今日，唔再係平凡又枯燥嘅一日。 天氣陽光普照，但呀媽話今日會落雨喎... 唔...無錯，又係呀媽。 我今年25歲。20日前我生日，切完蛋糕唱完生日歌，蠟燭都未吹，我老豆就急不及待咁叫我"中女"。 細我5年嘅細佬補充，係"無人要嘅中女"。 「錯!係未有人要嘅中女!!!」 我用最有力嘅聲線...... 喺心入面嗌咗出嚟。 「紀少言又老又懶，鬼有人吼!」 講呢句說話嘅，係我呀媽。 「紀少言」，在下是也。 其實天下間有無呀媽真心覺得自己個女係乜用都無? 一年前我喺澳洲讀完個Marketing嘅Master degree就返咗香港，因為未畢業已經有間喺香港嘅跨國公關公司請咗我。 可惜，一個啱啱畢業又從少到大都讀女校嘅人，又點會知世途險惡? 返咗工之後，差不多每日都俾公司個GM捽膊頭掃背脊，每日三次，每次5至10分鐘左右，準時過食藥。 當我意識到位GM格外熱情嘅舉動好似有啲問題時，已經過咗差唔多三個月。 有一晚喺屋企食飯講起位熱情GM, 我老豆怒吼咗一聲，就叫我辭職。 自從辭咗公關公司份工後，我日日喺屋企做自己鍾意做的事， 例如瞓吓覺，諗吓食乜，上吓網，打吓機咁。 我呀媽見到我日日喺屋企爛腳，當然經常用刺耳嘅聲線提醒我去搵工。不過我覺得自己每日喺屋企都好多嘢做，所以兼顧唔到返工。 又瞓又食，唔洗時間嘅! 如是者過咗半年左右， 尋日下午我收到一個陌生來電。聽筒入面位中女，用有啲熱情嘅聲線同我講...... 「紀少言? 好耐無見啦! 歡迎你聽日正式嚟我間cafe度返工! 聽日記住......(下刪幾百字)......聽日見! (嘟......嘟.......嘟......)」 有無人話我知發生咗咩事呢? 嗰位喺電話一輪咀講嘢快過rapper嘅女土係邊位? 我好似一句都無回應過佢。 「Auntie Sandra打咗俾你叫你返工未呀?」 噢!一切謎底都已經解開啦!我以我爺爺嘅名義起誓，今次係我呀媽出手逼我返工。 小小資料補充，Auntie Sandra係一個帶住兩個分別8歲和3歲小朋友嘅失婚婦人。離婚後諗住自力更新，所以用咗佢大部份積蓄，開咗間叫做"Morning Glory"嘅cafe, 位於工廠區嘅邊皮地帶。 而因為忙於打理間cafe, 佢極度需要人手去執頭執尾，兼做埋佢一對仔女嘅褓姆。 我就係俾我媽欽點去做打雜嗰位兼職褓姆。 說時遲那時快，我已經發現自己著住寫住"Morning Glory" 嘅圍裙喺間cafe入面抹緊枱。 我嘅勞役生涯正式展開。 「抹枱咁抹會乾淨咩? 梗係用塊布打圈咁抹!(大嗌) 家姐!你又請埋啲廢人返嚟倒自己米呀?」 我心諗: 「嘩!邊位呀?」 呢番咁mean嘅言論係出自我正後方一把粗豪中帶有挑釁性嘅聲線。當我轉個頭睇吓邊位把聲咁寸，我見到一個高我一個頭，戴住大耳牛headphone嘅o靚仔。 嘩! 仲戴大耳牛? 咩年代呀? 呢條o靚仔......仲討厭過我細佬。
