今天和老公行街，再一次被我見到他偷看其他女人。

那女人穿著吊帶背心和熱褲；相反地，我的T-shirt衣領過鎖骨，下身穿著窄身牛仔褲，非常侷促。

遇到這種情況，我很多時都會讓他知道我看到他看到甚麼，並大方地和他討論那個女有那裡好。

但我那聰明的老公當然知道我的「大方」有多危險；所以很多時他不會真的和我討論那些女人，反而會攬住我，並跟我說一些例如「全世界得老婆一個女人」的奉承說話。

不過今天的情況有點例外… 大概是因為我M到的關係，再加上翳焗的天氣，我沒有和他「討論」和開玩笑的耐性；我一逮住他偷看其他女人的一刻便發火了!

「平時其他男人望我又唔得，我著件衫條領低過鎖骨又唔得，咁點解你望其他女人又得？」我怒火中燒地說。

「妳係老婆，梗係唔可以俾人睇蝕…」他還以為我在扮嬲，賴皮地跟我說。

「咁你睇蝕人哋個老婆又得？」我嬲怒他講一套做一套。

他知道我這次動真火，立即默不作聲。

「好囉! 下次我都著吊帶熱褲，等我都俾人望吓囉!」我挑釁地說。

「妳咪試吓囉! 妳身材又唔係好，著吊帶都無人睇妳啦!」他反客為主。

我怒不可遏… 他根本是在人身攻擊!

「我身材咁差你又娶我？」我憤怒地說。

他知道他說了過火的話，於是最終他成為了先哄回我的一方。

大家平靜過後，我和他正式討論這個話題。

「妳細佬成日話，女朋友有料，怕咩俾其他人睇？」他跟我說。

我弟弟是一個渣男。

「但係佢唔怕自己女朋友俾人睇蝕晒咩？」我問。

「佢話自己女朋友又靚又有身材，俾愈多人望愈虛榮!」老公說。

我真不能相信我和弟弟出自同一條腸。

「咁佢咪即係當女朋友係名錶或者跑車咁，將另一個人當做自己嘅附屬品咁去炫耀？」我問。

「可以咁講… 不過，我唔會當自己老婆係物件，所以我唔鍾意妳俾人望蝕晒…」然後他便摟住我，說「老婆是全世界最好的」…

我當然不會因為他即興的甜言蜜語而忘記他偷看女人的事實。

「咁你下次都記得尊重其他女人，唔好眼甘甘咁望住人哋!」我對他諄諄教誨。

「知道，老婆! 放心，由於全世界得老婆一個女人，我下次除咗望妳，我望嘅其他人都唔係女人…我會催眠自己，當佢哋係著吊帶熱褲嘅麻甩佬!」他理直氣壯。

我立即一拳「鍋」在他的小腹，再用腳大力地跺在他的新波鞋上。

我要他記住望其他女人的後果是慘痛的。