DAY 1 行程: 黃河路美食街 -> 人民公園 -> 南京路步行街 -> 上海姥姥 -> 外灘 -> 明珠塔外圍 承上篇，我地稍為填一填飽個肚之後就去返頭先地鐵出口附近既一個公園—人民公園。 我地黎呢到唔係純粹經過咁簡單嫁… 因為人民公園最出名既係… 相親角！！！！！ 聽講呢到經常都人頭湧湧，唔少人都會留低自己背景資料，從而希望可以係到物色到個岩自己心水既對象，仲有唔少家長為自己既仔女留資料嫁。 一場黎到，梗係要一探究竟啦，畢竟隊員入面都仲有兩位單身女士，點知會唔會一覺唔覺意比佢地識到個富二代丫，土豪嫁係咪先。 個公園都幾大嫁，我地行左一陣，發現搵唔到，問左好幾個伯伯都話唔知。 好彩沿路可以賞下花，D花都幾靚嫁。 後來我地問到個保安，原來相親角係星期六日先有嫁，就係咁樣錯過左佢啦。 唔緊要啦，好姻緣係要講緣份既，條件再好既對象但只淪為一紙婚姻既關係，都無意思啦係咪:) 我地係個公園都行左一陣，先出發去我地下一個目的地—南京路步行街。 南京路步行街可以話係上海最繁華既一條商店街黎嫁，除左街道上面有各式各樣既大型商場之外，周圍既歐陸式建築可以話同時都吸引左唔少純粹黎觀光既遊客，而我地就係其中之一啦。 其實我見到既第一反應係好想唱「情深深雨濛濛」… 上海真係一個將文物保育同現代商業文化完美結合既一個城市… 但點解香港呢個國際大都會偏偏就做唔到呢…（有D感慨TIM） 呢條步行街唔似其他國內城市既步行街咁分開左好多條支路，佢只有一條直路。 呢條路都唔短嫁，所以為左滿足純觀光既遊客，就有佢既出現啦。 觀光小列車！ 一程只係需要CNY$5，想來回？比多程車錢啦。 因為其中兩位隊員驚自己起唔到身搭飛機，所以琴晚唔敢訓太多，係呢個時候有得坐下休息下，都唔錯既。 成段路都搭成十至十五分鐘嫁，隊友們仲搭搭下訓著左… 平心而論呢架車都幾好搭既，而且搭得既都係遊客嫁啦，不過沿路就好多人派傳單，仲要係睇中架車經過既時候將D 傳單扔入黎... 由於時間尚早，我地無選擇搭返回程，反而係慢慢行返回頭路睇下有咩行。 行到一半，發現左一條好多野食既巷仔，梗係衝入去望望啦。 串燒…大包…各式美食應有盡有，頓時內心出現左一句說話：「咁先係美食街嫁嗎！」 其實我都唔係好知個飽叉係上面係有咩意思… 其實我地今次黎南京路步行街係有我地既目標既。 就係要一試呢一間連小S都激讚既CHEESE CAKE啦。 佢分左兩隻味，分別係抹茶同蜂蜜，價錢都只係CNY$25一個。 而我地今次就決定試佢既蜂蜜味，因為聽講蜂蜜味入面係流心嫁。 南京路分店座落於一間大商場既美食廣場入面，而我地去到既時候買既人都唔多。 雖然佢唔係新鮮出爐，但係都仲熱辣辣嫁！ 黎到重頭戲，就係砌開佢啦！ 一切開，就已經好清楚見到入面D流心蜂蜜，而最神奇既係砌開佢既時候D蜂蜜並無流晒出黎丫。 從來都無諗過芝士同蜂蜜隻味咁夾嫁，蛋糕都非常鬆軟，蜂蜜味偏重一D，芝士味較淡，但反而呢種清甜既味道仲能勾起人既味蕾丫。 食完蛋糕，繼續行下街，買左少少酥餅返香港做手信。 南京路步行街，就算唔買野，都值得黎一趟感受下呢鼓集文化同商業於一身既氣色啦！ GENKI!!! 元氣少女組 email: ami_ron@hotmail.com ig: genkigirlssss
