要係銅鑼灣搵一間CP值高既西餐廳, 可謂話難唔難, 話易唔易, 但若要我"交出" 一間, 呢間應該會係其中之一 店內環境唔算太寬敞, 燈光昏暗, 幾適合二人或小數朋友用餐好地方, 好多枱上已放置"留座"牌, 好彩我一早訂好位! 晚餐時段設套餐, 包沙律, 餐湯, 主菜及飲品, 主菜選擇有9款, 價錢由百幾至二百幾, 算親民價錢! 頭盤可另加$58升級至法國鵝肝配焦糖酒醋草莓, 另有陳醋沙律菜! 一片有相當厚度既法國鵝肝, 底層有薄脆多士, 配以糖酒醋藍莓中和油膩感, 一咬香濃鵝肝油份係口腔爆發出黎, 配咬就食到酸甜藍莓味, 雙重味道! 另一款大蝦占米多, 隻蝦果然係夠大隻, 起肉切粒煮香再放返上蝦殼上上碟, 味道偏濃味, 蝦肉夠爽口及蝦味濃郁, 可以伴食沙律菜沖一沖味蕾! 食完頭盤就到熱湯出湯, 亦可加$38升級至: 蟹肉南瓜忌廉湯, 完全食出甜美可口既南瓜味, 再繼而滲出絲絲蟹肉味, 喜歡清新感覺既友人表示滿意! 另一款為口味較重既黑松露菌忌廉湯, 熱辣辣上枱時已聞到好香黑松露味, 湯比起南瓜湯較為杰身, 飲落食到菌粒, 有少少咬口, 總括黎講好香黑松露菌味, 飲完都幾飽肚! 主菜點選左呢款黑松露麵包蟹意大利飯 ($228), 將煮好既意大利飯"釀入"於麵包蟹蓋中, 亦設有一少碗黑松露伴食! 意大利粉飯煮得軟硬度唔錯, 飯粒索晒湯汁而煮成, 再配以香滑忌廉汁, 每一啖都食到香滑感, 而飯內亦有蟹肉及菇菌等材料, 放少少黑松露於飯中, 香濃味倍增, 相當唔錯的一個意大利飯! 肉食獸的我就偏愛呢款德國式燒咸豬手 ($228), 除左主角豬手外另有一藍炸薯條及少量陳醋沙律菜, 夠晒份量 廚師已預先將咸豬手離骨, 等客人進餐時比較方便, 好細心呢! 豬皮食起黎比較煙韌, 食得人滿口膠質感, 即時諗起"骨膠原" (心心眼中), 而肉質算幾嫩滑, 味道又唔會過咸, 配以特製醬汁一齊食, 酸甜味道可減底膩感! 炸薯條亦炸得乾身, 好味! 套餐包埋餐飲, 我點了呢杯外型非常趣緻既Cappuccino, 以奶泡做成既3D貓仔"浮"係杯咖啡上, 飲滿香滑無比, 水準拍得住專業咖啡店! 設加一服務費, 侍應服務態度唔錯, 咁就造就左呢一餐美好既晚餐! 阿麥廚房 : 銅鑼灣加路連山道9號地舖 contact me : gingerszeto@yahoo.com.hk
