去塔門要先去黃石碼頭再轉乘一個鐘一班的街渡，街渡一至五同周末的班次有點分別，周末船票貴幾蚊。 去到黃石急忙揾街渡，未搭過街渡的我以為係三舨咁解，走去問先知佢地係快艇，隨時開得，但當我話一個人搭嘅時候，佢話要百二蚊，真係比佢嚇到滴汗！ 好彩呢個時候街渡黎接我喇~~(撒花) 去塔門只需20分鐘，上到船望住大海吹住涼風真的好舒服！ 搭左兩個幾鐘車、船..終於到喇! 塔門其實好細，地標唔多，一落船就先去天后古廟，不過好快行完。 沿途有幾間食肆，賣嘅其實差唔多，睇得出海膽炒飯，炸墨魚丸，無冰凍奶茶咁係塔門嘅特色小菜。 之後行返碼頭的另外一邊，要上幾層樓梯。在塔門住的大多是原居民，大部分都係公公婆婆，就好似呢位婆婆咁，係度住左差唔多半世紀喇！ 途經見到婆婆用緊柴生火煮食！ 繼續行就會去到瓊林學校，不過大約廿年前學校已經停辦，而家操場成為居民曬海味的地方！ 繼續向前行，係一段段樓梯，一啲草皮，但都有唔少先人嘅墳墓，所以都係建議大家唔好太興奮企係草皮影相。 沿著小徑一直行，會看到藍綠色的海，純白的浪花不停拍打岸邊的大石。 雖然無其他大島咁熱鬧，但塔門勝在有好多草地，仲有唔少牛牛！ 草地仲有唔少牛屎,大家要小心!! 沿著小徑行呀行走呀走，咦！呢度咁熟面口嘅！ 呢度咪係墾丁的鵝鸞鼻同風吹沙？？！！係呢一刻，我覺得自己好似飄零燕的Heidi呀！ 不過因為要趕船程的關係，無行上山睇疊石，大家去過或者下次去完，一齊分享下！ 走之前去返天后廟個邊叫個豆腐花食，不過呢度嘅豆花唔同南丫島嘅呀婆豆花，無木桶，全部裝好哂落膠兜。 唔同嘅係呢度有薑汁任倒，仲寫明無糖，不過當然有溝水啦！ 豆花十蚊，都係呀婆煮得好食啲！ 上船個陣太陽都開始落山喇 下次我一定會早d黎架 !!
