兩年前開始hit起嘅「世界で２番目においしい焼き立てメロンパンアイス」（廣東話：世界上第二好味、新鮮出爐嘅雪糕日式菠蘿包），居然比我係函館行行下街遇到佢！ 日式「石板街」 隱藏人氣小食──雪糕蜜瓜包 位於函館嘅元町，八幡坂嘅石磚斜坡、兩邊林立嘅外國雜貨店，同香港嘅石板街有啲似！睇真啲，左右兩邊既有教堂，又有舊英國領事館，難怪成條街都咁有異國風情！正當我興高采烈，同八幡坂瘋狂自拍之際，見到街尾聚集咗唔少人！ 誤打誤撞，竟然嚟到呢間hit咗兩年幾 嘅「世界で２番目においしい焼き立てメロンパンアイス」函館元町店！ 本店係金澤開張（金澤：有小京都之稱，係名古屋嘅上面再上面再上面）呢股蜜瓜風潮席捲全國，嚟到函館元町，已經係第46間分店啦！暫時成個北海道只有函館分店。話說佢6月正式開幕，人潮依然不絕～排係我前面嘅姐姐，足足買咗五個添！ 雪糕蜜瓜包（ 400yen＠1）計返港紙，都要約莫30蚊。 人氣小食嘅秘密 點知咁簡單 點解佢咁出名？上instagram一睇，呢個蜜瓜包hashtags嘅post幾乎海量咁多！ 似乎唔少人都係比佢個名吸引咗～店名水蛇春咁長，話晒係「世界第二好味」喎，一場嚟到，當然唔執輸要試下！落單形式好簡單，電子螢幕自助購買，仲有中英文版比你揀，日文得半桶水都無有怕。 雪糕蜜瓜包即叫即做，店員先將烤好嘅蜜瓜麵包切半，夾住好大舊雲呢嗱味雪糕，再送多半塊厚多士比你。嘩，pat雪糕幾乎同麵包一比一咁大舊，出手好大方啊！！！一啖咬落去，麵包有麵包味，雪糕有雪糕味！（笑） 抵讚嘅係，麵包夠脆卜卜，雪糕夠晒煙韌唔會好快溶！唯一扣分嘅係，製作方法簡單，材料較普通，唔算非常特別……（個人意見） 但整體嚟講，大大件算係好食抵食嘅！ 聽朋友講仲有朱古力味雪糕揀添！（限定發售） 香港人熱門旅遊城市如東京、大阪、福岡、沖繩都有分店！ 如果有機會不妨試下！ 「世界で２番目においしい焼き立てメロンパンアイス」函館店 地址：北海道函館市元町10-7 營業時間：10am-6pm 其他分店一覽：http://melonpan-ice.com/?page_id=38
