兩個八婆食飯，講完一大輪八卦嘢，發現已經差唔多11點。 「走啦! 無巴士啦!」 我有點焦急地說。 「搭的士啦! 你成日都話Taxi is your friend...」 Mui姐有啲驚訝。 「唔啦! 我搭一程的士等如十程巴士啦!」 「你搞乜呀紀少言...痴咗線呀? 算啦! 放你走啦!」 「多謝mui姐皇恩浩蕩~」跟住我扮清朝格格雙手放喺右邊腰"un"咗一下向mui姐謝恩。 「哈哈～低b仔! (正經mode) 紀少言...返工加油呀!」 「你都係啦!」 跟住我倆相視而笑咗一下。 嗰一剎那，我倆都知我哋嘅友誼有幾深。 我之後就去等巴士。喺等緊巴士嘅途中，我見到大耳牛...呀! 唔係! 係彭湃! 彭湃就企喺我對面馬路，但佢唔係得自己一個人。 佢身邊有個同我哋年齡相若嘅女仔。中長頭髮，眼大大鼻高高，好文青feel。呢個文青女仔同彭湃係咁講嘢，氣氛好愉快。 而我都係第一次見到彭湃笑得咁開懷。 原來彭湃呢啲咁孤僻嘅人唔單止有朋友，仲有女朋友! 此情此境，我當然即刻擰轉頭扮見佢哋唔到。我繼續聽我嘅歌，等我嘅巴士。 我上到巴士無幾耐， 收到一個不明電話嘅 WhatsApp message... 「我知你頭先見到我。」 「請問你係邊位? 我認識你?」 喺我成頭問號嘅時候，我立刻add咗呢一個電話，再refresh WhatsApp， 睇吓呢條友嘅display picture係邊個。 但喺我仲好忙碌咁refresh緊WhatsApp， 我又收到另一個text。 「醜人多八怪」 「你係Auntie Sandra個...」 「係」 「我頭先見到你咁又點?」 「唔好話俾我家姐知你見過我。」 「哦～我好通氣嘅! 拍拖唔想俾Auntie Sandra知呢! 你上次幫過我，我會報恩嘅!」 「總之你一定唔可以俾佢知... 謝謝。」 「無問題啦!」 拍拖之嘛! 洗唔洗咁神秘呀!? 不過算啦，我咁樂於助人，我會幫佢嘅。 不過... 諗諗吓，個女仔都幾靚幾斯文呀! 點解唔俾得Auntie Sandra知呢? 係咪個女仔有咩問題? 但橫睇掂睇都似彭湃有問題多啲啦... 唔通佢哋嘅關係唔見得光? 定係其中一個係第三者? 我思考呢堆問題思考咗成晚。當我發現自己個腦好似轉咗好耐嘅時候，我發現已經係凌晨2點幾。 我嚇咗一跳... 彭湃嘅事，值得我諗咁耐咩? 算啦，瞓覺。
