前排喺屋企附近街市買到一盒大蝦，百零蚊一盒8隻大大隻，而且蝦肉都幾爽，有時想買都冇貨，通常用嚟煮下茄汁蝦碌、黃金蝦，今次再簡單啲煮，牛油蒜蓉就夠哂味啦。 牛油蒜蓉煎大蝦材料：大蝦8隻、蒜蓉3湯匙、牛油20g、植物油適量、鹽及黑椒適量1. 大蝦開邊去腸，洗淨抹乾備用。2. 平底鍋中燒熱植物油，放入大蝦中火煎一會。3. 加入10g牛油、蒜蓉與蝦同煎至兩面變色。4. 再加入10g牛油煮溶，然後撤上黑椒及鹽輕輕拌勻。5. 最後將大蝦的開邊位置翻在鍋上煎熟即可。 蝦煎到一面變色就可加牛油、蒜蓉。 牛油太快落好快會燶，所以在中途一邊煎一邊加牛油。 今次嘅蝦比較大，所以開邊位都煎一煎，蝦肉又可以沾到牛油蒜蓉香，好味啲架。
