菜既苦澀味同埋草青味，呢個係美中不足嘅一點。 （小提示：如果唔想食呢個咁貴，但係想試塊和牛，可以升級做combo餐，加$38就可以試到和牛嫁啦！） 薯格+汽水 $20 小編同同學另外就加錢升級左做Combo餐，加左個薯格食同埋罐汽水飲。個薯格好好食，佢啲辣粉啱啱好，唔會太多，所以唔會太咸；又唔會太少，唔會搞到佢冇味。 （小編建議可以2個人share一個combo餐，雖然飲品未必夠2份飲，但係個薯格既份量就非常之多，足夠2個人食。） 店主非常之貼心！有提供手套比客人使用，食嘅時候唔洗整污糟對手～ Burgerman仲有2016年最優秀西餐廳嘅得主！！ 大家不妨去食Burgerman，喺咁多間Burger店中，呢間喺小編心目中係最高分！除左Burger同埋薯格之外，仲有意粉食，大家可以去試食～ 然後留言話比我地知都得嫁～！ （溫馨小提示：和牛要趁熱食呀～ 因為凍左之後肉質會變得好韌！） 另外，由於大角咀非常近奧海城，所以大角咀已經成為企業家眼中嘅「囊中物」。隨住區內酒店業嘅發展，區內已經興建左幾棟酒店，相信未來會愈黎愈多商業化既業務會喺大角咀發展。大角咀嘅未來，相信大家可以預見，希望大家可以趁佢未被發展成商業社區之前可以爭取時間，去呢到感受下「舊香港」。 推介： ★ ★ ★ ★ ★ 價錢： ★ ★ ★ ★ ☆ 視覺享受： ★ ★ ★ ★ ☆ 口感： ★ ★ ★ ★ ☆ 環境： ★ ★ ★ ☆ ☆ 等候時間： ★ ★ ★ ★ ★ 店名：Burgerman (Burgerman | Facebook ; Burgerman | Instagram) 地址：深水埗欽州街65-71號地下（港鐵深水埗站 D2 出口） 大角咀埃華街95-97號地下（港鐵奧運站 A1 出口） 營業時間：星期一至日：11:00-22:00 BY 4號小編 CER
