尋晚係大年初一，打算同朋友去神屋流博多道場，開開心心食個晚飯。但原來神屋流博多道場已經改咗名叫惠比壽居酒屋，但唔緊要，喺門口望咗望個menu，原來同以前都係一樣，所以就入咗去。 好記得之前食神屋流博多道場係同兩個朋友一齊嚟，我哋都點咗個相撲鍋、南蠻炸雞、串燒同鐵板牛肚等。嗰陣覺得個牛肚好好味，個汁調較得好入味，牛肚都唔會話好好好好肥，張住晒個嘴。而且個炸雞都好特別，食落感覺唔會好熱氣，個雞味亦好出，食完一舊係會想繼續食嘅。可惜好景不常，依一切一切都變晒嚕，今次食惠比壽居酒屋真係好失望，好嬲同好唔開心。 今次兩個人，叫咗博多相撲鍋、燒花虎蝦（2隻）、宮崎南將炸雞、芝士焗蘑菇煙肉同Asahi生啤酒（1杯）。我哋都食咗600蚊到，肚係飽嘅，當中包括一肚氣同麻麻地嘅食物。 博多相撲鍋？ 第一樣嚟嘅食物係「博多相撲鍋」，我哋滿心歡喜咁畢咗啲「豬肉」，點知愈撈愈唔對路，唔同圖文真係咁不符？啲豆腐呀，蜆呀，菜呀同蝦呀，所謂好多多好多嘢都唔見晒嘅？等咗5分鐘，終於有waitress經過就問問啦：「我想問依個係咩鍋嚟架？」，「嗯……應該係牛肚。」唔怪知得無晒啲嘢啦，原來上錯鍋，真係一場歡喜，一場空！ 真正嘅博多相撲鍋 個湯底係豬骨湯，有應有嘅水準啦，都好欣慰無跌穿水平線。啲蘑菇、金菇、娃娃菜、芽菜、豆腐同蝦都唔錯，Fabulous Kira都食得幾滿足，始終係好普通嘅嘢，如果咁都整得唔好食真心無嘢好講啦。但條魚真係腥到暈，我唔小心畢到啲甩咗出嚟嘅骨，臭到呢，腥到呢，真係即刻無晒任何食慾，唔食返兩粒香口膠心情都返唔到嚟。仲有啲蜆都幾喊出嚟，竟然可以有砂嘅？師傅師傅，可唔可以處理得好少少咁少少呢？ 宮崎南將炸雞 又係令人好失望嘅dish，仲要喺menu寫住「no.1」，真係失唔失禮啲呀？同以前未改名相比，味道點解可以差咁遠？件雞嘅質地同味道，都好差，唉！ 芝士焗蘑菇煙肉 Fabulous Kira好鍾意食蘑菇同薯仔，見到menu到，好似有我想食嘅嘢，當然要點啦！好彩依道菜無令我失望，薯仔好味，個汁都好好味，終於有少少開心返。 燒花虎蝦 依2隻燒花虎蝦係用芝士整嘅，不過不失啦，但可能有少少期待，始終都有少少失望嘅，唔係真心話咁推介囉。 食物就講完啦，服務態度真係要鬧一大輪呀！今次大年初一諗住食餐好嘅，點知食到成肚氣。想搵人加茶，等咗10分鐘都無人應，啲staff口面黑到喊出嚟，我唔知係咪公司俾半工你哋啦，但唔好要客人受氣囉！所謂上樑不正，下樑歪，一個短頭髮嘅女人，應該係高級啲嘅經理（?!）都咁臭嘴瞼，下面班細嘅又點會好呀！臨走前，如果我唔牛咁眼望實佢，佢都唔方會講多句「多謝晒，拜拜」架啦！從來未去過一間日本餐廳，收緊600蚊2個人一餐啲服務態度係差到咁架，我講「Thank you」都眼尾唔望下我，個頭點一點，表示「唔駛客氣」都唔係好難為你呀嘛？真心唔會再嚟，亦唔推介嚟受氣，吉野家收緊20零蚊一個人，服務態度都好一千倍呀！ 惠比壽居酒屋的整體評分 味道：5.5/10 服務：3/10 環境：7/10 價錢：7/10
