晚上，我約了天兒在一間我們在中學時經常去的cafe見面。

那間cafe見證著我們剛入中學時的低能，考試時的忐忑，天兒的初戀，和我第一次暗戀人。

我比約定時間早到了，因為我很重視今次和天兒的談話。

等了一會兒，天兒到了。她穿得很樸素，也沒有化妝。

她的造型就如做了錯事的名人在記者招待會中道歉的造型一樣。

「天兒!」她坐下後，我跟她打招呼。

「對唔住呀，袁欣...」天兒快要哭了。

「唔駛對唔住，傻妹!」我反過來安慰她。

聽了我的話，她驚訝地抬頭望著我。

「其實我唔鍾意許賜逸。」我跟天兒坦言。

「乜妳唔係就快同許賜逸一齊咩?」她瞪大眼睛問我。

我搖搖頭，否定了她的話。

「我今日約妳出嚟就係想同妳講，妳唔需要避開我，因為我唔鍾意許賜逸，妳同佢做乜都同我無衝突。」我說。

「嗰晚之後，我發覺我真係鍾意咗許賜逸。」天兒向我坦承她對許賜逸的感覺。

「咁妳同許賜逸個表哥...」我突然醒起之前天兒為了他表哥喝得爛醉。

「我同嗰個男人完咗啦...」她淡然說。

我的眼眉向上揚。

「我知道咗原來佢有老婆，而後來佢都知道我同許賜逸發生咗乜事...」她無奈地說。

「其實宜家諗番，可能由Day 1開始我都係鍾意許賜逸... 不過我知佢好鍾意妳，而咁啱又俾我遇到佢表哥，於是我就將對佢嘅感情投放咗喺佢表哥度...」她續道。

「天兒，如果妳真係鍾意許賜逸就去馬啦! 我會全力支持妳!」我鼓勵她。

「其實... 我發現自己鍾意咗林子孺。」我亦鼓起勇氣向天兒坦白。

天兒表現得難以置信。

「我都好驚訝... 佢成日窒我，發我脾氣，但係突然間有一日我就發現自己鍾意咗佢...」我笑道。

「咁佢知唔知妳鍾意佢呀?」天兒興奮地問。

「我表現到好憎佢，因為我唔夠膽俾佢知道我鍾意佢... 更何況，佢已經有女朋友...」我苦笑道。

「吓??? 林子孺都有女朋友??? 佢嗰副尊容...」天兒衝口而出。

「天兒，妳唔好咁話佢啦...」我說。

「Sorry呀，袁欣... 但係佢都唔鍾意妳，妳駛乜幫住佢啫?」天兒說。

「妳唔駛提醒我佢唔鍾意我嘅... 我都知佢可能好憎我，不過我諗我哋都明白，鍾意一個人其實好被動。」我繼續苦笑。

她同意地點點頭。

「所以我好羨慕妳夠膽去approach許賜逸! 咁多年姐妹，我一定會支持妳!」我笑說。

我和天兒當晚冰釋前嫌，整晚的氣氛仿佛回到了我們讀中學的時候。

我真的很珍惜和天兒的友情。

***

那晚之後，天兒經常來公司找我。

我看得出許賜逸每次見到天兒都很尷尬; 其實他對著我也顯得很尷尬。

不過我和天兒現在都了解彼此的立場和想法，所以她有她去接近許賜逸，我有我和許賜逸做同事。

我亦會趁機幫天兒製造和許賜逸獨處的機會。

例如每次和他倆吃完晚飯後，我最喜歡叫許賜逸送天兒返家... 因為他們都住半山。

有一天，我又嘗試為他倆製造機會。當我們三人和另外兩位同事吃過晚飯後，我就和他們分別了。

正當我獨自步行到附近的巴士站時，有人突然從後把我拉到附近的後巷。

我很害怕... 我是否將會遇到不測?

豈料當我回頭一看，那人是許賜逸。

他用手把我的雙肩按到後巷的牆壁，並把身體挨向我。

"乜你唔係同天兒走咗..."

當我還未問完他，他就強勢地吻我的唇。

我雙眼瞪到最大，並不斷拍打他的雙臂以示意他放開我。

但他的咀唇不斷猛烈地在我的唇上移動... 他的動作很有侵略性，仿佛要把我吃下肚。

數十秒後，他放開了我。我們大力地呼吸著。

「你做咩呀?」我眼泛淚光地大聲吼叫。

「妳成日叫我送妳個friend返屋企，我以為妳唔知我鍾意嗰個係妳啫!」他在撒野。

我還在大力呼吸著，並用手抹去許賜逸殘留在我唇上的氣息。

「你哋頭先做乜呀?」天兒忽然出現在後巷高聲問道。

「天兒... 」我向天兒露出為難的表情，以表示我是被逼的。

天兒望望許賜逸，許賜逸倔強地望著天兒。

「妳死心啦! 我唔會鍾意妳㗎! 我知嗰晚妳係特登灌醉我，我哋先會... 總之我死都唔會鍾意妳!」許賜逸怒斥天兒。

天兒無言地望著許賜逸，淚流不止。

「妳下次唔好用啲咁cheap嘅招數啦! 妳咁只會令我睇妳唔起!」許賜逸繼續對天兒說。

天兒聽罷，終於按捺不住自己的情緒...

「係呀! 係我灌醉你呀! 我係好鍾意你，但係你唔鍾意我吖嘛! 不過你好鍾意嗰個袁欣，其實鍾意你個死黨林子孺囉!!!!!!!」

許賜逸當然知道我對林子孺的感情，所以他對天兒說的話不感到意外。

但他之後說了令我和天兒都很意外的話。

「Reason，妳中一至中三嘅時候係咪讀St. Helen's，住喺灣仔?」許賜逸認真地問我。

「你點知㗎?」我反問許賜逸，心頭一顫。

「我喺妳中一嗰時已經識妳。」他說。

我和天兒都愣住了。

「我中學讀St. Matthew，經常喺放學見到妳哋St. Helen's嘅學生。當時嘅我滿面暗瘡，又矮，非常自卑。」St. Matthew's是和St. Helen's同區的著名男校。

「有一日放學後我喺學校附近嘅士多買嘢飲。嗰日如常有好多學生去買嘢。或者因為太多人，混亂中，士多老闆以為我偷咗罐可樂...」他說。

「於是老闆追咗出嚟捉住我，話我未俾錢，仲話要報警。好彩當時妳挺身而出幫我做證人，我先無事。」他對我說。

聽到許賜逸的敍述，我對這件事開始有點印象。

「自從嗰次之後我就好留意妳。雖然我都覺得自己好變態，但我每日放學都會喺差唔多時間去到巴士站，目送妳安全咁上咗嗰架去灣仔嘅巴士我先安心返屋企。」他說。

「有一日，我記得係中二嘅冬天... 嗰日妳差唔多六點先搭車返屋企，而我當然要等到妳上咗巴士先會返屋企。妳嗰日嘅面色好差，個樣好似好攰咁... 突然間，妳暈低咗喺嗰個當時無人嘅巴士站度。」他續道。

「你就係當日送我去醫院嗰個人?」我震驚地問他。

「因為當時我未夠十八歲，所以我只可以幫妳call白車，喺妳暈咗嗰時陪住妳，直到白車嚟咗，我目送妳上車就走咗。」他答我。

「咁我戴咗咁多年嘅呢條手繩...」我摸著這條我視為吉祥物多年的手繩，問許賜逸。

「無錯，係我嘅。佢係我當年織俾自己嘅lucky charm。」他徐徐地說。

難怪我這麼平凡，許賜逸卻死盯著我不放。

「不過中三嘅冬天妳突然失咗蹤... 我喺巴士站等咗妳好多日都等唔到...」他失落地說。

「嗰時我同天兒一齊轉咗去Harrods School... 因為天兒家人識Harrods嘅校董，而Harrods嘅banding又高啲...」我解釋道。

「哈! 妳失蹤嘅原因今日終於解開! 不過可能個天都唔想我錯過妳，我哋Year 3 有日上緊PR lecture嘅時候，我發現妳戴住條手繩...」他笑著對我說。

「咁點解你當時唔同袁欣相認?」天兒終於出聲。

「因為由中一開始都係我單方面留意佢，所以我唔想貿然出現嚇親佢... 同埋我留意到Reason唔係鍾意靚仔嘅人，我對住佢真係無乜自信。」他苦笑。

「到咗畢業禮嗰日，我喺遠處見到原來妳哋係雅妍嘅舊同學... 於是我就扮同雅妍佢哋打招呼，再正式向妳哋自我介紹。」他說。

我聽到這裡，雞皮疙瘩，真心感動。

原來平凡的我，即使沒有如天兒女神般的美貌，但有見義勇為和善良的心也是會被看到的。

成功發佈