眼前一黑之後，我好努力去嘗試睜開對眼。但我嘅眼皮好似縛咗個鉛球咁，好重好重... 忽然間，我開始接受自己可能已經死咗嘅事實。其實今日都返cafe忙咗大半日，尋晚又因為怕今朝唔知醒而失眠...死咗，起碼唔會再眼瞓。所以，我決定昏睡落去，直到永遠，阿門。 「嗶嗶嗶嗶嗶...嗶嗶嗶嗶嗶...」 咦! 啲「嗶嗶」聲咁熟嘅...好似係我嗰個有如警鐘咁大聲嘅鬧鐘發出嚟㗎囉... 我對眼皮突然好似如釋重負咁，而我對眼亦可以徐徐睜開。但我望到嘅都只係漆黑一片。 我嘗試伸手去探索一下周圍有啲乜。首先，我隻左手下意識伸咗去啲「嗶嗶」聲嘅來源。我摸到一舊冷冰冰，圓碌碌嘅物體... 係我個鬧鐘呀! 我即時醒咗一醒，再用右手摸到我隻比卡超公仔! 呢個時候，我慶幸自己平時唔抗拒食甘筍，所以有攝取到足夠嘅維他命A，令我喺呢個黑漆漆嘅環境開始慢慢睇到並發現原來我瞓咗喺自己間房度。 「都話呢個鬧鐘實嘈得醒紀少言㗎啦!」 我聽到我媽咪用最沾沾自喜嘅語氣講咗呢句說話。 不消一秒，我間房盞燈就俾我呀媽開咗。 原來，我未死。 但我都仲有啲疑惑， 點解我俾棵樹砸到我都可以完壁歸家? 「乜嘢冧樹呀? 你喺條街度瞓著咗!」我媽咪沒好氣地說。 「我明明見到棵樹冧緊落我度!」我仲唔相信棵樹無砸到我。 「人地彭湃話見你突然暈咗喺條街度，但無穿無爛，呼吸正常，仲扯鼻鼾! 你眼瞓自然睇到周圍乜都係昏昏沉沉啦... 難為人哋因為你又要接津津放學，又要送你返屋企。 你一陣記住打電話俾Auntie Sandra同人講句多謝同埋唔好意思!」 「媽咪，我唔想再去Auntie Sandra度啦...」 突然間，我覺得自己係零。我只係通頂一晚，做咗半日嘢，就攰到睡死街頭。我唔可以再俾自己頹廢落去。25歲，再唔起步就怕會太遲。 其實呢啲懶係生性嘅說話只係借口。覺得「火羅」爆先係真正原因。 「唔得，你休息夠，聽日繼續照返去Auntie Sandra度!」 我感覺到我媽咪嘅語氣開始強硬起來。 「我話晒都有碩士學歷，你同爹地咁辛苦供我讀咁多書，就係想我做侍應?」 我覺得自己講得好有道理。 「喺你無業呢半年，我就係深深咁體會到，如果你唔去做啲直接面社會群眾嘅工作，唔去體會搵錢有幾辛苦，你好可能一世都會係一條自以為是嘅咸魚!」 我好耐未見過我媽咁認真。 佢動咗真火。 「Okay...咁我一陣打俾Auntie Sandra 話佢知我聽日照常返cafe, 得未?」 我媽無回應我，但我隱約見到佢眼泛淚光。
