--------------------------------------------------------------------------------------------------------- 前言：為食肥妹由細到大都好為食，平時既飲食習慣只係一般 1/ 早餐: 通常唔食,視乎當日心情決定要食麥當勞麥芝蛋包(多白醬) / 大家樂早餐:多士+半舊牛油，熱華田，牛奶麥皮 2/ 午餐: 大部分時間都係外食，除非個期有重大開支要儲錢先會自備 體重高峰時期真係好誇張，午餐會食漢堡包餐(漢堡包+ 薯條 + 汽水) / 香港仔南記會將小窩米線個湯底飲到一滴不剩 / 茶餐廳成個半肥瘦叉燒油雞飯盒食晒 / cafe會揀白汁意粉+西湯+熱朱古力，只要跟餐有飲品都會揀熱華田 3/ 晚餐: 大部分時間都係家人烹調，方式大多以炆、炒為主，甚少煎野更加唔好話炸(家母表示要用半樽油先夠大鑊油炸唔合符成本效益呀)，調味則以少油少鹽為主 雖然家中既烹調習慣正常，但家母一星期偶爾會有一、兩日霸工，呢個時候家中就會買KFC / PIZZA HUT / 燒味飯既外賣，或者外出用餐，呢d都係容易攝取過量卡路里既重大元兇!! 4/ 零食: 興趣不大，唔會特別想食，有得食既時候都只係過下口癮就收手，只係為食肥妹幾年前開始係咖啡店返part-time，因為有員工膳食及新品上市既試食福利，可以經常食到各種小食如蛋糕、咸批、含糖量超標既飲品，咁樣就又多左個增肥既機會啦!! 5/ 運動: 自中學畢業之後就再無做過任何運動啦，8-9年都無做過運動聽落都覺得過份吧! 6/ 生活習慣: 正職係坐辦公室工作，日常活動量偏低，上落會自動無視樓梯而選擇扶手電梯／坐電梯，總之可以懶得就懶 總結: 女人嘛，永遠都鐘意將減肥掛住嘴邊；惰性嘛，有咩食左今餐先至講啦! 雖然個心好想減肥，但總係無辦法踏出第一步"|| --------------------------------------------------------------------------------------------------------- 咁到底咩原因會突然下定決心要減肥呢? 去年4月為食肥妹因為轉工關係俾自己放左1.5個月既悠長假期，先去2星期日本，再去台灣一個月，每日食、買、玩無壓力既生活真係快活過神仙，點知旅程中途朋友突然傳來訊息通知婚訊並邀請做姐妹，當時為食肥妹終於醒覺自己已經肥到一個點唔可以再咁樣肥落去! 猶豫左一段時間，期間都有keep住留意網上有關瘦身/飲食資訊，有間營養公司既老闆固定有係某份免費報紙寫專欄，而佢亦係自己facebook專頁經常大方分享各樣飲食資訊，而最最最最最激發到我要報名參加減肥班係當時見到專頁入面其中一個瘦身個案，一名中年女士用左短短幾個月時間成功減去幾十磅，我就同自己講: ＂佢都得我無理由唔得!＂ 就係呢份推動力令我係返港後幾個月膽粗粗咁pm左呢位老闆查詢 ---------------------------------------------------------------------------------------------------------- 下回文章分享：初次拜訪營養公司 有興趣請多多分享，你地既支持係我寫落去既動力!! facebook專頁
