Day 20
從未諗過會踏足Space City侯斯頓, 無端端路經此地到當是bonus吧!? 朝早六點幾抵達機場, 個機場都幾大, 要搭單軌車轉terminal, 離境大堂有隻拎住德州旗的太空卡通牛~ 等左個幾鐘再搭九點的內陸機往達拉斯~ 然後就到親戚屋企沖個涼同整理下行李~ 下晝就去左State Fair of Texas, 為一年一度在達拉斯舉行的嘉年華會, 為期廿四日~ 場內有band show、攤位遊戲、機動遊戲、小食攤、表演展覽、車展等~ 其實入場費本身唔平, 場內玩野仲要逐樣計, 都幾唔抵玩~ 夜晚就去左Saltgrass Steak House試試德州牛扒, 點了份medium rare的12oz. Prime Rib, side要左炸洋蔥, 隨餐還有牛肉湯一碗(USD$23)~ 塊扒生熟度perfect, 肉嫩味濃, 肉汁豐腴, 好掂~ 性價比黎講真係贏晒, 同樣質素嘅牛扒響香港食一定唔只呢個價錢~

Day 21
是日為血拼日, 在Allen Premium Outlets行左4個鐘, 主力都係買名牌衫褲, 有D清貨items真係好抵~ 晚上就到達拉斯牛仔主場American Airlines Center, 入場欣賞NBA季前熱身賽Mavericks vs Thunder~ 門票一早上網買左(USD$36), 坐的是中間山頂位~ 由於只係熱身賽, 個場都有唔少吉位, 所以半場都換左個位置更好冇阻擋的位~ Nowitzki因傷冇得出, 有點失望, 好在對家都有出杜蘭特, 不過只係出左十幾分鐘~ 場內氣氛係唔錯, 有司儀嗌mic鼓動球迷幫主隊打氣, 場邊螢幕又會投射D打氣字句~ Let's go Mavs! 場波好緊湊, 一直都是幾分上落, 兩隊都未試過大幅領先, 惟主隊於最後幾分鐘連番失誤, 終被雷霆拋開比分~ 為避開人潮, 見大局已定, 臨尾得返幾十秒timeout時就走人~ 睇完波到附近的Village Burger Bar食, 試左個Swiss 'Shroom Burger, 有swiss cheese、菠菜和炒磨菇, side就要左幼身shoestring fries(USD$10)~ 個burger味道ok, 但塊漢堡扒有點乾, 唔太juicy~

Day 22
上晝先去Dallas Museum of Art參觀, 免費入場~ 呢個館都幾多野睇, 有modern arts如漫畫、銀飾、空間藝術品, 還有七大洲的古代藝術品, 當中包括油畫、雕塑、手工藝品、宗教信物、裝潢擺設等, 令人目不暇給~ 在藝術館的cafe食三文治做午餐(USD$6.8)~ 然後下晝就到Dallas Arboretum and Botanical Garden看花卉(USD$15)~ 臨近萬聖節, 園內亦擺放左大量不同種類的南瓜, 又有稻草人等裝飾, 別具特色~ 晚餐就去左台北小站食台灣菜, 個牛肉牛筋麵都算正宗好食, 其他食物如雞捲、醉雞、窩貼、刈包就很一般~ 晚上再到NorthPark Center血拼~

Day 23 & 24
鳥倦知還! 當日乘搭中午十二點十五分的美國航空班機回港~ 離開前在達拉斯國際機場搞退稅, 原來諸多限制, 真係攞黎搞~ 首先購物要在有參與退稅計劃的公司名單內, 每間商舖的銷售稅要滿USD$10先有得退, 最離普嘅係要收取50%退稅作手續費, 七除八扣下真係退得雞碎咁多~ 回港班機竟然完全爆滿, 真的意想不到~ 由於回程航線取道阿拉斯加, 所以比去程用多兩小時~ 航機於翌日下午六時左右準時到港~ 回家前經過旺角佔領區, 感激一班有心人為香港企硬, 面對千夫所指、無理對待、暴力挑釁仍堅守原則~ 想不到去完一個長旅行, 香港已被政治撕裂得體無完膚~ 我個人覺得秘魯的歷史是個悲劇, 當年被西班牙人入侵, 文化遭到西班牙人同化, 連自己的語言和宗教信仰都守護不了, 而家香港正是面對緊同樣的浩劫~

成功發佈