Day 1 30/12/2014 因同行友人請假唔方便, 所以星期五hk express晚機出發去台中 check in後仲有時間, 就去左2號客運大樓既觀景台睇日落, 之前次次都搵唔到, 今次終於都去到! 原來係係戲院再入, 學生門票大約$8 (觀景台上) 衝上雲霄好似就係成日係度取景!? 去到台中, 我地住既hostel係朝馬轉運站附近, 係機埸搭150巴士就可以去到, 車程大概1小時, 如果去逄甲的話都應該係朝馬轉運站果頭轉車, 台中既司機都好friendly, 上車問問司機就可以。 巴士係用悠遊卡(台灣八達通)/現金比錢, 不設找續, 台中機場出市區只有巴士同的士, 所以如果搭巴士記住要唱定散銀! 因為係廉航, 飛機上無野食, 我地去到差唔多夜晚10點都未食野, 超肚餓, 所以就衝左入7-11食關東煮 有辣同唔辣, 不過辣比較好食 快快番到hostel放低行李, 就出左去逢甲夜市食野, 雖然係夜市, 但係11點幾去到都有4成鋪頭收左檔, 所以即刻掃左幾樣食物 台灣手抓餅 花枝燒好食! 炸雞 食飽飽後就行番hostel訓覺 zZZ Day 2 31/12/2014 本身諗住第二日下午去台北誇年, 但台北今年好多人去, 客運(長途巴)下午無晒車飛, 所以要朝早7點搭過去台北, 惟有係車度訓X.X 客運係朝馬轉運站搭, 有唔同公司的, 上次搭和欣客運, 今次試下國光客運, 和欣客運感覺上新淨D, 座位闊落, 仲有獨立既電視可以睇, 國光略遜一籌 一早去到台北, 諗住去鼎泰豐信義店食早餐, 應該無咁多人, 點知未開門已經有好多人排隊, 仲要係日本人 :O 好彩我地都唔係等左好耐就有得入去食 from google, 台北捷運東門站5號出口, 一出就係 怕拎住行李唔方便既朋友唔使怕, 因為鼎泰豐係有停gip位比遊客放行李, 坐位亦有預留位置比你放野 黎鼎泰豐, 識食一定係食牛肉湯麵, 唔好睇佢個樣咁平凡, D湯其實好好飲, 而重點係香港鼎泰豐無呢個麵!! 諗起都肚餓... 牛肉湯麵 我地仲叫左炒蕃薯葉、酸辣湯同小籠包。小籠包香港人一般鍾意爆汁食, 但原來唔係咁食架! 豉油同醋既比例都有建議, 而服務員既態度好好, 會問你想要咩比例幫你溝番 正宗食法?! 另外夜市食物令我地有D熱氣, 就去附近一間超市睇下有無涼茶, 但台灣應該係無涼茶既, 所以我地試新野 登登登櫈 仙草凍! 呢d好似便利店都無乜, 要去超市先有, 而且呢個唔係野飲, 係o者喱狀, 少少甜甜地, 清熱既效果都ok, 唔夠廣東涼茶勁, 但點都好過冬瓜茶, 點解d台妹無暗瘡?!點解!!!! 食完早餐好滿足~~之後去左台北的民宿放低行李, 休息一陣先出去 今次住公館站, 去師大好近, 捷運1號出口轉右行仲有個商圈, 有野食有野買, 仲唔係遊客區, 唔鍾意去普通夜市可以黎行下 大約3點我地就去左西門町轉個圈, 發現一間幾得意既糖果店 點擊圖片放大 +3 個袋都好靚架! 西門町相信大家都好熟, 唔使多作介紹, 但係呢間叫馬辣既任食火鍋真係不得了 menu 以上幾種肉都係任叫, 湯底要左麻辣同膠原蛋白, 我去譚仔淨係食到3小辣, 但係呢個麻辣都食到, 唔怕太辣 點擊圖片放大 +2 有菜、生果、甜品 醬料都有好多選擇, 混醬一流 野飲有熱有凍有花茶, 影得唔好唔放上黎了 仲係覺得無咩特別?! movenpick 同 haagen dazs任食吸唔吸引到你呢?(各8種味) 網址: http://www.mala-1.com.tw/ 地址：台北市萬華區（西門町）西寧南路62號2樓 午餐 498NT/人, 1600前入坐都係叫午餐, 可以食2小時 食咁飽做咩? 因為要去台北既electric run! 跑道裝飾得好靚, 好多影相位, 音樂強勁, 又有好多識發光既紀念品賣, 大家都好high 賽道全長5KM, 行下影下相用左大約個幾鍾 點擊圖片放大 其實筆者係香港都有跑馬拉松, 但第一次參加渣馬10公里既時候真係嚇親, 因為實在太多人企係賽道行、自拍等等, 真正想跑既人完全塞住, 想影相玩下既不妨參與呢類型既比賽, 氣氛好D, 又唔會怕塞住其他人(個人認為colour run就免了, 因為會污染環境) 黎到12月31號晚上, 點少得我地黎既目的-- 誇年呢 我地黎到101, 已經有好多人係度, 街上面封左路, 可以坐係馬路倒數, 周圍亦有好多小販賣野食(當然比平時貴好多), 又有DJ打碟, 好熱鬧, 我地搵左個靚位坐低, 一邊傾計一邊等倒數 好多人呀! 因為封晒路, 要行番出去先有得搭車走, 行下行下都行左半個鍾 黎到台灣個胃好似特別大, 倒數後又覺得好肚餓, 就一齊去食宵夜 呢間牛肉麵係朋友推介, 叫建宏牛肉麵(好似改左名做富宏牛肉麵), 24小時開放, 味道比較地道, 價錢亦好抵, 不過有D難搵, 所以我地搭左的士去 大既牛肉麵真係好大, 夠2個人食 地址:108台灣台北市萬華區洛陽街69號 Day 3 1/1/2015 2015年第一日, 我地去左台北動物園睇動物 動物種類好多, 動物園都夠大, 只係台北都係假期, 所以好多人 唔知咩鹿 長頸鹿 黑熊 草泥馬!!! king kong, 真係好似人類 最期待既企鵝館維修了 T_T... 行左好耐, 大家對腳都攰, 北投上次去過了, 就去烏來浸溫泉, 烏來要搭捷運去新店站轉公車, 但中途塞車塞左2個鍾 .____. 烏來有條老街, 應該係呢度附近 一落車就狗衝去浸溫泉, 求其搵左一間, 男女分開既裸湯, 入到去得我一個女仔, 所以播埋歌haha好relax, 浸完成身鬆晒, 不過自己一個浸有d悶悶地, 而且上次去北投果間春天/水都溫泉比較乾淨, 因我浸浸下見到隻不知名昆蟲係水入面, 攪到唔敢再去果個池 因朋友堅持要去士林夜市, 浸完就搭番巴士去士林 士林夜市間豪大大雞扒隔離有一間食泡泡冰, 花生味好好食, 好香, 雞蛋牛奶就有d中伏, 得普通甜味 地下街, 好大條腸 食左魯肉飯同炸蟹仔, 外賣左附近既豪大大雞扒同訶仔煎 行行下比我見到來自香港既13座牛雜!!! 梗係買番串支持下!! 13座牛雜 Day 4 2/1/2015 第4日, 離開台北去阿里山 早餐 又去番台北轉運站扣國光客運去嘉義(之前買飛一次過買晒, 無得轉番和欣) 一落車就到左同客運站痴住既台鐵站 台鐵站 岩岩開門 有幾款便當選擇 味道還可以 我地參加左阿里山既2日1夜local tour, 所以食住便當等遊黎接我地, 但等等下發現唔見左悠遊卡, 攪左一大輪終於係客運搵番, 叫人送番客運站比我地 大約12點, 私家車接我地上到阿里山, (山路九曲十三灣, 暈車浪暈到傻, 記得食暈浪丸) 好凍好大霧, 好彩飯店有大褸借, 不過個暧氣就... 所謂local tour, 就係第一日比你自己休息下行下, 第二日包火車上山頂睇日出, 導遊帶行森林遊樂區, 之後接我地去奮起湖, 最後送番我地去嘉義, 其實都幾自由, 唔似跟團 阿里山seven驚見雞汁味著片 長知識了 唔知係咪期間限定既熊仔餅, 左邊幾好食 行左陣, 唔知有咩做就去左食飯, 晚飯係團包左的, 都夠飽, 但菜式無咩特別, 食完番酒店沖涼訓覺 Day 5 3/1/2015 4點要搭小火車上山睇日出, 心諗冬天邊有咁早日出, 原來有飛都要排隊, 排到打晒蛇餅, 好彩趕得切上到去。火車站就係seven附近, 上到去都有野食唔怕餓/凍親 好可惜睇唔到日出呢.. 落去搭番小火車, 個團有包早餐, 早餐都幾豐富, 有麵、粥、饅頭、豆漿、菜等, 仲有好多野比你送粥, 筆者之前去過合歡山睇日出, 早餐都係類似既野, 可能山區主要都係食呢d, 少食肉 食完早餐番酒店執野/休息一陣, 出左去行森林遊樂區, 睇神木、吸芬多精 姊妹潭 其實都幾似豬既 永結同心 神木呀 求你賜我食極唔肥既body 回酒店check out後, 司機係酒店門口等我地, 送我地去奮起湖 司機知道我會暈浪比我坐前面, 感覺好好多 奮起湖有一個鍾時間參觀, 因為地方好細, 所以真係夠用 一入黎見到呢檔又衝入去食, 但其他小店應該好食d, 年青人就係衝動 堂食既鐵盒, 忘記幾錢了, 有外賣紙盒、可以帶番屋企既木盒、鐵盒, 堂食有例湯任裝 有雞脾、豬扒同蛋, 比台鐵便當好食, 店內裝修唔錯, 不過好多強國人 食完出去行下傳說中既奮起湖, 其實同九份都幾似 就係呢檔, 行行下聞到好香, 似乎比較好食 鐵蛋, 幾好食, 買左一盒share 有好多可以買手信既鋪頭 點擊圖片放大 行行下又見到個奮起湖火車站, 真係會開車的, 但目的地唔肯定去邊度 火車站入面仲有個小型鐵路博物館, 有展出幾架蒸汽火車、相、模型等 去完奮起湖, 司機車左我地去天長地久橋, 估唔到天長同地久係分開既 先走過地久橋 吊橋多人行起上黎, 真係有少少fing下fing下 地久橋之後要上樓梯行天長橋, 但因為畏高所以無上去 朋友去左行天長橋, 我就係附近行下, 有個天長地久石, 許願鍾, 廟, 同一D賣小食既檔 許願鍾 真係用原木烤, 加緊木 雞肉捲, 好滑 天長地久石 睇完就上番私家車, 完成阿里山既local tour 番到嘉義, 5點幾去到台鐵站, 又係吃貨時間 除左好抵, 仲係好抵! 仲要有栗米湯!! 火車站外過馬路後亂行見到, 一般都係炸既, 但呢個係水煮熟, 健康d 之後搭台鐵番台中 車飛, 搭一個鍾 台中火車站附近其中一個景點係宮原眼科, 我地去左食雪糕 花多眼亂~~~茶果堆好神秘, 聽人講"思念總在分手後"好酸, 點知"明天會更好"都係好酸 客家擂茶似芝麻味, 朱古力好食, 可以再濃D 朱古力雪糕天堂 三球雪糕有四個配料送, 我地要左鳳梨酥, 香蕉, cheese cake, 仲有一個唔記得係咩 鳳梨酥最好食 食完搭台中新起既BRT番第一日住既民宿 BRT係巴士版既地鐵, 比一般巴士快同埋少站, 上巴士前後要入閘出閘的 唔同既線有唔同既站 天寒地凍, 最好就係食薑母鴨, 呢間係有一次迷路後無意中食到的, 類似大排檔, 幾地道, 隻鴨好補身, 食完會熱辣辣 呢間野最好就係開到好夜, 去完夜市再黎都得 咩叫大陸妹?! 點擊圖片放大 雖然睇落有D油, 但食落唔油膩 地址: 407 台中市河南路2段329號 Day 6 4/1/2015 最後一日, 執好行李後去左附近既家樂福(超市)買早餐食 家樂福入面有間mister donut, 見到好吸引又買左黎食 點擊圖片放大 係家樂福入面買, 見到幾得意就買黎試下, 仲買左D雞脾, 幾好食 然後就搭車番台中機場搭飛機番香港了~ 好期待下次旅行!
