入黎睇下我哋個Blog嘅介紹啦~! >HamBlogger< 唔知大家知唔知道旺角中心開咗美食區呢？小編知道好耐喇，但一直都唔得閒去行吓。於是今次特登約埋班好姊妹去旺中掃街，去睇下有咩好嘢食，順便仲可以shopping添! 行到去美食區入口就聞到陣好香嘅味，梗係即刻嗱嗱聲行入去睇下有乜好食啦。咦？依間鋪同隔離比，佢啲裝潢係特別靚，啲香味原來仲要喺呢間鋪頭【the Beef & Leaf】傳出嚟架。唔講咁多喇，即刻等3號小編帶大家一齊發掘係咩嘢咁香啦! 咦？點解個包咁奇怪，係白色嘅？原來呢度嘅漢堡係用饅頭嚟做材料，好有Gimick啊！但係…當中式包遇上西式漢堡，會唔會一啲都唔夾㗎。一陣火星撞地球咁咪弊傢伙? 啱啱一路聞到嘅香味原來係因為店員係到煎緊牛扒，即刻問吓有乜好介紹先! 【the Beef & Leaf】嘅職員好熱心，逐樣解釋啲包同飲品係咩嚟。落完order之後，八掛嘅我地梗係周圍望下啦。枱頭擺咗張介紹紙，唔睇都唔知原來呢度係由趙勁皓同陳柏宇開㗎，呢到仲唔係「星」級小店賣「星」級漢堡？唔知啲包會唔會特別高水準、特別好味呢？好期待啊! 等左5分鐘就有得食喇! 立即試下呢個中西合璧嘅饅頭漢堡先! 我地首先試咗牛葉拉絲雙重芝士饅頭 ($48)。睇落去個包唔大個，都好嘅，因為要留少少肚掃街嘛，但就唔可以當正餐喇。一咬落去，哇! 個饅頭好軟熟，個包同餡係意料之外地夾，饅頭索左啲肉汁之後唔會好似平時啲包咁變到林哂又爛哂。雙重芝士真係好正，佢哋係用左車打同水牛芝士，芝士份量好多，會食到成個嘴都有，咁先係嫁嘛! 點擊圖片放大 +2 睇返介紹話雙芝堡有拉絲效果，但我哋試嗰陣一條絲都無。 呢個牛葉流心半熟蛋饅頭($46)，佢隻流心蛋堅係流心，啲蛋汁不停流出嚟。牛肉漢堡同雙芝一樣好厚，有兩節手指咁闊，一食啲汁一路漏哂出嚟，唔小心真係會搞到成隻手都係! 唔是講笑! 平時食開都係KFC果種磨菇汁，所以對於磨菇汁真係無乜期待。【the Beef & Leaf】 嘅職員好熱情咁推介秘製野菌醬汁焗薯 ($28)畀我地，所以就點咗嚟試。一食真係驚為天人，秘製野菌醬汁勁香！有少少似係牛肝菌嗰種香味，真係好吸引! 我哋係咁一路食一路係咁話啲芝士好正，所以職員好好人係上面再加啲芝士，但其實就咁野菌醬汁已經好正嫁喇。 食到後期唔夠野菌汁，果到啲員工都肯幫我地再加! 汁入面仲有一片片完整菇菇㗎omg！ 食完唔多唔少都會覺得有啲口渴。 【the Beef & Leaf】嘅野飲好特別，唔似其他漢堡店咁淨係賣汽水，佢哋係賣3款自家制嘅特飲。 分別係薄荷青瓜青檸梳打($28)、山渣洛神花梳打($28)，仲有桂花薏米水($28)，仲有佢哋嘅梳打唔係普通梳打嚟㗎，係外國特製嘅梳打機即場打，唔知有冇咩唔同呢? 我地叫左薄荷青瓜青檸梳打(即牛葉三青)，青瓜同薄荷青檸嘅配搭都係第一次飲，感覺好清新，適合解膩。但係手打梳打就好似冇乜特別喇，飲落去唔係好夠氣。 另外薏米水帶桂花清香(即牛葉一白)，佢有凍同熱嘅選擇。我哋叫左杯熱嘅，入面有足料薏米，飲落即刻覺得自己白咗又靚咗，連水腫都冇埋添! 絕對係女性恩物! 【the Beef & Leaf】好細心，提供紙巾同牙籤，食到啲芝士成嘴都係都冇有怕啦! 試完雙芝饅頭同流心半熟蛋饅頭，覺得冇乜大分別，食落只覺前者多啲芝士，後者少啲。所以如果有朋友仔一齊去嘅話就最好只係叫其中一個再試其他味啦! 同埋記得記得記得，個野菌汁焗薯係必食!!!! Menu 推介： ★ ★ ★ ★ ☆ 價錢： ★ ★ ★ ★ ☆ 視覺享受： ★ ★ ★ ★ ☆ 口感： ★ ★ ★ ★ ☆ 環境： ★ ★ ★ ★ ☆ 等候時間： ★ ★ ★ ☆ ☆ 店名: the Beef & Leaf 地址: 旺角彌敦道688號旺角中心一期1樓F87A號舖 (港鐵旺角站 D2 出口) 葵涌葵富路7-11號葵涌廣場3樓3069號T23、T25號鋪 營業時間:星期一至日: 14:00-23:00 撰文: 三號小編—肥恩
