呢位o靚仔，橫睇掂睇都細過我。 聽到條o靚仔話我枱都唔識抹，唔嬲就假。 但係... 等等... 佢頭先叫Auntie Sandra做家姐... 「你咪嘈啦! 好識抹枱呀你! 得把聲話人自己就乜都唔做!」 Auntie Sandra勞氣地對呢個o靚仔講。 但o靚仔因為戴住headphone, 所以好似聽唔到Auntie Sandra講乜，就徑自走咗入舖頭最入面張枱坐底咗。 「佢係我細佬，叫做彭湃。唔好意思呀佢對你咁無禮貌...」Auntie Sandra帶點歉疚咁同我講。 「唔緊要，宜家啲後生仔可能講嘢比較直接...」 我以一個好nice嘅長輩口脗回答Auntie Sandra, 不過心底裡我仲係唔忿氣。 「吓? 彭湃好似同你同年，一個月前25歲啦佢!」 咩話，成25歲人無所事事喺自己家姐間cafe度乜都唔做，憑咩教我做嘢? 仲要原來大過我......呢個社會搞乜? 「哦? 係咩? (tvb闊太式社交大笑) 呵呵呵！(義正辭嚴地) 咁我繼續做嘢先啦!」 正當我轉身想繼續抹嗰張可惡嘅枱， Auntie Sandra大聲問我... 「紀少言，記唔記得你細個嗰時，我成日買雞蛋仔俾你食?」 「記得，我細個嗰時，如果你嚟接我放學你一定買定一底雞蛋仔等我! 我次次見到你嚟接我都好開心!」 我答完佢之後，見到Auntie Sandra 好似鬆咗一口氣咁，之後佢就打蛇隨棍上咁話... 「紀少言，宜家俾個機會你體驗吓我當時接你放學嘅心情...erm... 你一陣3點可唔可以去幼稚園接我細女津津放學? 嗱! 呢度係佢張接放學卡...(又下刪幾百字)」 「Auntie Sandra, 你唔可以叫你細佬去接津津咩? 話晒佢都係津津舅父...」 「我唔鍾意接津津放學，就係咁簡單。"」彭湃藐咀藐舌咁冷冷回答。 唔知點解，我忽然feel到有股熱氣由腳趾尾上到去頭頂度。原來個彭湃雖然戴住大耳牛，但完全聽到我哋講乜! 愈諗愈嬲... 喂! 你兩姐弟搞乜呀? 一個游手好閒，一個當我工人。 我俾面我媽先嚟cafe幫手，無話包埋湊仔! 我今日幫得你一次，你之後仲唔奉旨叫我湊仔? 之不過... 唔知點解善良嗰一面嘅我突然應承咗幫佢。 「咁好啦 Auntie Sandra, 我今日就幫你去接一次。"」 「多謝你呀紀少言! 彭湃...(怒吼) 彭湃!!! 你今日帶紀少言去幼稚園一次! (轉頭望番住我) 紀少言， 咁津津以後放學就拜託你啦!」 見到彭湃好敷衍咁對佢家姐「哦!」咗一聲，我深深知道我已經瀨咗嘢。
