白色為主調嘅裝修，深長嘅佈局加上恰當嘅餐枱距離，實在令男人有少少去咗南法嘅感覺。環境重要但講到尾食物質素先係重點。 一坐低侍應就放低兩粒番茄加個檸檬，食得我知，但應該點食好呢，好在路在口邊，都係問一問穩陣啲。原來係俾你自制檸檬水同埋整個番茄伴法包。 頭盤點咗炸魷魚同牛仔肉球。炸魷魚男人覺得係對鹽酥雞嘅致敬作品，調味粉係脆脆炸粉上面的確好食，但就浪費咗新鮮嘅魷魚。個牛肉球黏口得來有口感，整得唔錯，但呢個菜出色嘅係佢個番茄底汁甜酸度適中，溝埋一齊食真係互相呼應。 主菜有煎焗豬扒同薯仔粉團，豬扒煎得岩岩好，有𡁻頭得嚟唔會柴，個肉汁口感豐富，真係好想叫個白飯嚟撈汁； 粉團搓得好好入口即溶，面頭落咗粗粗嘅羅勒葉，完全提升咗個汁，令個菜食落唔會太膩。 結尾嚟咗蘋果批同紅桑子意式雪糕，蘋果批焗得脆口，蘋果甜度適中加埋個雲呢拿雪糕真係好滿足，個意式雪糕口感直頭係鳥結糖噤，就係牛奶變咗牛奶雪糕囉，唔使𡁻到牙齩軟。總括嚟講，哩間餐廳係好好味道，環境好同侍仔嘅服務都高於期望。惟調味方面可以輕手啲，同菜式創意方面要落啲苦工。
