同Quinn交換咗電話一個星期，我哋一次都無text過大家。 就算我去接津津放學... 一次都無撞過佢。 Quinn, 咁點解你要俾你電話我呢? 交換電話唔係要嚟通訊㗎咩? 而工作上，我自覺已經上晒軌道。雖然每日朝早返工時都係同時間搏鬥，但總算無再遲到。 津津依舊叫我呀嬋，但起碼佢開始相信我。呢一兩日仲開始主動拖住我隻手過馬路。 彭湃... 自從嗰日喺巴士上面發生過嗰件事之後，就無再喺cafe出現過... 頂... 做乜成日都要諗起佢? 不過對於我呢啲未拍過拖嘅人嚟講，嗰日嘅衝擊的確好大... 所以成日諗起佢，係正常嘅。 係! 我一定唔係掛住佢先諗起佢。 *** 今日係星期六。唔洗返學嘅津津同佢8歲嘅哥哥，謙謙，都嚟咗cafe陪Auntie Sandra。 「呀嬋!」 津津一見到我就撲過嚟攬住我。 我心諗，o靚妹，我幾時同你變得咁熟? 但喺Auntie Sandra面前，我都係將呢啲疑惑吞番落肚。 「哥哥，呢個就係呀嬋啦!」 津津指手劃腳地告訴謙謙。 「你好!」 謙謙突然走過嚟同我握手，然後再謙恭有禮咁話: 「多謝你呢幾日咁照顧我妹妹。」 嘩! 謙謙同佢哋係咪一家人嚟㗎? 性格咁唔同嘅? 「媽咪， 舅父仔呢? 佢今日唔洗嚟寫劇本咩?」 謙謙繼續問道。 「返咗公司係咪呀? 不過佢又真係成個星期無嚟過cafe...」 Auntie Sandra都好奇怪點解彭湃咁耐無嚟。 寫劇本? 返公司? 原來彭湃有返工㗎? 唔通佢係編劇? 「係呀，係編劇。彭湃18歲嗰年自薦寄咗個佢寫嘅劇本俾幾間電影公司。雖然嗰個劇本最後拍唔成電影，但彭湃就一直幫緊其中一間電影公司寫劇本。」 Auntie Sandra答道。 哦～ 唔怪得彭湃成日喺cafe用狂草寫字畫mind map啦! 咦，不過... Auntie Sandra識讀心㗎? 點解佢會解答我心入面諗嘅問題? 「其實你頭先將你諗嘅問題，唔小心up咗出嚟，咁我咪答你囉!」 Auntie Sandra笑住答我。 突然，我feel到衫袋入面嘅電話震咗一震，係收到WhatsApp嘅嗰種震法。 我急忙拎部電話出嚟check message, 見到... 「原來你真係喺度!」 望一望寄件人: 「Quinn」。 再望一望cafe門口，我就見到一個閃閃發光嘅身影。 係Quinn。 佢嚟咗cafe搵我! 我情不自禁咁跑咗出去邀請佢入嚟cafe坐。 「點解你會識得嚟呢度?」 我驚訝地問。 「星期六放假，天氣幾好，又記得你喺一間叫做Morning Glory嘅cafe度做， 咪上網Google一下個地址，再嚟飲杯咖啡。」 「咁你係咪搭咗好耐車先嚟到?」 我帶點擔心地問。 「講你都唔信，其實我住喺呢度附近。所以好方便。」 紀少言，呢啲係咪叫緣份呀? 我開始感覺到我一路行，一路有啲粉紅色泡泡跟住我。 我安排Quinn坐咗喺最近窗嗰張枱，因為睇到啲陽光打喺佢身上，佢會變得更閃閃發光。 「Hello! 我叫Sandra，係紀少言嘅Auntie暨老闆娘。」 「紀少言... 哦! Phyllis姓紀㗎喎! 紀少言係Phyllis。 哈哈哈～ Sandra, 你好你好!」Quinn用佢招牌陽光笑容回答Auntie Sandra。 「你係紀少言男朋友呀?」Auntie Sandra用一個"世事都被我看透"嘅表情問Quinn呢個問題。 「哈哈～我同Phyllis係大學朋友。」 Quinn再爽朗地回答。 「吓? 朋友咋? 」 Auntie Sandra帶點失望咁行開咗。 但我一啲都唔失望... 因為佢話我係佢大學嘅朋友! 唔係學生，係朋。友。 我嘅腦海忽然好似變咗年初二煙花匯演咁... 救命! 我真係好興奮!! Quinn飲完佢杯Long Black就走咗。我同佢嘅對話唔算多，但見到佢我就好滿足。 「紀少言...呢個男人，好嘢嚟喎! 又型又陽光，仲要喺大學教書! 算啦，你快啲嫁俾佢，我哋呢度留你唔住啦! 哈哈哈～」Auntie Sandra個八婆樣，係世界級。 「癡線! 佢都唔係我男朋友，乜鬼嫁俾佢!」 我feel到我個面紅過蕃茄。 「媽咪，我學得舅父仔型啲!」 津津吵著說。 「我頭先見到舅父仔經過呢度門口，但望咗一望我哋，就嬲爆爆咁走咗...」 謙謙道。 「我呢個細佬同你個呀Quinn真係差好遠。成日都嬲咗全世界咁款，淨係識寫嘢。咁嘅孤僻男，實一世都無女人吼佢!」 「未必...」 我衝口而出地碎碎唸道。
