入黎睇下我哋個Blog嘅介紹啦~! >HamBlogger< 係觀塘放咗工想平平地食個包，但又唔想食麥記咁悶? 東廣場入面嘅My Burger 應該啱哂你心水! 去到東廣場門口，大家會見到Mos Burger，但一場嚟到觀塘，小編梗係試新嘢啦! 行入少少，有好多特色小店，只要沿住左邊走廊行，就會見到我哋嘅主角My Burger㗎喇! 行到去門口嗰陣，已經見到門口有10幾個人等緊位。睇嚟 My Burger 好多人幫襯喎，唔知係咪真係咁好味呢？ 入面其實唔大，逼逼地坐到25-28個人左右。小編同朋友等左10分鐘左右，就有得入坐啦。 研究完餐牌，就先要喺付款處畀錢再落order，付款處略嫌狹窄，排隊畀錢會阻住員工送餐。但My Burger嘅員工服務態度好好，行過或送餐等都會「唔該前、唔該後」，唔會令你覺得唔耐煩。 叫完野食之後可以慢慢欣賞My Burger嘅裝潢，牆身掛滿咗靚靚掛畫! 可能係放工時間關係，小編同朋友等左4個字先有得食，而隔離兩枱顧客都有催餐嘅情況，如果讀者趕時間嘅話，建議唔好係7點鐘嚟。 肥恩 先講下第一個包先，小編同朋友叫咗個經典牛肉漢堡。賣相睇落去唔太好，醬同芝士都流哂出嚟，啲洋蔥飛哂出嚟。咬落去包身軟熟，可惜芝士味唔夠「芝」味，可以再落多少少芝士。相反，肉扒牛肉味重，無牛騷味，一咬肉汁流哂出嚟，嚿牛肉都有一節手指咁闊㗎! 但唔知點解，雖然塊肉扒多肉汁，但小編覺得肉質較嚡，無想象中咁好食，有少少失望！ 經典牛肉漢堡($49) 肥恩 第2個包係牙買加辣雞漢堡，個人認為賣相不吸引，啲沙律菜比人好求其咁放係上面，突哂出嚟，咬落去嘅時候咬唔到個包淨係咬到啲菜，好唔方便。白色嘅醬係牙買加香辣醬嚟嘅，醬汁好好味好夠辣，但會掩蓋左雞嘅味道。雞扒都幾大塊，而雞肉口感不失嫰滑，整體都唔錯! 小編一位鐘意食辣嘅朋友就喺咁話好食、好辣、好正，所以呢個包都係推介畀鐘意食辣嘅朋友！ 牙買加辣雞漢堡($49) 肥恩 炸軟殻蟹漢堡個人認為係最好食！雖然個包個賣相一樣唔太吸引，但軟殻蟹包喺意料之外地好食！！個軟殻蟹外脆內軟(係勁軟熟)，入面仲要有蟹膏添！配埋他他醬同沙律菜一啲都唔油膩，呢個價錢食到咁嘅質素真係喜出望外。呢次係小編第一次食軟殻蟹，睇嚟之後都要多啲試下唔同嘅軟殻蟹包。 炸軟殻蟹漢堡($78) 肥恩 小編同朋友仲將其中一個包轉套餐，包2隻雞翼同可樂雞翼汁似喺拿破侖醬加咗啲Tabasco，又有蕃茄酸味又有辣味，好開胃！ 雞翼2件+飲品套餐(+$22) 肥恩 Menu 肥恩 Drink Menu 食完漢堡包之後，小編同朋友就即刻走人，因為7點實在比較多人，食起上來唔算特別享受。所以提提大家，尤其係趕時間和希望慢慢享受嘅朋友，記得唔好7點嚟喇。總括嚟講，雖然My Burger 嘅包，外觀唔太吸引，但食落都幾好味，50蚊都算有番咁上下。雖然炸軟殻蟹漢堡比較貴(要成78蚊)，但3號小編都推薦大家食軟殻蟹包♥！其他味道就有待讀者自己發掘下啦! 臨走之前比我發現啲凳係油桶設計，好特別!! 推介： ★ ★ ★ ☆ ☆ 價錢： ★ ★ ★ ★ ☆ 視覺享受： ★ ☆ ☆ ☆ ☆ 口感： ★ ★ ★ ☆ ☆ 環境： ★ ★ ★ ★ ☆ 等候時間： ★ ★ ☆ ☆ ☆ 店名: My Burger 地址: 觀塘成業街7號東廣場地下 G12-13號鋪 (港鐵觀塘站 B2 出口，落橋直行一個街口轉左) 電話號碼: 6440 9790 營業時間:星期一至五: 08:30-21:00 星期六、日及公眾假期: 11:30-21:00 撰文: 三號小編—肥恩
