由於坐12:46火車嘅關係，去到順化已經接近4點，即刻去酒店放底行李，再飛奔去皇城，因為皇城5點半就停止售票，但講皇城之前，好想分享下呢個地方嘅人對遊客既招數。 首先，係的士司機，我地搭咗3次的士，但兩次個的士司機都話無散紙而收我哋整數，例如170000VND，佢就會收你200000VND，雖然佢呃極都唔多，但當次次都係咁既時候，就真係會唔順氣。 然後，我哋入皇城前因為太肚餓，見到有檔買青芒，預咗會貴，所以問下價，個阿姐就話Fifteen，即係15000VND（大概5HKD)，咁都合理，所以同佢買咗一個，咁我哋就俾咗張100000VND佢啦，佢就用同一招數，話冇散紙，於是塞多個芒果埋黎，然後俾張20000我哋。大姐，條數點計都唔岩啦，幾秒之後，我哋都反應過黎啦，原來喺Fifty唔係Fifteen，認真鬼馬。佢既然冇散紙咁我哋就放低個芒果，諗住拎返啲錢啦，個阿姐就一個轉身射個三分波，秒速收起啲錢。然後又重覆塞個芒果埋黎，我哋就堅持要佢找錢，於是佢就叫咗個細路去唱散紙，企咗喺度10分鐘，我完全感覺到自己塊臉係黑咗，黑到個阿姐都「唔聚財」，最後自己走咗去隔離檔度唱散紙，然後我哋一走開，個細路就唔知喺邊出返黎啦。 講真，去越南都預咗會被人呃，但唔好個個都用無散紙呢招呀。等大家有個概念，我哋喺峴港Lotte Mart買兩個切好嘅青芒都只好25(25000VND)，可想而知，我哋係多麼的似一條水魚啦。 好啦，最後我哋喺5點前買咗飛，嗱嗱聲衝入去，順化皇城喺阮朝既故宮，1993年開始更被列入為入世界文化遺產名錄，但如果你冇導遊，咁最好就惡補下歷史先去，因為裏面資料同指示都欠奉，行完都唔太清楚自己去到邊，如果你時間夠，就可以慢慢行，慢慢揾。 其實內裏既建築都好靚，好細緻，一啲都唔悶，細心睇真喺會覺得以前嘅人好有藝術觸覺。行咗一個鐘之後就出返去，但其實唔知自己行完未，然後喺附近食咗好好食既越南菜，因為太肚餓同太好味嘅關係，自己食先，無俾相機食。
