開飯群組成員吹鷄, 提議去呢間越南餐廳開飯, 難得又有人自動獻身, 當然如時出席啦!

呢位組員已經食過幾次, 由佢發辦當然出事機會率大減啦, 我地就一於等食..............哈哈!

先黎個青木瓜沙律, 份量都幾大, 夠3-4人食, 青木瓜枹出絲來, 口感硬度適中, 淋上酸汁, 配以香口花生碎粒, 雙重口感, 味道清新!

濱海呢個名聽就聽過但從無叫過, 今次有機會見識下啦, 呢客香芧豬肉濱海有5片類似"檬粉"既物體 (應該係), 食法係以生菜, 夾一片"檬粉"再放上肉類夾埋一齊食, 可以加少少酸辣汁一啖放入口就仲滋味, 豬肉食到幾香既香芧味, 肉質偏軟身!

呢碗份量十足既火車頭湯河, 材料多樣化, 有牛丸, 牛根, 牛肉, 牛展, 牛栢葉及蘿蔔, 啖湯充滿牛既鮮甜味, 加上面頭再有香葉, 又有另一種香味, 喜歡牛既友人表示相當滿足~

一客6隻既香芧鷄翼, 每隻都非常飽滿, 顏色炸至古銅色相當吸引, 上枱時已經聞到惹味既香芧味, 食時要小心"辣"口, 一啖咬開食到皮香肉嫩, 肉汁係口腔內爆發! 冒住爆瘡都要食多隻呀...............超好味!!

雖然侍應數目唔太多, 但行動敏捷, 上菜速度亦快, 碟碟都熱辣辣, 價錢又抵食, 今餐不禁要比個LIKE呢位組員^^

志明越南料理 : 天后威非路道4號地舖

contact me : gingerszeto@yahoo.com.hk