～今日的行程～ 4月13日：築地 -> 早：大和壽司 -> 場外市場 -> 午：Red Rock -> 原宿竹下通 -> 下午茶：Gram Cafe & Pancakes -> 表參道 -> 六本木新城展望台睇東京鐵塔 -> 晚：伊吹 (壽喜燒) 上一篇blog提過我地買左Skyliner來回飛＋72小時地鐵飛的套票， 今日我地就用72小時地鐵飛瘋狂搭地鐵啦。 我地今日晨咁早就起身， 6:55am就黎到築地市場啦， 當時係2018年4月11號， 個陣築地市場都仲未搬去豐洲市場架。築地市場其實分為場內市場同埋場外市場， 場內市場其實係 2018年10月6號關閉， 然後搬左去台場東北邊的豐洲市場， 而場外市場就唔會關閉，仍然保留係築地市場架。 我地咁早黎到築地就係為左食場內市場的壽司店， 最出名的壽司店係壽司大，其次就係大和。 由於壽司大同想像一樣，超級爆多人排隊， 於是我地就果斷放棄壽司大， 排第二出名的大和啦。大和只收現金，唔收卡， 大家要注意啊。 我地由7:00am開始排大和， 排左半個鐘就有得入座啦， 比想像中快呀。 入座之後， 侍應就會比塊毛巾你清潔雙手， 好衛生呀。 大和係食Omakase，即係廚師發辦， 所以唔洗睇menu點餐， 廚師比咩你就食咩。 就先就黎左玉子燒、海膽軍艦、吞拿魚卷， 個海膽唔苦，仲幾甜添。 然後就有吞拿魚腩壽司、仲有白色唔知咩魚壽司。 然後侍應就送上碗麵豉湯， 入面有蜆架。 然係就有超正的鰻魚壽司，入口即溶的感覺， 左面白色又係唔知咩魚壽司。 呢餐壽司係大滿足，連稅係3780円一個人。 食完野我地就周圍行下， 呢座係築地本願寺， 係參考左古印度style的佛寺黎架。 當時正值春天， d花開得好靚呀。 見到咁靚的花， 心情都好d呀。 影完佛寺， 我地就去築地的場外市場繼續食野。 場外市場會保留番係築地， 大家都仲可以黎呢度行下架。 係築地時不時都見到呢種運貨車左穿右插， 呢度竟然放左一架比人影相。 行行下見到有檔賣切好的生果， 見到粉紅色的士多啤梨， 少女心出哂黎， 忍唔住買番支黎打卡。 普通士多啤梨只係500円4粒， 粉紅色的士多啤梨竟然要1000円3粒， 成HK$24一粒，為左打卡完全無理幾錢， 不過d士多啤梨係清甜，幾好食嘅。 場外市場好多食店、好多野賣。 見到呢間玉子燒松露， 就買左杯試下。 260円，又甜又juicy，估唔到咁好食，推介！ 食完野口渴，就買左Suntory的蘋果汁，120円。 行行下見到有人拍緊節目，有無人知道佢地叫咩名？行完築地都只係8:30am， 我地就選擇番酒店眠一眠先啦。 ========================= 係酒店訓番一覺之後， 1:00pm我地就黎左原宿食lunch， 去左呢間好出名的Red Rock， 食超抵食的和牛牛排丼。 地址：東京都 渋谷区 神宮前 3-25-12 フジビル B1F 排隊的途中可以諗定食咩， 然後係門口部機度買定想食的餐。 排左大約10分鐘就可以入座啦。 牆上都係和牛牛排丼的畫， 好想快d有得食呀。 我地禁左兩杯可樂，一杯300円。 終於黎啦，呢個就係招牌第一位的Roast Beef Bowl 烤和牛丼， 我呢個係細碗size，880円， 燒到半成熟的和牛鋪係d飯的上面， 好似一座火山咁， 最頂頂的火山口係生雞蛋， 白色的溶岩其實係特製的乳酪醬汁， 撈埋所有野一齊食係勁正！ 男友叫左Japanese Black Beef Steak Rice Bowl 黑毛和牛牛排丼，1900円。 食完lunch，我地就行下原宿竹下通shopping啦。 行行下見到好出名的pancake店Gram Cafe & Pancakes， 個陣見到有人排緊佢地好出名的Premium Pancake， 我地見無咩人排，所以都排下。原來每日只係得三個時段賣Premium Pancake， 分別係11:00am、3:00pm、6:00pm， 而每個時段只會賣20個Premium Pancake！當時係2:08pm， 我地只係拎左一張籌 (因為想試埋其他款的pancake)， 行下街，到3:00pm就可以番黎食啦。 夠鐘番黎食Premium Pancake啦！ 呢度最低消費係一人一pancake架。 我地叫左杯Peach Grassm 桃味沙冰，550円。 主角Premium Pancake，950円， 三層的鬆餅，上面個舊係牛油， 側邊個pat係cream，隔離個杯係蜜糖。 雖然個pancake好鬆軟， 但一個人食哂咁大個pancake真係好漏呀， 好彩我地兩個點左唔同的pancake， 可以中和下。 但見到隔離個對情侶， 兩個人都各自食一碟Premium Pancake就覺得太over。 男友點左Banana Cream Brulee 焦糖香蕉pancake，1050円。 行完成條竹下通。 然後我地就行下表參道， 一行都係d商鋪，所以都無乜影過條街呀。========================= 番酒店放低d戰利品之後， 我地就去左六本木新城 Roppongi Hills， 六本木新城森大廈的52樓有個展望台， 叫做Tokyo City View，門票2500円， 係一個室內的觀景台， 360度睇到東京的市景，包東京鐵塔。另外，再加500円，就可以去屋頂天台的房外展望台 - Sky Deck， 唔洗擔心玻璃窗反光影唔到靚景的問題啦。 我地就緊係加多500円上黎Sky Deck啦， 不過Sky Deck 8:00pm就會關， 最後入場時間係7:30pm， 我地岩岩好趕到7:30pm黎到！ 呢度望到成個東京＋東京鐵塔的夜景真係好靚呀。 4月的東京，夜晚真係好凍又好大風。 其實周圍都好多人影緊相， 好不容易先影到無人係背景的相呀， 我地係Sky Deck影到最後一刻8:00pm先走呀。 係Sky Deck食左半個鐘西北風， 終於落番黎Tokyo City View， 今日係閒日11:00pm先關， 所以可以慢慢影相呀。 不過呢度影相當然無Sky Deck咁靚， d玻璃窗會影到反哂光。 東京另一面的夜景。 呢度有個酒吧。 d人都係揀窗邊的位坐， 欣賞咁靚的東京夜景。 我地最後仲幫襯左呢度的影相服務，1300円， 可以影到東京鐵塔，仲有靚靚背景＋道具， 但可惜唔會send digital的版本比你。========================= 晚上我地番左新宿， walk-in左間食壽喜燒的餐廳 - 伊吹。 地址：東京都 新宿区 西新宿 1-16-8 河野ビル別館2F 首先店員會送上每人一碟前菜，300円， 原來日本的居酒屋大多數都會收呢碟前菜錢架， 張單會有項收費係「お通し」(發音: otoshi)， 兩個人就會收兩個お通し。 男友叫左杯啤酒，我叫左杯梅酒，各500円。 間餐廳剩係得日文Menu， 但有位侍應婆婆識得講幾流利的英文， 我地每人點左個壽喜燒set，各3400円。 侍應首先會用一舊白色的牛脂肪查勻成個鍋底。 然後侍應會落粉絲、豆腐、冬菇、菜、洋蔥， 最後會將和牛鋪係面。 仲有少少材料剩，比我地遲d再落。 之後侍應就會落壽喜燒的湯啦， 然後就等佢熟。 壽喜燒的重點係d和牛 & 蛋汁， 和牛有入口即溶的感覺，好正， 點埋碗入面的蛋汁黎食，簡直有幸福的滋味。 全程幾乎都係侍應幫我地淥野食， 仲夾埋落我地個碗度添， 簡直係高級的享受。 我地當日係9點鐘walk in， 好彩個陣有位， 但10點就要交台比下一枱客人， 所以大家去的話就最好book定台啦！今晚總共食左8400円，好滿足呀。旅遊日期：2018年4月12日- 2018年4月17日 ========================= 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram: fabjai.tavel https://www.instagram.com/fatbjai.travel/ 收到個blog的最新update！ =========================《去東京玩》Day1 (超特別牛肉生日蛋糕,VR Zone玩Mario Kart,逃出人體實驗室)Day2 (築地食大和壽司,六本木睇東京鐵塔,Red Rock,Gram Pancake)Day3 (在新宿御苑抓住櫻花的尾巴,澀谷,秋葉原超正吉列牛)Day4 (淺草和服體驗,上野阿美橫丁,銀座沾麵)Day5 (富士急樂園FUJI-Q Highland,新宿雞肉火鍋推薦)Day6 (淺草附近超正鰻魚飯推介 - 鰻禅)
