入黎睇下我哋個Blog嘅介紹啦~! >HamBlogger< 旺角，就好似一個長方形咁，好多新舊樓宇、商店食肆林立，每次去旺角都會好多人，但係鬧市之中總會有寧靜嘅一角。今次小編就去左旺角寧靜的一角 – 煙廠街。 呢間舖就叫SNKRHOLIC，SNKR即係「sneaker」，而holic即係「沉醉於一件事物」，所以呢間舖嘅意思就係「沉醉於波鞋」。 未入到去就已經見到牆身有好多鞋盒，睇嚟店主一定好熱愛籃球、籃球鞋同埋籃球波衫。 牆身掛滿好多籃球鞋盒，而且牆身嵌入一部大電視，播住籃球比賽，等客人一路等野食一路睇比賽，亦都可以一路食Burger一路睇比賽。 （因為天花板比較難影，所以小編用左廣角鏡影，影出黎彎咗，非常抱歉！） 不得不介紹嘅就係個天花板。店主特意用光管整成一個籃球比賽場地，非常有特式，好有眼球衝擊！ 間舖唔大，大概坐到20-25人，分別有2張長枱，2張bar枱。啲凳係高凳，坐得唔係好舒服，加上冇位擺袋，唔係太方便。 呢間店淨係賣3款包，分別係Roman Burger，Pippen Burger，同埋Michael Burger。相信各位發燒友已經知道佢地係用咩黎命名 。\v/。！！ ◆冇錯啦！就係以Nike出嘅籃球鞋黎命名！◆ 當日，小編同朋友就食左其中2個漢堡，分別係Roman Burger同埋Pippen Burger，另外仲食左一個小食。 Roman Burger $108 呢個Burger個餡就有牛肉漢堡、洋蔥、蕃茄、煙肉、椰菜同埋芝芝芝芝芝芝芝芝士！ 個麵包唔係碳包，而係用黑麥黎整，個味道比起普通麵包更加好食。 另外，麵包表面灑左芝麻同辣椒粉，食落好惹味，鹹辣兼得，味道幾特別。 下一層係煙肉，煙肉包住左一堆煮到淋曬嘅洋蔥。個煙肉好脆，同個包非常夾，個口感唔錯。根據小編朋友嘅評語，啲洋蔥煮到淋曬，變咗做啡色，啲牛肉汁入曬味。 主角嚟啦！就係個牛肉漢堡！佢嘅大細就同手掌差唔多。呢個牛肉漢堡好Juicy，而且佢個面有層溶左嘅芝士。 最後係一塊普通嘅蕃茄同埋一塊普通嘅椰菜，另外再配上洋蔥汁，平平無奇。 （大家見唔見到「31」號呢？） 介紹完個包就介紹下啲伴碟。 個薯條十分好食，外脆內軟，加上佢有麵包上啲嗰啲咸辣粉，好惹味，令人係咁食。 食完個包同薯條，緊係食返啲fresh fresh菜啦！啲菜配有芝麻醬，非常好味，但係份量就太少，唔係好夠食。 Pippen Burger $98 （ 今次呢個係33號！） 至於呢個Burger個餡就有豬肉漢堡、煙肉、蕃茄、椰菜同埋芝芝芝芝芝芝芝芝士！2個包嘅分別就在於個漢堡！ （小編見佢冇寫有洋蔥就嗌左嚟食，點知……都係有洋蔥……小編奉勸各位唔食洋蔥嘅人記得嗌走洋蔥。） 2個包嘅不同之處就係塊肉。呢塊豬肉漢堡個口感差，質感怪怪der，口感就好似腸衣入面啲肉，食落去比人嘅感覺就好似係格硬攪爛佢，令到佢個樣好似牛肉漢堡咁。 小編都叫左一款小食試。 Sausage Platter $98 （呢個似乎圖片與實物不相乎……餐牌上幅圖同實物相差好遠，而且個醬唔係餐牌上嘅芥末醬） 呢款小食分別有2款腸，一款就普通「司華力腸」，同埋「捲捲腸」，再配上普通嘅茄汁。 司華力腸較普通，冇咩驚喜。至於捲捲腸就有視覺上嘅驚喜，佢係一層腸衣外皮注入豬肉，初頭幾啖都覺得幾特別，但係不停係咁食同一樣食物會感到好寡，好易膩。 最後，小編同朋友叫左3杯飲品，分別係Strawberry Mojito，Iced 同 Hot Citron Honey Tea。 Strawberry Mojito $68 士多啤梨汁配波蘿汁喺薄荷同埋青檸襯托下顯得好清新，加上少少Beer嘅味道，同包好夾。 Iced & Hot Citron Honey Tea $38 起初問店員，佢話呢個係柚子茶，但係飲落唔係平時柚子茶嘅味道，而係佛手柑，加上啲蜜糖係用純蜂蜜，唔係加工蜜糖，所以飲落去唔會「乸」喉。 一粒粒佛手柑好有咬感。 總結黎講，Burger選擇太少，而且唔值呢個價錢，一個包唔夠一個人嘅份量，要另外叫多一款小食先啱啱好，成餐每人賣單要大約160蚊左右。 但係熱愛籃球嘅讀者不妨去下，入面嘅裝修同埋擺設絕對係為籃球迷而設！！ 推介： ★ ★ ☆ ☆ ☆ 價錢： ★ ★ ☆ ☆ ☆ 視覺享受： ★ ★ ★ ☆ ☆ 口感： ★ ★ ★ ☆ ☆ 環境： ★ ★ ★ ★ ☆ 等候時間： ★ ★ ★ ★ ★ 店名：SNKRHOLIC 地址：旺角煙廠街31號地下 (港鐵油麻地站 A2 出口，穿過槍街(廣華街)行過對面) 電話號碼：23879828 營業時間：星期一至日：12:00 – 00:00 By 四號小編 CER
