著數獵人早前同大家提及過好多信用卡嘅優惠，有咩著數當然要早著先機啦！不過呢兩日受社會環境影響，獵人身邊唔少朋友又再提起兌美金、開離岸戶口嘅想法。獵人其實早前都對點樣開離岸戶口有少少涉獵，趁住呢個時間做咗少少整理，不妨又同大家分享交流吓啦～ 離岸戶口介紹 現時香港開離岸戶口有3種方法，一種係經本地外資銀行開設，入場費當然有返咁上下。第二種就比較啱會投資嘅朋友（尤其係美股），可以開設美國證券戶口。最後一種就係歐洲嘅虛擬銀行。大多數人都係會傾向喺美國開設離岸戶口。離岸戶口嘅好處就係資金會轉移去海外，只受戶口當地嘅政府及法律規管，唔怕有咩冬瓜豆腐資產隨時被凍結。呢一篇就同大家略略咁講吓開戶有咩要求，以及佢哋嘅唔同啦。 1. 本地外資銀行開離岸戶口 喺香港嘅外資銀行包括有滙豐銀行(HSBC)、星展銀行(DBS)、花旗銀行(Citi)同渣打銀行(SC)等，只有呢4間銀行開離岸戶口，作為資金避險途徑。優點就係幾間都係大銀行，較有保障，缺點就係入場費貴，例如花旗銀行就要HKD$150萬先開到。而且有機會要飛去當地分行開設，手續麻煩。如果想喺呢幾間銀行開戶口，最好就係打電話或者去分行問清楚客戶經理開戶要求同詳情。 滙豐銀行運籌理財 開戶過程：在香港進行手續 開戶國家：美國、英國、澳洲、加拿大、新加坡等 開戶最低結存：HKD$20萬 手續費：HKD$800 滙豐銀行 開戶過程：在香港進行手續 開戶國家：美國、英國、澳洲、加拿大、新加坡等 開戶最低結存：HKD$100萬 花旗銀行 Citigold 開戶過程：香港預約，然後到海外分行完成手續 開戶國家：美國、英國、澳洲、加拿大、新加坡等 開戶最低結存：HKD$150萬 星展銀行豐盛理財 開戶過程：在香港進行手續 開戶國家：新加坡 開戶最低結存：HKD$100萬 2. 美國證券戶口 如果大家覺得銀行開戶太麻煩費用又高，可以開設美國證券行戶口，部分唔單只冇結存要求，而且仲可以做到資金完全離岸，而且受到當地金融體系監管，有晒保障。證券戶口仲啱晒有意想投資美股／買債券嘅朋友（好多都係零佣金）！只要留意返果間證券行係唔係under SIPC(美國證券投資者保護公司)入面，就算證券商倒閉都可以獲得保障。 另外要留意返雖然經由銀行好似DBS豐盛、Citi Priority等等電匯去證券戶口嘅時候唔會收手續費，不過掉返轉由證券行匯返錢過嚟就要收好過手續費（好似Firstrade就要收USD$50手續費）。所以大家都要諗好舊錢唔係會點郁或者長期投資先好決定開戶匯錢呀。Firstrade同Charles Schwab (International)係兩個獵人比較推介嘅美國證券戶口，同樣都係受SIPC保障，保障金額高達USD$50萬。 Firstrade Firstrde係美國證券商入面嘅老字號，標榜0交易佣金。而且香港人可以用特區護照申請，而且會自動生成W-8EN表格，十分方便。Firstrade也有APP還投資美股人士隨時進行美股交易。 開戶過程：網上 護照申請：香港特區護照 開戶最低結存：0 交易股票佣金：0 可申請Visa Debit Card：可以（美國國外每月第一次提款免費，其後每次收3%手續費） 申請Visa Debit Card要求：戶口結存USD$100 Charles Schwab (International) Charles Schwab（嘉信理財）有分香港版同國際版，香港版雖然資金離岸，但係戶口同香港公司都係受返本地監管，所以唔可以算完全離岸。國際版戶口就係完全喺美國，不過需要有BNO護照先可以申請（網上有人教申請果陣填台灣做居住國家，填香港地址都申請到，大家可以試試可唔可以）。另外CS唔同Firstrade，要有最低結存，不過同樣都可以申請visa debit card。 開戶過程：網上 護照申請：BNO（申請時居住國家填英國） 開戶最低結存：USD$25,000 交易股票佣金：0 可申請Visa Debit Card：可以（提款無手續費） 3. 歐洲虛擬銀行 除咗開美國果邊嘅戶口，獵人查資料其實都有唔少人會開返個歐洲虛擬銀行戶口，除咗做投資，仲可以避險。好似有瑞士Dukascopy、英國Monzo/Revolut、歐洲嘅N26等等嘅選擇。以上幾間虛擬銀行都有受到當地法例監管同存款保障，仲可以開張Debit Card畀你消費，而且冇最低存款/開戶要求。不過有啲需要BNO護照同當地住址申請（如Monzo/N26）。呢方面獵人就唔係好有研究，大家有興趣都可以互相交流一下。 4. 英國銀行 Barclays Bank International Bank Account 開海外銀行嘅選擇唔多，位於英國嘅Barclays Bank（巴克萊銀行）係其中一個選擇。Barclays Bank係英國第二大銀行，亦都係英國最古老嘅銀行。大家喺香港都可以申請到，唔使飛去英國開，亦唔需要BNO。不過就有以下事項注意： 地址證明、護照、糧單等需要Certified true copy（可以喺民政署進行宣誓服務） 文件要郵寄去曼島（Isle of man）分行進行檢閱 設有最低25,000英鎊存款要求（或同等數量外幣），連續3個月少於25,000英鎊會收取20鎊手續費。 以上就係目前最常用嘅4種開離岸戶口嘅方法。大家有興趣嘅就快啲去開，以免到時一下子需求增高，對方可能會暫停申請或者有排等！
