喺我返屋企嗰程巴士，我嘗試慢慢消化今晚發生嘅事。 但諗諗吓，點解彭湃個close up會不斷喺我腦入面出現? 原來彭湃個樣無我想像中咁仔。佢有好長好密嘅眼睫毛，又長又高嘅鼻，厚厚哋嘅咀唇，濃濃嘅眉毛，純潔的單眼皮，仲有翹翹嘅下巴，加上佢原來好大力... 佢係一個男人嚟㗎。 等等! 紀少言，清醒! 清醒! 點解成個腦都係彭湃個鼻呀，睫毛呀，手臂呀咁飛嚟飛去? 死啦! 唔通... 唔係呀嘛? 「是我敏感 誤會戀愛降臨」 Janice嘅<一場誤會>突然喺耳筒傳來。 無錯! 我誤會咗啫! 嚇我唔到嘅! 我同Quinn咁有緣份，嗰啲先似係戀愛! 「從來未發生 交不出初吻」 但我嘅初吻已經交出咗，仲要係同彭湃... 唉呀！ 唔係，有愛嘅先叫初吻。 嗰次係一場不幸嘅意外... 紀少言，唔好諗咁多。 *** 第二日返工，如我所料，彭湃無出現。 大約早上11點左右，Auntie Sandra收到津津學校嘅電話，話津津喺學校發燒燒到攝氏38.5度。 「紀少言，一陣有批咖啡豆送嚟，我行唔開去接津津。請你幫我去接佢吖，唔該!」 陰公! 點解津津會無端端發高燒? 小朋友發高燒可能會休克... 一定要快啲帶佢去睇醫生先得! 「無問題! 咁我宜家去接津津啦, Auntie Sandra!」 「如果你搞唔掂，我試吓叫彭湃去會合你!」 「是但啦! 我走啦!」 我直奔去巴士站度搭車接津津, 點知架巴士去到九龍塘鐵路站死咗火... 又係九龍塘鐵路站... 好彩學校只係一站之隔，所以我即刻跑去津津學校。當我跑呀跑，我竟然好似盲咗咁俾人撞跌咗。 「Phyllis? 你無事嘛?」 原來係Quinn。 「唔好意思呀Quinn, 但我宜家趕住去接津津... 佢發緊高燒，要快啲睇醫生先得! 下次見...」 「Phyllis, 不如我陪你去。 你一個女仔點抱得起一個3歲小朋友去睇醫生?」 「不過...」 我怕阻到Quinn返工。 「唔洗不過啦! 我今日其實day off, 但因為喺屋企有啲悶，所以諗住返office準備教材啫。快啲行啦! 津津等緊你!」 於是乎，我同Quinn就快步去津津學校接佢。唔知點解有Quinn喺身邊，我總會覺得好安心。 我諗呢啲就係傳說中嘅安全感。 接咗津津之後，我哋就一行三人去咗附近嘅大學醫院睇醫生。 喺等緊睇醫生途中，津津全程睡死喺Quinn嘅手臂入面，我就幫津津抹汗和換退熱貼。 我諗唔識我哋嘅人可能會以為我哋係一家三口。 忽然間，我見到前方有個好似彭湃嘅背影，不過嗰個人無戴大耳牛嘅... 可能我眼花啦... 過咗半個鐘左右，終於到我哋見醫生。醫生話津津因為感冒所以發燒，所以唔洗留院，準時食藥休息吓應該好快好番。 之後Quinn陪埋我哋返cafe。Auntie Sandra一見到Quinn就兩眼發光，不停多謝人哋，又忍唔住大讚佢又靚仔又高大， 話我識到個條件咁好嘅朋友我真係執到。 「識到Phyllis咁好嘅朋友，我都執到!」 Quinn打趣道。 我即時紅都面晒。 呢個時候，彭湃嚟到cafe。Auntie Sandra立刻問彭湃... 「你頭先又話去幫紀少言手帶津津去睇醫生，宜家你就自己一個返嚟... 好彩有呀Quinn幫手咋! 靠你真係死得人多。」 「其實我頭先喺醫院見到一個好似彭湃嘅背影，但因為嗰個人無戴headphone, 我唔肯定係咪佢，所以無叫佢...」我嘗試幫彭湃解圍。 「你有去到醫院咩，衰仔?」 Auntie Sandra問道。 「我有無去唔重要。」 跟住彭湃就轉身離開咗cafe。
