Morning Glory Cafe 每日七點半開始營業，所以員工最遲七點就要返到cafe。 但係我今日返到cafe嘅時間係...9點半。 「紀。少。言! 你今日好準時喎!"」 Auntie Sandra講呢句說話嘅時候，個咀抿成一線。識讀心嘅林保怡又喺我個腦度亂入提醒我， Auntie Sandra好嬲。 「對唔住呀Auntie Sandra! 嗚嗚... 你今日盡情差遣我啦!」我語帶哀求地說。 「好啦! 咁由今日開始，你就負責每日去接津津放學。」 Auntie Sandra冷冷嘅語氣話我知，我無得say no。 「知道! 我接津津無問題，但我都仲未知津津學校喺邊...」 「叫彭湃帶你去多次!"」 「又同佢一齊去? 無可能。」 遠處忽然傳來彭湃唔耐煩嘅聲音。 原來佢今日一早就嚟咗cafe, 仲早過我。不過依然係戴住個大耳牛嘅佢，點解又聽到我哋講嘢? 「咁我唔識路點算呀?」 我帶點焦急地說。 等等，唔係喎! 彭湃有把柄喺我手喎! 嘻嘻嘻！ 「彭先生，你教識我點去學校，以後你又唔洗特登去接津津，我又唔會亂講嘢，幾好?」 然後我對佢奸笑咗一下。 「可惡...」 彭湃怒啤咗我一下。 如是者，食完lunch之後，我又同彭湃起程去九龍塘接津津。 今次我哋依舊上咗一架單層巴士，但唔同嘅係，我哋唔再一個坐車頭，一個坐車尾。 今次，佢坐咗喺我後面個位。 尋晚因為掛住諗有關彭湃同佢女朋友嘅問題，諗到我好夜先瞓。 今朝仲因為咁而遲到返工! 可惡，趁住宜家得我哋兩個人，等我問吓佢本尊先! 坐喺前排嘅我，擰轉頭問彭湃... 「喂! 其實點解你拍拖唔可以話俾你家姐知? 你女朋友睇落都幾靚幾斯文吖! 點解要收收埋埋?」 「唔關你事!」 彭湃唔耐煩地回答。 「其實你哋都幾襯呀! 兩個都咁高，不過人哋個樣就靚你好多囉...」 我繼續講，務求用激障法得到我想要嘅答案。 「妖，你煩夠未!」 彭湃變得更唔耐煩。 「你妖我? 唔好再粗鄙啲? 同你好熟呀?"」 俾佢「妖」咗一聲之後，我啲怒氣愈燒愈旺。 頂! 我嬲嘅時候，真係睇乜都唔順眼! 佢成日戴住個死人headphone, 但又聽到人哋講乜... 到底佢聽緊啲乜? 喺我嘅怒氣同埋好奇心驅使之下，我把心一橫，扯咗佢個大耳牛落嚟。 「(怒吼) 俾番我!!!!!!」 彭湃震耳欲聾嘅聲音，令全車人都望住佢。 「我唔俾!!! 你咁無禮貌，我要以牙還牙!」我將佢個大耳牛攬到實一實，唔俾佢攞番，因為我仲好唔忿氣。 「我叫你俾番我呀!!!!!」 彭湃企咗起身，想要搶番自己個大耳牛。 點知呢個時候，架巴士突然剎車，企咗喺度嘅彭湃失去重心，成個人向前傾去我度。 當我定過神來，我同彭湃已經四唇交叠。
