一早一晚感到微涼，莫非連天氣都提示我又係開始打邊爐嘅日子?! 友人同我去左呢間，睇個店名就知食咩 裝修走古色古香風格，以電子PAD代替傳統餐牌，多款火鍋湯底及配料選擇，亦提供小食，幾多元化! 3款自家製飲品 (菊蜜/竹庶茅根水/香茅檸檬薏米水) ($23)，每款都岩打邊爐，比飲汽水更健康，比支香茅檸檬薏米水我呀.......唔該! 等緊個湯鍋滾起時，食住呢客黃金炸淮山 ($88)先啦，望見咁多咸蛋黃醬汁包圍住D炸淮山，未食已知邪惡度爆燈 即叫即製，入口相當熱辣辣，一股咸蛋黃嘅香味佔據晒口腔內，炸淮山口感似食緊炸薯條，令人食唔停口呀! 係多款特色湯鍋中，呢客養生花膠翅裙冬瓜燉鷄鍋 ($268)能夠脫穎而出，不無原因嘅，只係睇D料就知啦! 超級足料，包括冬瓜環，花膠翅裙，竹笙，松茸，紅棗及鷄餚製而成 先飲啖湯，奶白色好鮮甜呀，不禁一口氣飲左一大碗; 跟住再食埋佢個花膠，夠大隻又黏口; 竹笙索湯爽口唔在講; 連帶個冬瓜件亦好鮮甜，再食埋少少鷄肉，超級大滿足! 侍應推介呢客日式櫻花牛肉 ($298)，可以一牛兩吃，賣相吸引，肉色鮮明，一片片舖成個山咁! 可以當刺身食，點配柚子醋，清新嫩滑! 放入湯拖幾拖就食得，肉味仲出，但仍然能保持果份嫩滑，略帶少少油香，比較喜歡呢個食法 呢度嘅丸/餃類都係自家製，咁就叫D試下啦 身為芝士控嘅我，呢客手打釀芝士鮮牛肉丸 ($55)絶對要點啦，唔係細粒架，快D放佢入湯先 烚完仲變大粒左D，咬落感到相當札實，有口感，裏面有芝士餡，可以做到拉絲效果，芝牛呢個好拍檔，又一次取得高分! 呢個瑤柱竹笙菠菜餃 ($48)係新出品無耐，隻隻乾身飽滿 餡料係滿滿菠菜，食到少少竹笙嘅爽滑感，調味得唔錯，第一次食呢種餡料嘅餃子，原來都確實令人有驚喜感覺，至少我有! 呢客皇帝菜 ($48)，擠到個器皿實一實，變成"擠迫戶"......哈...哈.....! 個湯底已經夠甜，烚完嘅菜入口仲帶多一份甜味! 已經食到好飽，準備叫埋單之際，服務周到嘅侍應送上呢客冰凍紅棗桃膠雪耳糖水作為甜品，夠晒冰凍又清甜滋潤，忍唔住食晒成碗，感覺舒服，為呢一餐寫上完美句號! 一餐打邊爐嘅成功關鍵，不外乎湯底及配料質素，呢間用足料，唔少仲係自家製出品，食客係食得出嘅! 邊有得拗?!! (哈..哈....) 打邊爐 : 佐敦廟街286-289號志華大廈地下A舖 contact me : gingerszeto@yahoo.com.hk
