第一次食beans果時，佢仲係得荃灣角落嘅一個舖位， 時至今日，已經搖身一變成為小型連鎖咖啡店。 能夠做到今日咁成功，食物自必然都有返咁上下水準。 相約好耐冇見嘅朋友黎食下午茶， 平日嘅下晝四點，完全唔使排隊。 朋友未食晏，叫左一碟忌廉汁鮮蟹肉蟹棒件蟹子意粉 (Lunch menu $58)。 我就要左個抹茶流心吐司(Afternoon tea $58，包一杯野飲) 同Earl grey latte。 忌廉汁鮮蟹肉蟹棒件蟹子意粉，只係試左少少就成為我嘅推介！ 忌廉汁濃稠，形容佢為忌廉醬也不為過。 數量都幾多嘅蘑菇同洋蔥令整個醬汁味道更加豐富， 蟹子亦令個意粉更有層次口感。 蟹肉同蟹棒，我個人其實唔太中意食，但朋友讚不絕口。 單單係醬汁，已經令中意食creamy野嘅我十分滿意。 至於我食嘅呢個green tea lava toast，亦都充滿驚喜。 以前光顧beans，印象中甜品或者蛋糕類都唔算特別出色， 但呢個流心吐司令我對呢度改觀。 一上枱，先係俾佢咁巨型嚇親， 下午茶以一個女仔嘅食量就有點多，兩三個人分都可以。 竹炭吐司烤得香脆，如果齋食有少許苦味， 但同抹茶雪糕又或者裡面嘅抹茶醬一齊食，甜度剛剛好。 吐司面層裝飾精緻，除左雪糕、berries， 仲有好多果仁同脆脆，口感豐富。 揭開面層，吐司入面係一塘抹茶醬， 輕輕切開吐司就有流心效果。 飲品方面，朋友試左rose earl grey latte， 我就要左普通earl grey latte。味道唔算特別， 個人認為earl grey味未夠濃郁，只有甜味，有少少失望。 總括黎講，今次再食beans都滿有驚喜。 一間餐廳好難樣樣皆精，beans整體黎講已經合格有餘。 ♦荳子 Beans 荃灣海壩街99號地下 (將軍/大埔都有分店) 星期一至日 11:00-23:30(荃灣店) / 11:00-22:30
