入黎睇下我哋個Blog嘅介紹啦~! >HamBlogger< 如果你煩緊同朋友去邊度食飯，不妨睇下我一號小編今次嘅介紹啦！今次我哋去一去灣仔搵食，睇下有冇啲正正漢堡先！今次要介紹係一間小編一入到去就仿如去左外國咁嘅【Beef & Liberty】。佢係一間主打漢堡嘅美式餐廳。 小編本身係google map見到離金鐘地鐵站F出口都好似有啲距離，但原來係穿過太古廣場，係隧道入面行，5分鐘就出到地面，就已經係永豐街啦。不過小編同朋友仲傻下傻下咁去搵餐廳入口，原來係PizzaExpress門口隔離，就有電梯上二樓，就係【Beef & Liberty】。 好彩小編個朋友醒目book定枱，上到去唔洗等位，當時7點30分度，小編發現都已經幾多人㗎啦，聽講呢度lunchtime仲爆場㗎！所以大家想嚟記得預約！ 我地一坐低，就有個好熱情嘅Rocky招待我哋，仲知我哋未齊人問我地要唔要杯水（好・大・杯） 佢仲同我哋講，有咩問題可以搵返佢。加分！加分！（小編個朋友好like佢㗎，所以都要提及下Rocky的服務，免收加一有咁既服務真係一級棒！） 小編同朋友都坐咗兩個鐘到，食咗以下幾樣： 首先梗係講下漢堡先！（如果冇記錯我哋都係叫咗mediumwell嘅牛肉） 【 Cheese 芝士漢堡】$116 漢堡包入面嘅牛肉餅係澳洲塔斯曼尼亞的無激素草飼牛肉製成㗎，聽個名就知唔試下真係對唔住自己。你睇下嚿牛幾厚身，仲要一啲都唔「鞋」！加埋Raclette芝士同焦糖洋蔥，醬汁酸酸甜甜都唔錯。不過就有少少單調，可以再多啲芝士科科。 【Bacon cheese 煙肉芝士漢堡】$132 呢個【煙肉芝士漢堡】入面嘅組合係同上面個【芝士漢堡】無分別，比多$16就多咗一個叫做威克斯莊園英國煙肉喺入面。個包係小編愛吃的軟包，係㩒得扁㗎！唔會太脆而影響口感！仲有，本身見到個Bacon好似好硬咁，咬個飽嗰陣有一刻預咗會咬唔斷條Bacon，然後好狼狽咁咇曬D汁出嚟。 結果，係冇。 因為Bacon好脆，一咬就斷，完全冇影響到小編食個包嘅口感，加上啲洋蔥汁，所有嘢啱啱好！ 【Black Pepper 黑椒香濃漢堡】$128 呢一個【黑椒香濃漢堡】吸引唔到小編（非生菜不吃），但吸引到小編朋友。佢入面嘅配搭都係同【芝士漢堡】一樣再加多黑胡椒同埋火箭菜。個包外貌就不太討好，不過菜嘅愛好者可以一試。個包嘅黑椒味要食左一排先岀味，未到很香濃的程度。 【The Notorious P.I.G 手撕豬肉漢堡】$98 呢一個【The Notorious P.I.G 手撕豬肉漢堡】連Rocky幫的哋落order個陣都要強調返係P，I，G。呢個包用威克斯莊園英國慢燉豬肩＋脆豬皮＋青蘋果菜絲沙律＋青蔥，呢幾樣做配搭。小編朋友直言話味道上好似食緊印度菜咁，不過都有脆豬皮增加口感又okay喎！另外入面有青蘋果沙律，好特別呀！ 【Monthly Special】$98 小編朋友叫咗個【Monthly Special】，係辣味慢煮烤雞腿＋檸檬香草＋中東芝麻醬芹菜絲沙律＋芥末嘅配搭，不過就唔推介比大家食喇。Special＝no special，小編同朋友一致認為純粹將雞肉同沙律加埋一齊，味道沒有驚喜喔！ 配菜方面，因為小編有朋友係蕃薯條愛好者，所以我哋就試下叫左佢個【蕃薯條Sweet Potato Fries】$35。佢有另配個秘製醬汁，小編點咗一下食，之後就冇再點過科科。（小編有留意到碟醬都好似冇乜點少過）仲有叫左【辣椒乳酪油炸物Chili Cheese Fries】$53，呢個就犀利喇，小編飽飽地依然想繼續食嘅薯條。佢係店入面嘅招牌【Liberty薯條】再加上牛肉辣椒，車打芝士，蔥，同酸忌廉。呢個小編真心覺得大家可以試下，條條薯條都好夠份量㗎！ 睇返menu，見到有一個系列既Milk shake 係冇Milk嘅，不過小編自問都真係Rocky杯水已經夠，下次再試下呢個冇牛奶嘅奶昔先！ 小編朋友因為遲嚟咗少少，miss左Rocky熱情款待嘅個杯水，食到口乾唯有叫兩杯【Iced peppermint tea】潤下。唔喜好薄荷味嘅朋友唔洗試，因為就會好似小編朋友講咁話有牙膏味（facepalm）。 *** 呀！仲有，其實Rocky係外國人嚟㗎！大家要有心理準備要用英文溝通喔！落單同覆單要小心，費事到時牛肉太生唔啱食呀嘛！ 留意返，想要幾成熟嘅牛肉可以選擇： medium rare 三成熟 medium 五成熟 medium well 七成熟 well done 全熟 （小編留意到仲有上面一層rooftop，大家可以去試下坐露天位睇下會唔會更加有氣氛科科。） 推介：★ ★ ★ ★ ☆ 價錢：★ ★ ☆ ☆ ☆ 視覺享受：★ ★ ★ ☆ ☆ 口感：★ ★ ★ ★ ☆ 環境：★ ★ ★ ★ ☆ 等候時間：★ ★ ★ ☆ ☆ 店名：Beef & Liberty 地址：灣仔永豐街23號2樓（港鐵金鐘站 F 出口, 步行約6分鐘） 營業時間: 星期一至四: 11:30-15:00; 18:00-22:30 星期五: 11:00-15:00; 18:00-23:00 星期六、日及公眾假期: 11:00-23:00 文章由一號小編Min呈獻比你
