入黎睇下我哋個Blog嘅介紹啦~! >HamBlogger< 落蘭桂坊唔知食咩好？小編帶你去食呢間獲得2016／17米芝蓮街頭小食嘅漢堡包啦～ 小編同朋友唔係太肚餓，所以就兩個人share一個包。小編係一個唔食海鮮會死嘅人所以本身諗住食魚柳包嘅，但小編嘅朋友見到隔離枱食緊嘅double happiness ($180)好吸引，堅持要食有牛肉嘅burger。喺最公平猜包剪揼嘅情況底下，小編唯有屈服。 呢度啲包最平＄100，最貴＄180，跟餐有薯條但唔包嘢飲。咁當然你可以根據自己嘅口味隨意加自己中意嘅配料同小食嘅。如果食個晏嚟講，價錢就偏貴。但係喺中環，食呢個獲得2016／17米芝蓮街頭小食嘅漢堡包，小編覺得算係幾抵，重點係早晚同價。 叫完嘢食就揾個位坐低，啲座位全部都係高腳櫈，所以坐得唔係太舒服，而且比較迫夾。但有個加分位，就係枱下面有啲勾仔比你勾住個袋，唔使拎住一袋二袋。呢度係open kitchen，可以望到個廚師點炮製你個包，聞到好香嘅煎牛肉味。可惜嘅係舖頭開咗窗，抽咗出去嘅油煙有少少攻返入去，搞到啲衫有一陣陣油煙味。 超正啊！！！係內軟外脆，有薯皮嘅薯條！ 等咗5分鐘到，就有得食。嘢食即叫即整，仲要係lunch hour，真係超有效率（手指公）個侍應一放低個包，小編即刻忍唔住連叉都唔用就徒手將啲薯條放入口。 漢堡包烘到變咗金黃色，一咬就跌到成枱都係麵包碎！ 烘到脆卜卜所以好易切得開，切完都唔變形，超鬆軟～ 小提示：牛肉都幾生，怕食生肉嘅你，可以叫佢整熟啲。 p.s. 牛肉係用澳洲穀飼牛，有質素保證，所以生少少都唔洗怕！ 最值得一讚嘅係個sauce，酸酸甜甜再加少少辣（類似加咗辣嘅千島醬），勁惹味！！！配料仲有溶晒嘅芝士，但芝士個味又唔會太over，恰到好處。另外，仲有香脆嘅煙肉同埋一咬落去爆汁嘅牛肉。總之，咬落去嘅口感超豐富（心心眼），大滿足！！！小編嘅朋友就覺得如果可以加返啲洋蔥，就更perfect喇！ p.s. 小編嘅朋友覺得如果可以加返啲新鮮洋蔥，層次就會更豐富！ 整體嚟講，呢個包值得再戰，Burger即叫即做，用料上盛。雖然價錢偏貴，但物有所值。個包望落雖然唔係好大個，但一人一個啱啱好。環境唔算太好，但勝在方便就腳。下次同朋友去開蘭桂坊Happy hour 嘅時候，可以去試下。 推介：★ ★ ★ ★ ☆ 價錢：★ ★ ☆ ☆ ☆ 視覺享受：★ ★ ★ ☆ ☆ 口感：★ ★ ★ ★ ☆ 環境：★ ★ ☆ ☆ ☆ 等候時間：★ ★ ★ ★ ★ 店名： The Butchers Club Burger 地址：中環士丹利街82號地舖（中環站D2出口，沿半山扶手電梯行就到） 電話號碼：2347 0777 （職員全部都係外國人，記住要講英文） 分店地址：灣仔⇒蘭杜街2號麗都大廈10號地舖 尖沙咀⇒河內道18號K11購物藝術館地下G34-35舖 鰂魚涌⇒華蘭路12號惠安苑地下 by六號小編thy
