我諗彭湃都有三個星期無嚟cafe。 今日我負責收舖。換好晒衫，差唔多走嘅時候，突然有個黑影飛快咁衝咗入嚟舖頭。 「拉閘，鎖門! 我叫你鎖門呀!」 有個男人對住我大聲吼叫。 睇真啲，原來係一個跑到索晒氣嘅彭湃。 我立即走咗去拉閘鎖門。喺我剛拉好閘嘅一剎那，有人喺出面好大力咁瘋狂拍個閘。 我心諗，咩料呀? 小女子未見過大場面，我會驚㗎! 「o靚仔! 你做咩架両呀? 我知你喺入面! 你快啲出嚟!」 閘後面有把好憤怒嘅男人聲叫道。 「唔好理佢，快啲閂埋道玻璃門!Z 彭湃索住氣咁同我講。 出面個男人仲係好大力咁拍緊道閘，但舖頭門總算鎖好晒，我都稍為鎮定啲。 呢個時候，彭湃攞咗部電話出嚟報警，話有人滋擾民居。佢報完警之後，就去番佢平時坐開嗰張枱度坐底。 我其實可以宜家喺後門溜走，但我覺得咁有違道義，所以我選擇咗留低陪彭湃。 「今日嘅事，唔好話俾我家姐知。」彭湃緩緩地說。 「你好似有好多嘢唔俾得你家姐知。」 「你咪理!」 「其實發生咗咩事? 我幫唔幫到你?」 我嘅好人基因又突然迸發出嚟。 「你出少句聲當幫忙!」 彭湃嗰種倔強嘅態度又令我無名火起... 「我只係覺得大家相識一場，睇吓有無嘢幫到你啫!」 我條氣chok住chok住。 大家沈默咗大約5分鐘。出面個男人仲間歇地拍吓道閘叫囂吓。我仲有啲氣憤，但突然彭湃說道... 「頭先我去咗幫你上次喺銅鑼灣見到個女仔... 佢呢排俾出面個男人纏住，我幫佢出頭。」 「我仲以為黑幫仇殺呀! 大佬，嚇死人咩! 不過都算你係一個稱職嘅男朋友!」 「我唔係佢男友。」 「噢! 你暗戀個女仔呀?」 唔知點解知道佢唔係同個文青女仔拍拖，我頭先嘅怒氣消失晒。 彭湃無答我呢個問題。 大家又沈默咗一陣。我突然覺得有啲口渴，所以決定行去水吧斟水飲。 水吧入口有一級樓梯，而嗰級樓梯正正喺彭湃張枱隔離。兩者之間嘅距離大約等於一個人嘅身位多少少。當我行到佢張枱度嗰時，我特登踮高腳行，費事打擾到佢嘅沈默。 點知，一向論盡嘅我，喺踮住腳上去水吧級樓梯時，我成個人向前絆倒。 彭湃見狀一手將我向後拉。佢原來好大力，隻手仲好大。 俾佢拉完之後，我成個人坐咗喺佢大脾度。 我同佢再次四目交投。我喺佢眼入面見到我個樣; 我諗佢都可以喺我眼入面見到佢自己。 彭湃當時嘅樣，係我從未見過咁順眼。 我個心係咁卜卜卜卜卜卜卜...(下刪幾十個「卜」字) 跳。我諗可能我嚇親，所以心跳得咁快。 「嗚嗚嗚…」 突然間，刺耳嘅警車聲令我哋都清醒過來。我立刻從彭湃大脾上跳起身，而佢亦擰歪咗塊面去另一面。 「係咪有人報警呀?」 出面有人拍門。 我立即跑去開閘。擾攘咗一輪，個男人俾警察拉咗上警車。 原來不知不覺已經8點。我呀媽仲等緊我食飯! 「我諗我要走啦... 唔... 頭先唔該晒你拉住我。」 彭湃無望住我，但回應我說... 「你走啦，我鎖門。」 我無答佢，就攞埋個袋，輕輕的走了。
