都係果句，約得一齊食飯可以話「生死之交」，今次又約左幾位好友齊齊「飯聚」。 雖然疫情嚴重，但出街食飯都難於避免，唯有挑選衛生情況較佳，又或者有私人廂房的餐廳。 Canton Pot 一向以火鍋主打，但隨著疫情影響，當然要變動求存，除了原有的火鍋外，近日更推出「健怡自選套餐」，4位（$1388）/兩位（$708）/每位（$368），但要留意細節，因為部份菜色可以兩位選一款，必要時，可以多點選擇。 未入餐廳，已經有自動噴灑消毒設備，確保衛生。 首先送上自製花茶一杯，但亦可以另點洛神花茶，甚至是羅漢果茶，款式不少。 阿根廷紅蝦刺身（每位一隻） 4位朋友啱啱好每人一隻，足4至5吋長，肉質甜美，蘸點一下芥末醬油，味道更鮮。 花膠燉響螺湯 其中一款是花膠燉響螺湯，湯色清澈，入口醇厚芳香，又有滋補功效，好正。 松茸竹笙黃耳素湯 另一款是素菜湯，清甜潤喉，的確是個不錯的選擇。 陳皮蒸鮮鮑魚 每位一隻，柔韌有嚼勁，不錯，如果鮑魚食得太多，亦可選擇蟶子、扇貝或象拔蚌仔，總之不會覺得單調。 蘿蔔炆美國牛肋骨 牛肋骨勁大條，但炆得好稔，一戳就骨肉分離，蘸點醬油來提鮮，又是一道佳餚，但略嫌部份蘿蔔未夠稔，美中不足。 荷葉杞子木耳蒸雞 雞件是早已褪骨，可以話啖啖肉，最啱在下此等懶人，甜度是來自杞子，加上爽脆的木耳，入口夾雜荷葉的清香，真係好啱用來送飯。 蔬菜類分別選了油鹽水浸皇帝菜及上湯蒜子浸娃娃菜，前者清新翠綠，口感爽脆，而後者煮得軟清甜，正好清清味蕾。 沖繩豬手（$168） 意猶未盡，即時追加一道風味獨特的豬手，豬皮炆得軟稔，骨膠原都跑出來，味道濃郁又邪惡，尤其是醬汁用來撈飯更是一流。 甜品有好幾款任挑選，各自點了芒果楊枝甘露水滴、焦糖燉蛋及木糠布甸，正好一班人分享。 地址 : 旺角廣東道1131號香港旺角薈賢居2樓 電話 : 39687888 59710088 ((Whatsapp)) 味道 : 4 環境 : 4 服務 : 5 衛生 : 4 抵食 : 4 位置 : 3 希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝! http://www.facebook.com/foodiephilip
