放工約人食飯，唔係去旺角就銅鑼灣，貪搭車方便，食夜啲都有車番屋企。雖然話志在一班人聚吓吹吹水，有嘢填飽個肚就算，但都唔代表求其揀一間嘅。經過無數次中伏之後，最近我 依莉詩 搵到間食物質素算唔錯，又坐得舒服嘅旺角放題店了！ 日式神舍佈置坐得舒適 食得放題都係一大班人食，最緊要係坐得舒舒服服，唔會話太嘈傾唔弓計又或者太靜唔好意思講嘢。而呢間模仿日本神舍佈置嘅放題，唔單止有鳥居同清酒桶裝飾，入到去每個座位之間都非常寬敞，張枱係平時食放題嘅 Double 咁闊，同埋有唔少卡位，有私人空間，坐係當中，感覺絕對唔似食緊放題！最正係我哋食宵夜場，食完無乜人，仲可以四圍影下相添！ ▲ 有別於平時食放題嘅侷促感覺，餐廳有唔少卡位，5 - 6 個朋友一枱有唔少私人空間。 ▲ 中間嘅長凳就比較窄，同平時食放題差唔多。 等位唔怕悶，免費寫繪馬摺紙鶴 除咗裝修好似日式餐廳咁精緻，喺等緊位嘅時候都唔怕悶，門口掛滿許願牌，可以免費拎木板寫字許願。雖然我試咗好多支筆都無墨，不過去假日市集寫一塊都要 $20-30，反正等緊無嘢做都可以玩吓啊！坐到埋位都仲有嘢玩，餐紙上面有教大家點摺紙鶴，只要將和紙部份撕落黎就可以摺，幾得意呢！ ▲ 只要將和紙部份撕落黎就可以摺紙鶴，摺完就差唔多有得食！ 食物款式多，新材算新鮮 講番食物先，雖然食物方面無太多綽頭嘢，無近年興嘅蒸氣火鍋同磯燒海鮮，只係專注刺身同熟食，不過以旺角放題質素算係高質。壽司、刺身、燒物、鍋物及炸物等要食嘅都有，我哋 5個人叫咗幾多嘢食，都無話特別中到伏，反而燒手羽先（雞翼）同串燒日本番薯好有驚喜，食材普通，但整得好脆好好食呢！ ▲ 食放題嘅主角非刺身莫屬，呢度嘅刺身都算新鮮同埋幾厚身，特別係我最愛嘅帆立貝竟然仲厚過元氣，仲好新鮮添！另外，象拔蚌刺身都好爽口好鮮甜。 ▲ 壽司方面唔算太大件，一啖一件啱啱好！海膽軍艦好足料，食落 Creamy 鮮甜，好食過葵廣手卷呢！而和火灼和牛壽司都唔錯，雖然未到入口即溶，但最少無筋夠淋。 ▲ 焗蠔唔係好大隻，但總算係連殻嘅，唔似平時啲放題放粒急凍就算，加上都好多芝士，好吸引！ ▲ 芝士虎蝦亦都放滿芝士同蟹籽，味道好濃郁。 ▲ 牛柳粒雖然唔可以話入口即溶都好入味好淋，值得一試。 ▲ 我哋戰鬥力唔夠就無點到甜品，但串燒日本蕃薯整到內脆外軟，熱辣辣好好食呢！ 神輿日本料理 旺角彌敦道593-601號創興廣場5樓 電話：3160 8456 / 3907 0881 營業時間：星期日至四4pm-1am、星期五、六及公眾假期4pm-2am 旺角 1日 4餐，由朝食到晚！青檸烏冬係劣食？韓系日式吉列牛一定正？ 5萬呎水產市場登陸黃埔！九號水產 4大食店率先睇 – 蟹痴必掃北海道皇帝蟹 睇更多拍拖好去處！ FB： 依莉“詩”生活 IG： ErieDiary 網址：ErieDiary.hk YouTube：Diary Erie
