我覺得和天兒的友誼愈來愈脆弱; 相反，我和林雅妍每日都會保持聯絡。

「袁欣! 上次我同你講做會計嗰個學生，Tony呀... 佢今日上堂喺我彈緊琴嗰時，突然喺keyboard上面捉住我隻手話鍾意我!」林雅妍WhatsApp我說。

「吓? 妳話佢幾靚仔嗰個? 佢好似跟妳學咗兩個月琴咋喎... 佢... 係咪認真㗎?」我帶點疑惑地問她。

「我真係好開心呀! 我哋兩情相悅呀!」林雅妍天真地答。

「妳知佢幾多嘢呀? 佢幾多歲妳知唔知? 佢住邊，喺邊度返工妳知唔知?」

雖然我完全不認識那個Tony，但我對他真的很有保留...

又或者，我實在覺得單純的林雅妍太易被騙。

「欸... 我唔知呀...」她答。

「乜都唔知，唔好咁快中個頭埋去呀!」我說。

「不過... 我已經應承咗做佢女朋友...」她說。

「妳係咪痴線? 除咗佢個名佢個樣同埋佢學琴嘅進度，妳知道佢啲乜?」我很激動。

「咁我哋一齊咗再了解都唔遲啦! 反正成世流流長...」她覺得他們會一生一世。

「妳係咪真係單純得咁交關呀，小姐?」我開始變得急躁。

之後，林雅妍良久都未有回覆我的短訊。是我語氣太重了嗎?

隔了一會，我的電話響起，是林雅妍。

「袁欣... 嗚嗚..」電話傳來林雅妍的哭聲。

「做乜事呀? 唔係半個鐘後就俾個Tony飛咗呀?」聽到她的哭聲，我有點不知所措。

「唔係... 呀! 嗚嗚... 我只係喺度諗，妳同堂大佬都係對我好重要嘅人，但偏偏點解你哋兩個都唔信我嘅選擇，覺得我一定會俾人呃?」她繼續哭著說。

「咁我都係擔心妳，緊張妳先會叫妳小心啲啫...」我嘗試解釋我的用心良苦。

「堂大佬又係咁講! 不過你哋既然咁錫我，唔係應該更支持我嘅選擇咩?」她問。

「不如咁講，假設我係打理溫室嘅花農，而妳係一朵喺溫室長大，未受過風吹雨打嘅花。突然有人嚟話要買走妳，帶妳出去外面嘅世界生活，我都會擔心妳喺外面充滿污染嘅世界會生活到點...」我解釋道。

「嘩!」林雅妍突然驚訝地叫了出來。

「吓?」我滿腦問號。

「妳同堂大佬用嘅比喻咁似嘅? 佢都話我似一朵喺溫室長大嘅花!」她說。

「咁啱啫...」我答。

我心想，大概因為我和林子孺的智力差不多，所以用的比喻都差不多吧!

不過... 其實這也不是唯一的比喻吧?!

我承認我和林子孺的思路的確有點相似; 是可以用腦力較勁的對象。

「不過周玥就同你哋唔一樣，佢好支持我去試吓同個男仔一齊!」林雅妍續說。

周玥? 一個很熟悉的名字!

「周玥，即係堂大佬個同事，其實都係我中學同學! 勁巧合囉!」林雅妍起勁地說。

「嘩! 世界咁細呀? 我都見過周玥，有次食lunch撞到佢同妳堂大佬。幾靚吖佢，又斯文。」我說。

「係呀! 我成日覺得周玥係鍾意我堂大佬囉... 佢次次見到我，唔係讚我堂大佬做嘢有幾叻，就係問我有關堂大佬嘅嘢。佢都幾主動囉! 嘻嘻...」林雅妍嬉笑道。

「佢就好似之前賜逸不停問我有關妳返工啲嘢咁囉! 哈哈…」她續道。

「哦... 哈! 哈! 咁妳有無show過妳堂大佬以前大學嗰個樣俾周玥睇? 我諗佢睇完一定唔會鍾意妳堂大佬囉!」

我有點希望周玥不會喜歡上林子孺。我見識過他大學時的尊容和臭脾氣，我認為他不值得有像周玥這麼好的女孩子喜歡他!

「我俾過周玥睇啦! 佢睇完不知幾興奮，仲猛話堂大佬好得意! 跟住呢件事俾堂大佬知道咗，佢好嬲...」林雅妍說。

「點解嬲呀?」我好奇地問。

「其實呢... 我覺得堂大佬都對周玥有啲意思... 我從來未見過堂大佬同個女仔咁熟嘅! 佢可能嬲我破壞佢喺周玥心目中嘅形象啩! 哈哈哈…」她笑著說。

他們已經拍拖了嗎? 還是互有好感?

我有點在意林子孺和周玥的實質關係。

當我跟林雅妍掛線後，我看到很多個未讀的WhatsApp短訊。

全部都是許賜逸send來的。

「Reason! 你做緊乜呀?」

「有無忍唔住好掛住我呀?」

「Reason...點解妳唔應我? 妳好忙? 忙緊乜呀?」

「妳再唔應我，我聽日送嗰支同妳最襯嘅貓頭鷹筆俾妳㗎!」

見到這幾個短訊，我只想到一個字...

「煩」!

我很怕這麼纏人，而又喜歡要脅我的人。

「夠喇! 你好煩!」我回覆他。

我回覆他後，不消二十秒，我就收到許賜逸的電話。

「Reason，妳覺得我好煩呀?」許賜逸擔憂地說。

「係呀! 我哋係同事，放咗工唔需要有聯絡㗎!」我斬釘截鐵地說。

「但我唔止當妳係同事...我...」他說。

他還未把話說完，我就對他說:

「許賜逸... 你係唔係鍾意我?」我認真的問他。

我想快點了斷他對我的無謂感情。

「係!」他肯定地說。

「但係我唔鍾意你!」我也肯定地回答。

「點解呀? 係唔係因為我太靚仔，令妳無安全感?」

「唔係囉! 我就係唔鍾意你覺得自己靚仔就可以對女人手到拿來。你好膚淺!」我動氣了。

「Reason，可能妳只係未鍾意我，唔係唔鍾意我啫! 同埋我以後唔會再搵嗰支貓頭鷹筆嚇妳!」他仍在死撐。

「唉… 點解你一定要我啫? 我唔需要男朋友呀，唔好煩我啦! 我求吓你…」我向他求饒。

「我會繼續努力令妳鍾意我，我認真㗎!」他堅定地說。

之前許賜逸曾跟我說過類似表白的說話; 他亦對我的喜好觀察入微... 但我對他的這些言論和舉動只有很短暫的心跳感覺。

與其說是「心跳」，倒不如說是一向平凡的我竟被一個風頭躉賞識和重視，我感到虛榮和受寵若驚。

其實許賜逸為何非我不可?

我只是一個普通到不行的女子。沒有美貌，沒有家底，沒有好身材... 到底他看上我甚麼?

不過我是不會喜歡上他的... 因為天兒喜歡他。我不可，亦不想牽涉進他們的關係裡。

成功發佈