既然講開檳城的熟食中心，那就再介紹另一個我頗喜歡的本地美食廣場 Sri Weld Food Court。Sri Weld 在當地既規模唔算大，但其實都有十幾廿檔賣不同款式的美食，地道既炒粿條、蝦麵、雲吞麵、曼煎糕及魚頭米粉等，統統可以係度搵到，而且水準唔差，可謂卧虎藏龍地。 或者先講講檳城熟食中心既飲食規矩，基本上每個地道既美食坊/巴剎都由一檔飲料店包辦，無論你食啲乜，甫坐低就一定要叫嘢飲，否則會有罰款 (RM0.5 - RM1不等)，所以你見到枱枱客都會有杯嘢飲係手。 回到場內既美食，人氣最旺盛的，必定是近門口的那檔米芝蓮推介既辣死你媽。呢檔Ali Nasi Lemak，有雞、魚、魷魚、咸魚等Topping可配，RM3/個，可能是全世界最便宜的米芝蓮推介美食。蕉葉包裹著椰漿飯，結合森巴辣椒，係頗辣，但好香好有層次，每份跟半隻蛋，是次揀左咸魚Topping，成件事好惹味，難怪這裡天天大排長龍。 有次經過炒粿條攤檔，見店主在炮製豬油渣，引到我口水流。粿條炒得夠香口，豬油渣當然功不可沒，結合腊腸、蝦等材料，食炒粿條記緊要加鴨蛋，會好好多好多。 蝦麵建議揀油麵摻米粉，吃起來更有層次。呢度既蝦湯唔差，但我覺得三條路888既出品，會更得我歡心。 雲吞麵可以選湯麵或者撈麵，是次要左撈的，加雞腳。檳城既雲吞有別於香港，多以豬肉作餡，餡亦偏細，呢檔既檔主每日自己新鮮包製，當地的叉燒又是切得薄及偏瘦，好在都唔韌，鹵雞腳就好入味，同埋要讚佢既麵條，完全無鹼水味。 檳城既豬腸粉，跟香港有少少唔同，會切粒或者揚開，醬汁亦不是甜醬麻醬，而係帶咸味蝦羔醬。這種腸粉，港人可能吃不慣，但就是檳城獨有，你在馬來西亞其他州份，也吃不到這口味。埸內仲有曼煎糕、魚頭米粉，甚至中式唐餅等，可是我胃納有限，下次吧！提一提，這裡週日是不營業的。Sri Weld Food CourtBeach St, Georgetown, 10300 George Town, Penang
